Prezident Shavkat Mirziyoevning O’zbekiston Respublikasi Mustaqilligining yigirma sakkiz yilligiga bag’ishlangan tantanali marosimdagi nutqi

Assalomu alaykum, qadrli yurtdoshlar!

Muhtaram mehmonlar!

Xonimlar va janoblar!

Mana shu quvonchli ayyomda siz, azizlarni, ko’pmillatli butun xalqimizni Mustaqillik bayrami bilan chin qalbimdan tabriklashga ijozat bergaysiz.

Bundan yigirma sakkiz yil oldin Birinchi Prezidentimiz, muhtaram Islom Abdug’anievich Karimov xalqimiz va jahon hamjamiyatiga O’zbekiston Respublikasining davlat mustaqilligini e’lon qildi.

O’tgan qisqa davrda jonajon O’zbekistonimiz mashaqqatli, shu bilan birga, sharafli istiqlol yo’lini bosib o’tdi.

Bugun bir haqiqatni katta g’urur va iftixor bilan aytishga to’la asosimiz bor: mard va matonatli xalqimiz qanchalik qiyin va og’ir sinovlarga duch kelmasin, o’zining mustahkam irodasini namoyon etib, o’zi tanlab olgan mustaqillik yo’liga doimo sodiq bo’lib kelmoqda.

Bugun O’zbekiston o’z taraqqiyotining yangi bosqichiga dadil qadam qo’ymoqda. Mamlakatimizni modernizatsiya qilish, inson huquq va erkinliklarini, qonun ustuvorligini ta’minlash asosida O’zbekistonning yangi, demokratik qiyofasi yaratilmoqda. Bu borada Harakatlar strategiyasida belgilab berilgan “Milliy tiklanishdan – milliy yuksalish sari”degan ustuvor g’oya biz uchun dasturilamal bo’lib xizmat qilmoqda.

Milliy yuksalish deganda, biz mamlakatimiz taraqqiyoti, xalqimizning hayot darajasi va turmush sifatini har tomonlama yuqori bosqichga ko’tarishni tushunamiz.

Davlatimiz, el-yurtimizning salohiyati va kuch-qudratiga tayanib, tabiiy boyliklarimizdan oqilona foydalanib, biz o’z oldimizga qo’ygan ana shunday maqsadlar sari izchil qadam qo’ymoqdamiz.

Hurmatli anjuman qatnashchilari!

Biz bugun qanday islohotlarni, qanday o’zgarishlar, qanday yangi loyihalarni amalga oshirayotgan bo’lmaylik, ularning barcha-barchasi yagona, ulug’ bir maqsadga qaratilgan. U ham bo’lsa, mana shu mehnatkash, zahmatkash, olijanob xalqimizni rozi qilish, hayotning barcha sinovlarini matonat bilan engib yashayotgan vatandoshlarimizning ishonchini oqlash, og’irini engil qilishdan iboratdir.

Lekin hammamiz yaxshi tushunamizki, bunday ulug’ maqsadlarga o’z-o’zidan, quruq va balandparvoz gaplar bilan erishib bo’lmaydi. Bunday marralarga faqat tinimsiz, og’ir va fidokorona mehnat bilan erishiladi.

Shu maqsadda so’nggi yillarda davlat va jamiyat boshqaruvi, sud-huquq tizimini takomillashtirish, mamlakatimizning mudofaa qudratini mustahkamlash, haqiqiy bozor iqtisodiyotiga o’tish bo’yicha katta ishlar amalga oshirilmoqda. Xususiy mulk va tadbirkorlik uchun keng sharoit va imkoniyatlar yaratib berilmoqda. Makroiqtisodiy barqarorlik ta’minlanmoqda.

Qishloq xo’jaligida tub islohotlar olib borilmoqda. Bu yilgi tabiat qiyinchiliklariga qaramasdan, mirishkor fermer va dehqonlarimiz mardona mehnat qilib, ko’plab sohalarda mo’l hosil etishtirdilar.

Fursatdan foydalanib, barcha dehqon va fermerlar, dala mehnatkashlarini xalqimiz farovonligini ta’minlash yo’lida erishayotgan katta yutuqlari bilan samimiy tabriklashni o’z burchim, deb bilaman.

Aziz do’stlar!

Yurtimizda ijtimoiy rivojlanish bo’yicha o’ziga xos tizim shakllanmoqda. Bu borada “Obod qishloq”, “Obod mahalla”, “Yoshlar – kelajagimiz”, “Besh ijobiy tashabbus” kabi dasturlarimiz aholini yangicha fikrlash va ishlashga safarbar etishda muhim rol o’ynamoqda. Buning natijasida yuzlab tuman, shahar va qishloqlarning me’moriy qiyofasi tubdan yangilanmoqda.

Ilm-fan, ta’lim-tarbiya, sog’liqni saqlash, madaniyat va sport sohalarida bo’layotgan katta o’zgarishlar ham sizlarga yaxshi ma’lum.

Biz umumta’lim maktablarida 11 yillik tizimni tikladik. Maktab ta’limini rivojlantirish masalasi buyuk umummilliy maqsadga, umumxalq harakatiga aylanmoqda.

Bugungi kunda mamlakatimizda oliy ta’lim sohasi ham jadal rivojlanmoqda. Faqat keyingi uch yilda 35 ta yangi oliy o’quv yurti tashkil qilindi va ularning umumiy soni 112 taga etdi. Bularning 13 tasi nufuzli xorijiy universitetlarning filiallari ekanini alohida ta’kidlash lozim.

Sog’liqni saqlash sohasining moddiy-texnik bazasi va kadrlar salohiyatini mustahkamlash doimo e’tiborimiz markazida bo’lib kelmoqda. Yurtimizda ko’plab yangi shifoxonalar, tibbiyot markazlari, oilaviy va xususiy klinikalar faoliyati yo’lga qo’yilmoqda.

Keyingi yillarda kam ta’minlangan, nogironligi bo’lgan insonlar, yoshlar, xotin-qizlar, keksa avlod vakillarini ijtimoiy himoya qilish davlat siyosatining ustuvor yo’nalishiga aylandi. Bu borada Tibbiy-ijtimoiy xizmatlar agentligi, Nogironligi bo’lgan insonlarni qo’llab-quvvatlash jamg’armasi tashkil etilganini qayd etish lozim.

Aholi, ayniqsa, yoshlar va xotin-qizlarni ish bilan ta’minlash biz uchun eng dolzarb vazifa bo’lib kelmoqda. Bizning barcha iqtisodiy va ijtimoiy dasturlarimiz, yirik investitsiya loyihalarimiz, xizmat ko’rsatish sohasini rivojlantirishga qaratilgan chora-tadbirlarimizning markazida aynan shu muhim masala asosiy maqsad va vazifa bo’lib turibdi.

Uzoq vaqt davomida o’tkir muammo bo’lib kelgan aholini uy-joy bilan ta’minlash bo’yicha ham yurtimizda yangi davr boshlandi, desak, xato bo’lmaydi.

Mamlakatimizning madaniy hayotida ham ulkan o’zgarishlar yuz bermoqda. Birinchi marta Shahrisabz shahrida Xalqaro maqom san’ati anjumani, Termiz shahrida Xalqaro baxshichilik san’ati festivali katta muvaffaqiyat bilan o’tkazildi. Kuni kecha Samarqand shahrida yuksak saviya va baland ruh bilan o’tkazilgan “Sharq taronalari” xalqaro musiqa festivali betakror mumtoz san’atimizni yana bir marta dunyoga namoyon etdi. Sentyabr oyida esa Qo’qon shahrida ilk bor Xalqaro hunarmandchilik festivalini o’tkazamiz.

Biz ma’naviyat va ma’rifat ishini vatanparvarlik ishi, vijdon ishi, deb bilamiz. Vijdoni, ma’naviyati bor inson Vatanni albatta yaxshi ko’radi. Vijdon, ma’naviyat degani – xalqqa, Vatanga chin yurakdan xizmat qilish deganidir.

Mana shunday qarash butun xalqimiz, ayniqsa, yoshlarimiz tomonidan keng va qizg’in qo’llab-quvvatlanayotgani ma’naviy tarbiyaning naqadar dolzarb ahamiyatga ega ekanini ko’rsatadi.

Aziz do’stlar!

O’zbekiston inson huquqlari va erkinliklarini ta’minlash bo’yicha mustaqil siyosatini qat’iy davom ettirmoqda va bu siyosat xalqaro hamjamiyat tomonidan e’tirof etilmoqda.

Mamlakatimizda mahbuslarni afv etish instituti joriy etildi. Keyingi uch yilda etti marta afv e’lon qilindi. Natijada qilmishidan chin dildan pushaymon bo’lib, tuzalish yo’liga qat’iy o’tgan 4 mingga yaqin mahbus jazoni o’tash joylaridan ozod etildi.

Kuni kecha afv etish haqidagi yana bir farmonga imzo chekdim. Unga ko’ra jazo muddatini o’tayotgan 65 nafar fuqaro afv etildi.

Tasavvur qiling, o’z uyiga, yaqinlari bag’riga qaytayotgan bu insonlarning, ularning ota-onasi, farzandlarining quvonchi, xursandchiligini “oynai jahon” orqali ko’rgan odam, bu haqiqatan ham ezgu va savobli ish ekaniga yana bir bor ishonch hosil qiladi.

Mustaqillik bayrami arafasida Qoraqalpog’iston Respublikasi Jasliq qo’rg’onidagi jazoni ijro etish koloniyasi yopilgani insonparvar siyosatning yana bir ifodasi bo’ldi.

Bu tarixiy qadam mamlakatimizda inson huquq va erkinliklarini himoya qilish vaqtinchalik kampaniya emas, balki davlat siyosati darajasidagi uzluksiz jarayon ekanini ko’rsatadi.

Bugungi kunda O’zbekiston o’z fuqarolarining huquq va manfaatlarini, ular qaerda bo’lishidan qat’i nazar, himoya qilishga qodir mamlakat sifatida o’zini namoyon etmoqda.

Chet ellarda ishlayotgan va ta’lim olayotgan vatandoshlarimiz bilan aloqalar mustahkamlanib, ularning huquq va manfaatlari ta’minlanmoqda. O’zbekistonga qaytib, ish yoki o’qish faoliyatini davom ettirish istagida bo’lgan fuqarolarimiz uchun zarur sharoitlar yaratilmoqda.

Bu yil 156 nafar vatandoshimiz – asosan ayollar va bolalar jangovar harakatlar davom etayotgan Suriyadan qaytarib olib kelindi va ularning fuqarolik huquqlari tiklandi. Albatta, kechirimli, mehr-oqibatli bo’lish xalqqa ham, Xudoga ham manzur bo’ladi. Mana shunday ezgu fazilatlar bizning bag’rikeng xalqimizni yanada ulug’laydi.

Hurmatli vatandoshlar!

Hozirgi vaqtda O’zbekiston tashqi siyosat sohasida ham faol va samarali faoliyat olib bormoqda. Uzoq va yaqindagi barcha davlatlar, xalqaro tashkilotlar bilan aloqalarimiz tobora kengayib, rivojlanmoqda.

Avvalo, Markaziy Osiyo davlatlari bilan yaxshi qo’shnichilik munosabatlari o’rnatilib, o’zaro manfaatli aloqalar yo’lga qo’yilmoqda. Minglab oddiy odamlarning chegaralardan bemalol o’tishi, mintaqamiz bo’ylab erkin harakatlanishi, qarindosh- urug’lari bilan bordi-keldi qilishlari uchun barcha sharoit yaratildi.

O’zbekiston mintaqaviy xavfsizlikni ta’minlash bo’yicha chora- tadbirlarni amalga oshirishda, Afg’onistonda tinchlik o’rnatishga qaratilgan muloqotlarda faol ishtirok etmoqda.

Bularning barchasi mamlakatimizning xalqaro maydondagi obro’- e’tiborini oshirishda, yurtimizning do’stlari va hamkorlarini ko’paytirishda muhim ahamiyatga ega bo’lmoqda.

Fursatdan foydalanib, mamlakatimizdagi demokratik islohotlarni qo’llab-quvvatlab, xayrixoh bo’lib kelayotgan, bugungi tantanada ishtirok etayotgan xorijiy davlatlarning muhtaram elchilariga, xalqaro tashkilotlar vakillariga, chet ellik sheriklarimizga, O’zbekistonning barcha do’stlariga samimiy hurmat va minnatdorlik bildirishga ijozat etgaysiz.

Muhtaram yurtdoshlar!

Hayotimizda tinchlik-totuvlik, millatlar va dinlar o’rtasida do’stlik va hamjihatlik mustahkamlanib bormoqda. Biz buni barcha islohotlarimizning kafolati, eng muhim natijasi, deb bilamiz. Bugungi kunda amalga oshirayotgan islohotlarimiz, xalq bilan muloqot davlat siyosati darajasiga ko’tarilgani tufayli jamiyatimizda ochiqlik va erkinlik muhiti tobora kuchayib bormoqda.

Odamlar tashabbus ko’rsatib, nafaqat o’z shaxsiy muammosi, balki ko’pchilikning dardu tashvishlarini hal qilish uchun davlat idoralari bilan hamkorlikda ishlashga o’rganmoqda.

Bilasizlar, men mamlakatimiz bo’ylab juda ko’p safarlarda bo’laman. Joylarda, olis tuman, qishloq va ovullarda bo’lib, yangi-yangi iqtisodiy-ijtimoiy loyihalarni joriy etishga, odamlar nima bilan yashayapti, ularning ahvoli, kayfiyati qanday ekanini yaqindan bilishga, ularni qiynayotgan muammolarni echish uchun yordam berishga intilaman.

Mana shunday ochiq, samimiy muloqotlar asosida bugun xalqimiz bilan ko’p-ko’p murakkab, muhim masalalarni birgalikda hal qilmoqdamiz. Va bu odamlarimiz qalbida kelajakka ishonch uyg’otib, ularni yangi, ulkan marralar sari ruhlantirmoqda. Hech shubhasiz, bu – bizning eng katta yutug’imizdir.

Shu ulug’ ayyomda har qanday og’ir sinov va mashaqqatlarda ham Vatanimiz mustaqilligini asrab, uning barqaror taraqqiyotini ta’minlab kelayotgan mard va bag’rikeng xalqimizga halol va fidokorona mehnati, istiqlol g’oyalariga sadoqati uchun chuqur ta’zim qilaman.

Muhtaram vatandoshlar!

Albatta, hayot bor ekan, uning o’tkir talablari, muammolari bo’lgan va bundan keyin ham bo’ladi. Lekin har qanday muammoni oqilona hal qilish uchun, avvalo, birlik, hamjihatlik zarur.

Barchamizga, ayniqsa, rahbar va etakchilarga chuqur bilim, aql-zakovat, sabr-toqat kerak. Shuning uchun “Jaholatga qarshi – ma’rifat” degan fikrda katta ma’no bor. Bu g’oya faqat diniy tarbiya bilan bog’liq ishlarda emas, balki hayotimizning barcha sohalarida hal qiluvchi ahamiyatga ega. Har bir masalani ma’rifat asosida chuqur o’ylab, xalqqa hurmat bilan, takror va takror aytaman, odamlar fikrini inobatga olib, faqat qonun va adolat mezoniga tayangan holda hal etsak, el-yurtimiz bizdan albatta rozi bo’ladi.

Bugun zamon o’zgardi. Endi hammamiz erkinlik, ochiqlik, oshkoralik sharoitida ishlashga o’rganishimiz lozim. Barcha rivojlangan davlatlar, dunyo hamjamiyati shunday yashamoqda.

Davrning, hayotning keskin talablaridan orqada qolmaslik uchun barchamiz har kuni o’qib-o’rganishimiz, o’z ustimizda ishlashimiz, bilim va saviyamizni doimo oshirib borishimiz kerak.

Bizning tomirlarimizda ulug’ ajdodlarimizning qoni oqmoqda. Buyuk bobolarimizning munosib izdoshlari va davomchilari bo’lish biz uchun ham qarz, ham farz, desam, o’ylaymanki, barchangiz bu fikrga qo’shilasiz.

O’z Vatanini, ona xalqini ravnaq toptirish uchun o’zini ayamasdan mehnat qilish: bu – jasorat va mardlik, bu – ona yurtga muhabbat va sadoqat, bu – to’g’ri tarbiya va amaliy namuna demakdir.

Shu kunlarda o’zining fidokorona mehnati bilan mamlakatimiz rivojiga munosib hissa qo’shib, barchaga namuna bo’layotgan yurtdoshlarimizga markazda va joylarda davlatimizning yuksak unvonlari, orden va medallari tantanali ravishda topshirilmoqda.

El-yurtimizga sadoqat bilan xizmat qilib, xalqimiz o’rtasida katta obro’-e’tibor topgan ana shunday vatandoshlarimizni o’z nomimdan, sizlarning nomingizdan samimiy tabriklab, ezgu tilaklarimizni bildirishga ruxsat etgaysiz.

Aziz do’stlar!

Bugun bir fikrni qat’iyat bilan ta’kidlashni zarur, deb bilaman: O’zbekistondagi demokratik jarayonlar endi orqaga qaytmaydigan, muqarrar tus oldi.

Biz mana shu yorug’ kunlar uchun kurashib, jon fido etgan ota- bobolarimizning haqqi-hurmati, 33 millionlik xalqimizning haqqi-hurmati, bizga umid va ishonch ko’zi bilan boqib turgan bolalarimiz, nabiralarimizning haqqi-hurmati – mustaqillik va istiqlol yo’lidan hech qachon qaytmaymiz!

O’z maqsadlarimizga albatta etamiz – kelajagi buyuk O’zbekistonni barchamiz birgalikda barpo etamiz!

Qadrli vatandoshlar!

Hammamizga yaxshi ma’lumki, oldimizda katta siyosiy voqea turibdi. Shu yil dekabr oyida mamlakatimiz parlamenti va mahalliy kengashlarga saylovlar bo’lib o’tadi.

Bu saylovlar milliy mustaqilligimizni yanada mustahkamlash, O’zbekistonni dunyodagi rivojlangan, demokratik davlatlar qatoriga ko’tarishda yana bir muhim amaliy qadam bo’ladi.

Bu saylovlar butun xalqimiz, ayniqsa, yoshlarimizning orzu- intilishlarini ifoda etib, ular uchun yangi imkoniyatlar ochib beradi, deb ishonaman.

Bugungi kunda qancha-qancha bilimli, nufuzli xorijiy universitetlarda tahsil olgan, chet tillarni, zamonaviy boshqaruv usullarini yaxshi biladigan navqiron yoshlar hayotimizga kirib kelmoqda.

Ular bizning umidimiz, ertangi kunimiz. Shuning uchun yoshlarga keng yo’l ochib berish, ehtiyoj va manfaatlarini ta’minlash, qobiliyat va iste’dodini ro’yobga chiqarish, hayotda o’z o’rnini topishiga yordam berish, ularga mas’ul lavozimlarni ishonib topshirish bundan buyon ham doimo e’tiborimiz markazida bo’ladi.

Aziz farzandlarimiz el-yurtimizning ana shunday yuksak e’tiboriga munosib bo’lib, o’z salohiyati bilan, milliy g’oyamizga sadoqati bilan O’zbekistonimizni butun dunyoga tarannum etishlariga ishonaman va bu yo’lda ularga baxt va omad tilayman.

Muhtaram vatandoshlarim!

Sizlarni O’zbekiston davlat mustaqilligining yigirma sakkiz yillik bayrami bilan yana bir bor chin dildan samimiy tabriklayman.

Barchangizga sihat-salomatlik, yangi-yangi yutuqlar, oilaviy xotirjamlik yor bo’lsin, farzandlar, nabiralarning baxtu kamolini ko’rish nasib etsin!

Yurtimiz tinch, osmonimiz musaffo, jonajon O’zbekistonimiz omon bo’lsin!

Mustaqilligimiz abadiy bo’lsin!

Vatanimizning yuksak mukofotlari topshirildi

O’zbekiston Respublikasi Prezidenti Shavkat Mirziyoevning farmonlariga muvofiq, mustaqilligimizning 28 yilligi arafasida bir guruh yurtdoshlarimiz va mamlakatimiz bilan samarali hamkorlik qilib kelayotgan xorijliklar faxriy unvonlar, orden va medallar bilan taqdirlangan edi. Ko’ksaroy qarorgohida 31 avgust kuni ana shu yuksak mukofotlarni topshirish marosimi bo’ldi. Shavkat Mirziyoev yig’ilganlarni, ularning timsolida joylarda davlat mukofotlarini qabul qilib olayotgan barcha yurtdoshlarimizni muborakbod etdi. Bugun barcha-barcha jabhalarda o’zgarishlar ro’y bermoqda. O’zbekistonning iqtisodiy qudratini yuksaltirish, hududlarni kompleks rivojlantirish, qishloq va mahallalarni obod qilish, xalqning turmush darajasini oshirish bo’yicha keng ko’lamli islohotlar amalga oshirilmoqda. Iqtisodiyot, odamlar turmushida katta o’zgarishlar, islohotlar amalga oshirilayotgani va ularning dastlabki natijalari ko’zga tashlanayotgani ta’kidlandi. – Xalq bilan muloqot hech qachon bunday bo’lmagan. Odamlarni eshitsak, rejamiz to’g’ri bo’ladi. Hamma hududlar va sohalardagi o’zgarishlar – xalqimiz bilan birgalikda qilayotgan ishlarimiz samarasi. Eng asosiysi, xalqimizning ishonchi bizga kuch beradi, – dedi Prezident. O’zbekistonning xalqchil, insonparvar siyosatini dunyo hamjamiyati e’tirof etmoqda. Tashqi siyosat ham, ichki siyosat ham keng ko’lamli muloqot va munosabatlar asosida, uyg’un holda olib borilmoqda. – Biz uchun bittayu bitta to’g’ri yo’l, yagona maqsad millatimiz, xalqimiz, jonajon O’zbekistonimiz manfaatini yuqori tutishdir. Buning uchun doimo etti marta o’lchab, bir marta kesadigan siyosat olib borishimiz kerak. Oldimizda murakkab vazifalar turibdi. Xalqimizga, sizlar kabi mard va shijoatli yurtdoshlarimizga ishonib, marrani katta oldik, – deya ta’kidladi davlatimiz rahbari. Shavkat Mirziyoev marosimga yig’ilganlarni nomma-nom tilga olib, davlat mukofotlari bilan tabrikladi. Ularni Vatanimizning asl farzandlari, vijdoni pok, qalbi uyg’oq odamlar deb atadi. Samarali faoliyati, halol va fidoyi mehnati, yoshlarga ibrat bo’layotgani uchun ularga minnatdorlik bildirib, ezgu tilaklarini izhor etdi. Prezidentimiz taqdirlangan yurtdoshlarimiz va xorijlik diplomatlarga mukofotlarni tantanali ravishda topshirdi. – Shunday yuksak mukofotga munosib ko’rganlari uchun Prezidentimizdan minnatdorman, – dedi O’zbekiston Qahramoni, “Nuroniy“ jamg’armasi Samarqand viloyati kengashi raisi Hasan Normurodov. – Vazifa, martaba insonning o’ziga bino qo’yib kibru havoga berilishi uchun emas, aksincha, ezgu amallari bilan o’zgalar qalbida yaxshilik chamanzorlarini bino etish uchun berilgan imkoniyat Qaysi bir rahbar shu qoidaga amal qilib ish ko’rsa, doimo xalqning nazarida bo’ladi. Men ham holmi qudrat mehnat qilib, hazrat Alisher Navoiy aytganidek xalq ichidaman, xalqnikiman, xalq bilan birgaman. Bundan keyin ham qo’limdan kelganicha o’z mamlakatimizda amalga oshirilayotgan islohotlarga o’z hissamni qo’shishga harakat qilaman. Davlatimiz rahbari mukofotlanganlarni yana bir bor Vatanimiz mustaqilligining 28 yillik bayrami bilan muborakbod etdi va ularga sihat-salomatlik, oilaviy baxt, mehnat faoliyatida ulkan zafarlar tiladi. Mukofotlanganlar yuksak e’tibor uchun davlatimiz rahbariga minnatdorlik bildirdi.

Qoraqalpog’iston Respublikasi Jo’qorg’i Kengesining Raisi Erniyazov Musa Tajetdinovich «O’zbekiston Qahramoni» unvoni bilan taqdirlandi

Qoraqalpog’iston Respublikasi Jo’qorg’i Kengesining Raisi Erniyazov Musa Tajetdinovichga O’zbekiston Respublikasi Prezidentining 2019 yil 28 avgustdagi «O’zbekiston Qahramoni» unvonini berish to’g’risidagi Farmoniga asos Mamlakatimiz iqtisodiy salohiyatini mustahkamlash, uning jahon miqyosidagi shon-shuhratini yuksaltirish, Vatanimiz obodligi, turmushimiz farovonligini ta’minlash borasidagi ulkan xizmatlari, so’nggi yillarda yurtimizda jadallik bilan olib borilayotgan tub islohotlar jarayonidagi tashabbuskorligi va fidoyiligi, davlat va xalq manfaatlarini ro’yobga chiqarish yo’lidagi fidokorona mehnati, ishlab chiqarish va ijtimoiy-ma’naviy sohalardagi ko’p yillik samarali va ibratli faoliyati, yosh avlodni vatanparvarlik, milliy va umuminsoniy qadriyatlarga hurmat ruhida tarbiyalashga qo’shgan katta hissasi hamda ijtimoiy hayotdagi faol ishtiroki uchun «O’zbekiston Qahramoni» unvoni berildi.

Qoraqalpog’iston Respublikasi Jo’qorg’i Kengesining Raisi M.Erniyazovga tabriklar kelmoqda.

O’zbekiston Respublikasi Prezidenti Sh.M.Mirziyoevning 2019 yil 28 avgustdagi Farmoniga asos Qoraqalpog’iston Respublikasi Jo’qorg’i Kengesining Raisi Musa Tajetdinovich Erniyazovga «O’zbekiston Qahramoni» unvoni berilishi, shuningdek, O’zbekiston Respublikasi davlat mustaqilligining 28 yilligi munosabati bilan Ellikqal’a tumani faollaridan samimiy qutlovlar keldi.

Unda faollar Jo’qorg’i Kenges Raisining rahbarligida tumanda aholi farovonligini yuksaltirish yo’lida olib borilayotgan ishlarga o’z minnatdorchiligini bildirib, yurtimizga ravnaq va farovonlik tilab, ezgu istaklar izhor etilgan.

Jumladan, quyidagilar o’z tabriklarini yo’llagan:

O’zbekiston Respublikasi Xalq o’qituvchisi R.Qadirov;

O’zbekiston Respublikasida xizmat ko’rsatgan yoshlar murabbiysi A.Radjapov; O’zbekiston Respublikasida xizmat ko’rsatgan madaniyat xodimi, Qoraqalpog’iston Respublikasida xizmat ko’rsatgan jurnalist Ya.Qo’chqarov;

Qoraqalpog’iston Respublikasida xizmat ko’rsatgan madaniyat xodimi I.Xodjaniyazov;

Qoraqalpog’iston Respublikasida xizmat ko’rsatgan qishloq xo’jaligi xodimi R.Razzaqov:

«Do’stlik» ordeni sohibi, Qoraqalpog’iston Respublikasida xizmat ko’rsatgan jurnalist Z.Nurmetova va boshqalar.

Bo’zotov tumani rivojlanish bosqishida

Barchamizga ma’lum, joriy yilning 20-21 avgust kunlari O’zbekiston Respublikasi Prezidenti Sh.Mirziyoevning respublikamizga tashrifi chog’ida chorvachilikga ixtisoslashtirilgan Bo’zotov tumanini tashkil etish tashabbusini xalqimiz katta quvonch va hayajon bilan qarshi oldi.

Hozir tumanni qayta tashkil etish ishlari qizg’in sur’atlarda olib borilmoqda.

Jumladan, 23 avgust kuni mazkur hududda Bo’zotov tumanini tashkil etish masalalari, bu borada olda turgan vazifalarga bag’ishlangan majlis bo’lib o’tgan edi. Unda Qoraqalpog’iston Respublikasi Jo’qorg’i Kengesining Raisi M.Erniyazov tomonidan olda turgan ishlar muhokama etilib, tegishli vazifalar belgilangan edi. Shuningdek, aholini qiynab kelayotgan muammolarni bartaraf qilish va xalqning turmush sharoitini yaxshilash bo’yicha tadbirlarni belgilash to’g’risidagi masalalarga ham e’tibor qaratildi.

Bugun, ya’ni, 27 avgust kuni Jo’qorg’i Kenges Raisi rahbarligida tadbirkorlar, vazirliklar, korxonalar, muassasa va tashkilotlarning rahbarlari ishtirokida yig’ilish o’tkazildi.

Majlisda yangidan tashkil etilayotgan tumanni ijtimoiy- iqtisodiy rivojlantirish masalalari ko’rib chiqildi. Ya’ni, tumanda aholiga maishiy xizmat ko’rsatuvchi ob’ektlarni barpo etish va bu ishlarga tadbirkorlarni keng jalb etish bo’yicha topshiriqlar belgilab berildi hamda loyihalar shakllantirildi.

Bugungi kunda hududda chorvachilikga ixtisoslashtirilgan 51 ta fermer xo’jaligi bo’lib, ularda jami 3 ming boshdan ziyod qoramol, 2 ming boshdan ziyod qo’y-echki, 848 bosh yilqi va 575 ta parranda boqilmoqda. Kelgusida mazkur hudud aholisining yashash sharoitlarini yaxshilash bo’yicha bir qator loyihalarni amalga oshirish rejalashtirilgan. Chorva mollarining bosh soni oshirilib, go’sht va sut mahsulotlarini qayta ishlaydigan korxonalar ishga tushirilishi belgilangan. Shuningdek, tuman hududidan ayol-qizlarning bandligini ta’minlaydigan to’qimachilik kompleksining qurilish ishlari ham boshlanib ketdi.

Hudud aholisi mamlakatimiz mustaqilligining 28 yillik bayramini yangidan tashkil etiladigan tuman markazida munosib tarzda nishonlashi kutilmoqda. Bo’zotovliklar bayramni ham boshlab yubarishgan. Ya’ni, 24 avgust kuni respublikamiz estrada xonandalarining ishtirokidagi kontsert dasturi va bo’zotovlik uyushmagan yoshlar o’rtasida “Bo’zotov kubogi” mini futbol musobaqasi yuqori darajada o’tkazildi.

Yangi tumanda 21 mingdan ziyod aholi istiqomat qiladi.

Bo’zotovlik nuroniy saytimiz orqali Prezidentimizga murojaat qilish istagini bildirdi

Tahririyatimizga Bo’zotov tumani, “Qusxanatau” OFYda istiqomat qiluvchi mehnat faxriysi Tanatar Abdullaev qo’ng’iroq qilib, saytimiz orqali Prezidentimizga o’z murojaatini yo’llash istagini bildirdi. Unda quyidagi fikrlar o’z aksini topgan: Muhtaram Prezidentimizning joriy yilning 20-21 avgust kunlari Qoraqalpog’istonga bo’lgan tashrifini barcha yurtdoshlarimiz qatorida Bo’zotov tumani aholisi ham katta xursandchilik bilan qarshi oldi. Mamlakatimiz rahbarining qoraqalpog’istonlik faollar bilan uchrashuvini televizorda katta hayajon bilan tomosha qilar ekanman, Muhtaram Prezidentimiz Bo’zotov tumanini qayta tashkil etish bo’yicha tashabbus bildirganlarida quvonchdan ko’zimga yosh kelib ketdi. Mana shundan buyon Bo’zotov tumaniga yangi nafas kirib keldi, unda istiqomat qiluvchi har bir fuqaroning uyida katta to’y, katta bayram. Chunki, ularning ko’p yillardan buyon armon bo’lib kelayotgan istaklari ruyobga chiqmoqda. Eng muhimi, Bo’zotov o’ziga xos, chorvachilikga ixtisoslashtirilgan tumanga aylanmoqda. Tumanning qayta tashkil etilishi bo’zotovliklarga Mustaqilligimizning 28 yilligiga katta bayram sovg’asi bo’ldi. Darhaqiqat, mazkur hudud aholisi shu kunga qadar Kegeyli tumaniga qatnab kelayotgandi. Oddiygina kommunal to’lovlar, oddiy ma’lumotnomalar, oddiy tadbirlar uchun ham 45 km masofani bosib, Kegeyli tumaniga borishga majbur edilar. Qolaversa, 2004 yili Bo’zotov tumani tugatilib, uning hududi Kegeyli va Chimboy tumanlariga o’tkazilishi sababli qator ish o’rinlari qisqartildi, davlatning ko’plab binolari bo’shab qoldi, aholi uchun qator noqulayliklar paydo bo’ldi. Endilikda bu kabi muammolar o’z echimini topadi. Biz, Bo’zotov tumanida istiqomat qiladigan bir guruh nuroniylar, barcha Bo’zotov tumani aholisi nomidan xalqimizga qaratayotgan yuksak e’tibori va g’amxo’rligi uchun Muhtaram Prezidentimizga chuqur minnatdorchilik bildiramiz. Ilohim, xalqimiz baxtiga hamisha sog’-omon bo’lsin, deymiz. Kelgusida Bo’zotov tumanining har tomonlama rivojlanishiga, istiqbolli tumanga aylanishiga ishonamiz.

Yangi energiya quvvatlari sanoat rivojiga tayanch bo’ladi

Taxiatosh issiqlik elektr stantsiyasida har biri 230-280 megavatt quvvatga ega bo’lgan ikkita bug’-gaz qurilmasi barpo etilmoqda.

Prezident Shavkat Mirziyoev Qoraqalpog’istonga safari chog’ida mazkur investitsiya loyihasi bo’yicha amalga oshirilayotgan ishlar bilan tanishdi. – Mamlakatimizda sanoatni rivojlantirish borasida katta marra olganmiz, to’g’ridan-to’g’ri xorijiy investitsiyalar jalb etyapmiz. Bular uchun avvalo mustahkam infratuzilma kerak. Bu loyiha Qoraqalpog’iston va Xorazmda energiya ta’minotini yaxshilash, aholiga kuz-qish mavsumida ham uzluksiz elektr quvvati etkazib berish uchun juda muhim, – dedi davlatimiz rahbari.

Bunday strategik ishlar boshqa hududlarda ham amalga oshirilmoqda. Xususan, To’raqo’rg’on issiqlik elektr stantsiyasi qurilmoqda, Navoiy issiqlik elektr stantsiyasi va Farg’ona issiqlik elektr markazi modernizatsiya qilinmoqda.

Taxiatosh issiqlik elektr stantsiyasi ularning to’rtinchisi.

Prezidentimizning 2017 yil 11 sentyabrdagi qarori asosida amalga oshirilayotgan ushbu loyihaning umumiy qiymati 678,2 million dollarni tashkil etadi. Ikkita bug’-gaz qurilmasining ishga tushirilishi natijasida stantsiyaning umumiy quvvati 730 MVtdan 1003 MVtgacha oshadi. Yiliga 488,6 million kub metr tabiiy gaz tejalishiga erishiladi. Shuningdek, yillik suv sarfi 293 million kub metrga kamayadi. Yuzga yaqin yangi ish o’rni yaratiladi.

Taxiatosh IESda birinchi bug’-gaz uskunasi joriy yil noyabrda, xuddi shunday quvvatga ega ikkinchi uskuna keyingi yil yanvarda ishga tushiriladi.

Loyiha Janubiy Koreyaning “Hyundai Engineering Co. Ltd.” hamda “Hyundai Engineering & Construction Co. Ltd.” kompaniyalari bilan hamkorlikda amalga oshirilmoqda. Davlatimiz rahbari mazkur kompaniyalar vakillari bilan suhbatlashdi.

Shu bilan Prezidentimizning Qoraqalpog’iston Respublikasiga tashrifi yakunlandi.

Shavkat Mirziyoev g’o’za rivojini ko’zdan kechirdi

O’zbekiston Prezidenti Taxiatosh tumanidagi «Maded Botir» fermer xo’jaligi dalasida g’o’za rivojini ko’zdan kechirdi.

Ushbu xo’jalikning jami eri 110 gektar bo’lib, 60 gektarida paxta etishtirilmoqda. Davlatimiz rahbari dala agrotexnikasidagi kamchiliklarni ko’rsatib, paxta pishishini tezlashtirish, hosilga hosil qo’shish bo’yicha o’z tavsiyalarini berdi. Qishloq xo’jaligida fandan keng foydalanish, Qoraqalpog’istonning iqlimiga mos navlar yaratish lozimligini ta’kidladi.

Qoraqalpog’istonni rivojlantirishning ustuvor yo’nalishlari belgilandi

Nukus shahrida bo’lib o’tgan yig’ilishda Qoraqalpog’istonni yanada taraqqiy ettirish bo’yicha beshta ustuvor yo’nalish belgilab berildi. Birinchisi sanoatni rivojlantirish, barcha tarmoqlarda yirik va kichik ishlab chiqarish korxonalarini tashkil etishdan iborat. Ikkinchi ustuvor yo’nalish tadbirkorlik gullab yashnashi uchun keng yo’l ochib berish va uni har taraflama qo’llab- quvvatlashdir. Qishloq xo’jaligida ilg’or texnologiyalarni keng joriy qilgan holda, ishlab chiqarish hajmi, hosildorlik va mahsulot turlarini keskin oshirish uchinchi ustuvor yo’nalish etib belgilandi. To’rtinchisi – ishlab chiqarish va odamlar uchun qulay bo’lgan zamonaviy infratuzilmani yaratish. Orolbo’yi aholisining yashash sharoiti va turmush darajasini yaxshilash yuzasidan keng qamrovli ishlarni amalga oshirish esa beshinchi ustuvor yo’nalish sifatida e’lon qilindi. Prezident Shavkat Mirziyoev har bir yo’nalishda nazarda tutilgan masalalarga alohida to’xtalib, ular bo’yicha faol ishlash zarurligini ta’kidladi.

Shuningdek, har bir tuman va shaharning o’ziga xos xususiyatlari va imkoniyatlaridan kelib chiqib, ularni turli sohalarga ixtisoslashtirish bo’yicha tavsiyalar berildi. Jumladan, Qorao’zak tumani qurilish materiallari, Beruniy, Xo’jayli, Nukus tumanlari meva-sabzavotchilik, Taxtako’pir chorvachilik, Shumanay parrandachilik, Ellikqal’a uzumchilik va turizm, Mo’ynoq baliqchilik va chorvachilik, Kegayli chorvachilik, qizilmiyani qayta ishlash va qog’oz sanoati, Qanliko’l dukkakli ekinlar va sholi etishtirishga ixtisoslashtirilishi qayd etildi. Qo’ng’irotni neft-kimyo sanoati va chorvachilikka, Chimboyni qizilmiya etishtirish va qayta ishlashga, To’rtko’lni shisha, oyna va oziq-ovqat mahsulotlari ishlab chiqarishga, Amudaryoni bog’dorchilik, to’qimachilik va pillachilikka, Nukus shahrini esa farmatsevtika va elektrotexnikaga ixtisoslashtirib, Taxiatosh tumanini sanoat ishlab chiqarish hududiga aylantirish maqsadga muvofiqligi ta’kidlandi. O’zA

Prezident maktablari boshqa maktablar uchun andoza bo’lishi, ta’lim muhitini o’zgartirishi kerak

Bu haqda davlatimiz rahbari Nukus shahrida qurilayotgan Prezident maktabi bilan tanishish chog‘ida aytib o‘tdi. Shavkat Mirziyoev Prezident maktablari tashkil etish tashabbusini o‘tgan yili aynan Nukusda e’lon qilgan, buni Qoraqalpog‘istondan boshlashni taklif etgan edi. Joriy yil 20 fevralda shu bo‘yicha Prezident qarori qabul qilindi. Nukus shahrida ham ushbu maktab qurilishi jadal olib borilmoqda. Kembrij universiteti bilan hamkorlikdagi Imtihon kengashi tomonidan o‘tkazilgan qabul jarayonlarida eng bilimga chanqoq bolalar tanlab olindi.

Shavkat Mirziyoev maktabning binosi ham, ma’rifati ham mukammal bo‘lishi kerakligini, shuning uchun uni shoshmasdan, sifatli qurib, Konstitutsiya bayramida foydalanishga topshirish zarurligini ta’kidladi. Ungacha o‘quvchilar boshqa binoda o‘qib turadi.

Maktabda darslar xorijiy mutaxassislar bilan hamkorlikda ishlab chiqilgan o‘quv reja va “STEAM” dasturi asosida ingliz tilida olib boriladi. Matematika, fizika, kimyo, biologiya va axborot texnologiyalari hamda xorijiy tillar ilg‘or ta’lim metodologiyalari asosida chuqur o‘rgatiladi. Davlatimiz rahbari mazkur bilim dargohi uchun pedagoglar qanday tanlanayotgani bilan qiziqdi. – Bu maktablarning o‘qituvchisi ham, o‘quvchisi ham eng namunali bo‘lishi lozim, – dedi Prezident. – Chuqur bilim bilan birga ma’naviyat, vatanparvarlik hissi ham singdirilishi zarur. Bu yerga bilimli bolalar kelishi uchun har bir tumanda bazaviy bog‘cha va maktablar shakllanishi lozim. Shunda umumiy bilim, saviya, ta’lim muhiti o‘zgaradi.

O’zA