Til Fylkesmannen i Sogn og Fjordane v/ Bjørn Harald Haugsvær Førde e-post: [email protected]
Fresvik 1.februar 2011
Rapport frå Bygdeutviklingsprosjektet i Fresvik
Fresvik er no inne i sin andre periode med bygdeutviklingsprosjekt, og me har nett gjort ferdig år 2 av inneverande prosjektperiode. Største løftet i denne perioden har vore opptakt til danning av aksjeselskapet Fresvik Eigedom AS for å kjøpa opp butikkbygg og kaiområdet i bygda, og såleis prøva redda den stadig nedleggingstrua butikken vår. Men også mindre prosjekt har vorte jobba med i året som har gått, og det er gjort – i alle fall litt, for alle prosjekta som var planlagt jobba med etter forrige ”Framtidsverkstad”.
Laurdag 6.februar 2010 arrangerte Bygdalaget oppfølging av tidlegare ”Framtidsverkstad”, under kyndig leiing av Eli Grete Høyvik og med ny metodikk og opplegg for ”vidarekomne” i høve sist til gong (i 2006). Ca 50 personar deltok; eldste mann var 88 år og yngst jente går i 7.klassen. Veronika Seim Beck deltok frå Vik kommune. I løpet av ei dagssamling blei prosjekta me skal arbeida vidare med meisla ut.
Frå Framtidsvekstaden; me les oppsamlingsrapport etter lunsj frå 1.økt. På veggene heng gruppearbeid.
Prosjekta frå verkstaden og som skal jobbast med er lista opp under og kommentert deretter: (Det er laga ei eiga avis frå verkstaden. Denne er sendt med som vedlegg.)
Aktivitet for gamal og ung på Kafeen: Ei eiga Kafe-gruppe er danna, og denne har hatt ansvar for fleire arrangement på Kafeen i gjennom året som har gått, også i samarbeid med 4H og andre lag. Det har vore både servering av fastelavensbollar, fleire grautdagar i samband med laurdagshandel på butikken, søndagskaffi, ungdomskafe med kino m.m. Alle populære og godt besøkte tiltak. Utlysing for ny Kafevert for sommarsesongen gav ikkje resultat, så Kafedrifta har ellers lege litt brakk siste året. Til gjengjeld så er Kafeen i aktivt bruk til utleige for ulike møter og arrangement. Dette gjev også litt inntekt til Bygdalaget. Bygdalaget har også overteke stolar og bord etter eit bingolokale, som me kan nytta til arrangement/utleige. Meir aktivitet på butikken/kaiområdet: Den vesle Coop-nærbutikken i Fresvik slit med å få god nok omsetning til ikkje å bli nedlagt. Bygdelaget har difor engasjert seg sterkt i å prøva avhjelpa situasjonen og ei eiga kai-gruppe vart danna på ”Framtids- verkstaden”. Etter opptakt frå Bygdalaget er det i løpet av 2010 vorte skipa eit eige AS; Fresvik Eigedom AS, som no (frå 1.feb 2011) har kjøpt opp både butikkbygg og kaiområde finansiert gjennom salg av aksjar. Bygdalaget har arrangert møter, vore på etablerar kurs, lært om styresett, økonomi og danning av AS og hatt tett dialog med Coop. Me har seldt aksjar til ein verdi av 976.000 kroner, fordelt på 488 aksjar à kr 2000 og fordelt på 138 aksjonærar. Dette tykkjer me ikkje er verst for ei lita bygd med berre 250 innbyggjarar! Målet er å få halvert husleiga til butikken, samt at me vonar at alle medeigarane vil bruka butikken meir, og tala ser bra ut for 2010 i så måte . Bygdefolket har også stilt opp på dugnad for utkøyring av varer, utpakking og prising av varer, vask, vareteljing og ymse ”vaktmeistar-tenester”.
Gjennom kaigruppa og massiv dugnad er me også byrja på arbeidet med å rusta opp butikk/kai-området. Vegvesenet har grøfta langs vegen og kommunen kosta grus, samt sponsa lysmaster. Gjennom datakynding hjelp i bygda, er det lagt opp ny og betre dataløysing for butikkerminalen som tidlegare stadig fall ut. Gamle drivstoffpumper er skifta ut med ei ”ny”, fin bruktpumpe, som er donert, frakta frå Drammen, montert og kontrollert av ein snill østlending med slekt i bygda. Også elektrikarar i bygda har stilt opp gratis med naudsynt hjelp. Ellers må me tilstå at det har vorte mest papirarbeid i 2010, og ikkje så mykje reint fysiske utbetringar. Men det er laga planar med teikningar og skissar for korleis området skal sjå ut, halde møter og synfaringar m.a. med kommunen, Coop og fleire, og snekkarglade tusenkunstnarar har lova å stilla opp. No når bygda også eig bygg/kai-området har me fått klarsignal frå AS’et til å gå i gong. Det er m.a. tankar om etablering av gjestehavn med ymse servicetilbod for småbåtar, og i den samanheng må eksisterande kai og venterom rustast opp. Turisme i tilknytting til Nærøyfjordområdet: Fresvik har store deler av sine fjell og beitemarker innanfor området og er ein av innfallsportane til verdsarvområdet. Bygdalaget har difor engasjert oss sterkt og er med i styr og stell for Nærøyfjorden Verdsarvpark. Gjennom Fylkesmannens miljøvernavdeling og Statens Naturoppsyn har me i 2010 fått tildelt midlar til utbetrening av eit parti som rasar ut på stien mellom Fresvik og Jordalen, og det er gjeve midlar til stirydding mellom m.a. Dyrdal og Fresvik. Tundalen er også rydda for kratt/oppskot. Me arbeider i samarbeid med NVP også om informasjonstavler og skilting/merking av stiar. I byrjinga av februar vart halde eit felles informasjons og koordineringsmøte mellom Vik kommune, FM, SNO, NVP, samt grunneigar-, beite-, idrettslag m.fl. på Kafeen i Fresvik. Ca 25 stk møtte.
Representantar frå Fresvik har delteke aktivt i eit reisemålsutviklingsprosjekt for Vik kommune, og me har også hatt ein representant i styret for Reisemål Vik i Sogn. Begge våre turismebedrifter i Fresvik; Frøys Hus og Stigen Gard har fått sine eigne nettsider opp å gå, og er også profilerte på Bygdelaget si nettside: www.fresvik.net . I tillegg er turen frå Fresvik til Jordalen profilert på www.sognefjord.no .
Å betra forholdet til Vik kommune: Me har eit godt samarbeid og god dialog med Veronika Seim Beck, som er kommunen sin representant i Bygdeutviklingsprosjektet. M.a. har me samarbeidd om møte om biobrensel og kring utvikling i tilknytting til vår det av Nærøyfjordområdet. Arkitekt Ottar Wiik har lagt ned mykje arbeid i samband med opprustinga av kaiområdet i Fresvik. Me er også i dialog med teknisk etat i samband med opprustinga av kaiområdet og har fått sponsa to flotte lysmaster. Me har også fått god hjelp frå kommunen og gratis timar til rådgjeving for å læra om danning av AS for oppkjøp av butikken. (Butikken har også fått støtte direkte frå Nærings- fondet til kommunen). Me har ellers delteke i eit reisemålsutviklingsprosjekt for Vik kommune, samt er representert i styret for Reisemål Vik i Sogn (reiselivslaget).
Betre utnytting av skogen/ Skardsområdet på Fresvikåsen: i byjinga av februar vart det gjennom Vik kommune og biobrensel-gruppa i regi av Bygdalaget kalla inn til møte med Merete Larsmoen og Arnt Laukeland frå skogeigarlaget i fylket, på Kafeen i Fresvik. Ca 20 interesserte møtte. Det vart diskutert muligheiter for produksjon av biobrensel; flis eller pellets og med potensiell avtakar pelletsfyrings-anlegget ”Eldhuset” i Vik. I etter tid er utvikla eit forprosjekt der både pådrivarar i Fresvik, Vik Skogeigarlag og hogstentrepenørar i kommunen er med, i samarbeid med Skogeigarlaget i fylket, og det er m.a. er gjennomført ein studietur. LITT OM REKNESKAPET FOR 2010: (ferdig rekneskap kan ettersendast om ynskjeleg)
Rekneskapet er ikkje ferdig enno, men eit utdrag er: På konto per 31.12.2010: kr 92.948. Bygdalaget har også ca. 150.000 i gjeld for kjøp av Kafebygget i fjor. Av inntekter i år 2010 er: kr 80.000 frå Bygdeutviklingsprogrammet og kr 20.000 frå Vik kommune i samband med same program. Kr 40.000 totalt frå SNO i samråd med Fylkesmannen til stirydding og vøling av sti. Grasrotandelen har medført kr 14.650. Vik kommune har gitt kr 7000 til kultursti og me har fått kr 5000 + 2000 i gåver frå lokale bankar. I tillegg kjem litt inntekter frå utleige av Kafelokale, kiosksal m.m.
Største utgifter har i år har vore arrangering av Framtidsverkstad; den kosta totalt ca kr 16.000. Stirydding/vøling av sti går ca. opp i opp med tilskotet på kr 40.000. Midlane til Bygdeutvikling har me i år valgt å kjøpa aksjar i Fresvik Eigedom AS for; totalt 50 aksjar à kr 2000 = kr 100.000. Desse pengane vil der igjen bli brukt til opprusting av kaiområdet v/ Bygdalaget.
Kort sagt, så har me vel oppnådd langt meir enn kva som var forventa i løpet av år 2010. Ikkje ved at me er komne så mykje lenger reint fysisk sett med opprustinga av butikk-/kaiområdet, men ved at me har bidrage sterkt til danninga av Fresvik Eigedom AS, for der i gjennom prøva å ”redda” butikken vår. Bygdalaget har også 1 styreplass i selskapet. Me har forhandla med Coop Eigedom og klart å få ein god pris, samt greie avtalar for bygg og anlegg. Banken har også vist oss tillit ved å gje tilsagn om lån, men at me skulle klara å selja aksjar for nesten 1 million kroner var utruleg og overveldande. Støtten bygdafolket, tilflytte og utflytte Fresvikjer på den måten har vist oss er enorm, men det forpliktar også! At me har klart dette kunststykket er det me er mest nøgd med i året som har gått.
Planen har ellers heile tida vore at kvar av gruppene frå Framtidsverkstaden skulle arbeida med sine prosjekt, med Bygdalaget som ein aktiv koordinator og samordnar. Dette har til ei viss grad fungert, sjølv om ikkje alle gruppene og/eller deltakarane har vore like aktive. Bygdalaget må også ta litt sjølvkritikk for ikkje å pusha på meir og/eller arrangert oppsummerande møter. Vonleg kan få betra dette i siste år av bygdeutviklingsprosjektet.
Representantar frå Bygdalaget har ellers delteke på Bygdeforum 2010, 28.-30.mai i Botnane/ Årebrot. Det var ei flott oppleving som gav inspirasjon til vidare arbeid. På seminaret fekk me fortalt om deira Bygdeutviklingsprosjekt og kor mykje pengar dei hadde klart å generera; målet vårt må vera å slå dette ;).
Me vil takka så mykje for støtten også i år 2010, og gledar oss til 1 år til i programmet!
Fresvik Bygdalag v/ Marianne Bøthun - leiar