O Music Way tomará este ano o relevo do Rock in Way, apostando por darlle continuidade a un festival rock de primeiro nivel en Galicia. Celebrarase o venres 28 e o sábado 29 de setembro no Recinto Feiral de Amio, en Santiago de Compostela, e vaino facer cun cartel encabezado por dúas espectaculares bandas de rock: os combativos e incombustibles Manic Street Preachers e os enérxicos The Hives. Os galeses levan máis de dúas décadas regalándonos algúns dos mellores himnos do rock alternativo británico, mentres que os suecos son uns dos principais responsables do rexurdir do garaxe-rock no século XXI. Encabezan un cartel que se completa con The Courteeners, Layabouts ou os galegos Heredeiros da Crus, Holywater, Maryland, Munich e The Cornelius, ademais dalgunha sorpresa internacional por confirmar. Ademais achegámonos á cultura urbana con cursos, exhibición e campionato de skate e longskate con Wahrld Street. Venres 28 de setembro Sábado 29 de setembro MANIC STREET PREACHERS THE HIVES THE COURTEENERS HEREDEIROS DA CRUS HOLYWATER – MARYLAND LAYABOUTS – MUNICH – THE CORNELIUS e máis... INDEPENDANCE DJS e máis... Abonos de dous días xa á venda: 19,99 € + gastos de distribución Puntos de venta: Red Ticketmaster : www.ticketmaster.es, 902 15 00 25, Halcón Viajes, Carrefour Viajes, FNAC, Gong Discos, Tiendas Tipo / Novagalicia Banco : www.novagaliciabanco.es Santiago: Cidade da Cultura de Galicia, A Reixa Tenda, Pub A Reixa / A Coruña : Discos Noni's / Pontevedra: Hiper Froiz / Vigo: Discos Elepé /Ourense: Peggy Records / Lugo: Don Disco / Vilagarcía de Arousa : Hiper Froiz PROGRAMACIÓN INFANTIL O Music Way crea este ano unha dobre conexión: cos nenos e nenas e coa Cidade da Cultura. Será a través dunha programación especialmente deseñada para o público infantil. O sábado 29 de 16 a 20 h celebraranse concertos, talleres e outras actividades relacionadas coa música e dirixidos a nenos ata 14 anos. Unha experiencia coa que contaxiar aos máis novos do espírito da música e facelos partícipes do proceso creativo. Sábado 29 de setembro, de 16h a 20h Actuacións Actividades BRODAS Taller de dj * Composición musical en directo * Aquófono ALONDRA BENTLEY * Karaoke * Taller de construción de instrumentos MAMÁ CABRA reciclados * Customización de camisetas * Taller de fotografía musical * Audiovisuais musicais Entrada gratuíta. Actividades para todas as idades. MANIC STREET PREACHERS Guitarras afiadas e actitude combativa polos mestres do rock made in Gales Son de Gales e levan máis de dúas décadas regalándonos algúns dos mellores himnos do rock alternativo británico. O seu son as guitarras afiadas, as letras con forte contido social e unha actitude combativa próxima ao punk. James Dean Bradfield (guitarra e voz), Sean Moore (batería) e Nicky Wire (baixo e voz) formaron Manic Street Preachers en 1986 e seis anos despois revolucionaron o panorama musical británico co seu primeiro disco, Generation Terrorists. Sucedérono outros nove álbums e unha chea de cancións indelebles que fan deles iconas musicais de Gran Bretaña. Acaban de editar un disco que percorre toda a súa carreira: National Treasures (Columbia 2012); unha compilación de todos os seus singles que inclúe auténticas pezas mestras do rock de guitarras, como “If You Tolerate This Your Children Will Be Next”, “Suicide Is Painlesss”, “Motorcycle Emptiness”, “La Tristesse Durera”, “A Design For Life”, “You Love Alone Is Not Enough”, “You Stole The Sun From My Heart” ou “This Is The Day”. Temas que brillan como nunca nos seus intensos directos. www.manicstreetpreachers.com www.youtube.com/watch?v=cX8szNPgrEs THE HIVES A enerxía dun dos grandes grupos de garage rock do século XXI Podes sentir os refachos de vento quente sobre a túa cara? É a música de The Hives. O grupo sueco de garage rock regresou este verán co seu novo disco: Lex Hives. Doce cancións intensísimas tocadas en pouco máis de 30 minutos. Non son ese tipo de cancións que soarían igual de ben tocadas cunha guitarra acústica xunto á fogueira. Isto non é música: é un pedazo de carbono escondido na cortiza terrestre durante millóns de anos e descuberto agora para ser colocado nos teus tímpanos. The Hives é unha das bandas responsables de pór no século XXI no ollo do furacán musical o rock garaxeiro. Howlin' Pelle Almqvist (voz), Nicholaus Arson (guitarra), Vigilante Carlstroem (guitarra), Dr Matt Destruction (baixo) e Chris Dangerous (batería) formaron o grupo en 1993 en Fagersta (Suecia). No 97 lanzaron o seu álbum de debut Barely Legal, un trallazo que atravesou a comunidade punk como unha locomotora fóra de control. Despois veu Veni Vicious Vidi, e o gran éxito internacional de temas como "Hate To Say I Told You So", "Main Offender", "Supply and Demand" e "Die Alright!”. Con Tyrannosaurus Hives e The Black and White Album seguiron sementando a súa discografía de cancións potentes nas que chocan o garage, o glam, o punk e grandes doses de enerxía para saltar ao ritmo dos seus poderosos riffs de guitarra. En Lex Hives volven reinventarse sen perder un gramo de potencia con temas tan pegadizos como “Go Right Ahead” e “Come On!”. www.thehivesbroadcastingservice.com http://www.youtube.com/watch?v=ngiSiPAtlzY THE COURTEENERS A banda de indie rock que entusiasma a Morrisey The Courteeners naceu en 2006 en Middleton, nos arredores de Manchester. Fórmana catro amigos que se coñecen desde os dez anos: Liam Fray (voz e guitarra), Michael Campbell (voz e batería), Conan Moores (guitarra) e Mark Cuppello (baixo). O boca a boca popularizounos desde os seus primeiros concertos nos locais de Manchester ata o lanzamento do seu primeiro disco: St. Jude (2008). En 2010 publicaron o segundo álbum: Falcon. No medio veu o recoñecemento por parte de Morrisey, que en varias ocasións gabou a súa música: “The Courteeners teñen cancións moi boas e potentes”. Con Morrisey xiraron por Estados Unidos, pero non foi o único grande que os sinalou: tamén Noel Gallagher contou con eles para un concerto benéfico no Royal Albert Hall. Da calidade dos seus concertos dá boa conta o dvd que editaron hai uns meses: Live At The MEN Arena, no que recollen un concerto de decembro de 2010. Un ano despois tocaron durante tres días seguidos en Manchester e venderon 10.000 entradas en só 12 minutos. A proba de que o seu directo é unha experiencia poderosa. www.thecourteeners.com http://www.youtube.com/watch?v=TJFUWapnr3s HEREDEIROS DA CRUS O regreso do grupo máis emblemático e descarado do rock en galego Volveron aos escenarios no 2012 para celebrar o seu 20º aniversario e compracer os milleiros de fans que desde hai anos viñan reclamando o seu regreso. Por iso non podían faltar no Music Way. Os autores de éxitos como 'Que jallo é', 'Íscalle Lura' ou 'Non quero nada de ti' están de volta para dalo todo e "josar" como nunca. Na formación militan os catro heredeiros: Tonhito de Poi, Javi Maneiro, Tucho e o Jran Fran, que desde o ano 2004 non tocaban xuntos. Heredeiros da Crus nacen en Castiñeiras, en Ribeira (A Coruña) en 1992. Dous anos despois publican o seu primeiro disco, 'A Cuadrilla de Pepa a Loba'. As letras descaradas e divertidas, as guitarras poderosas, o falar natural, con gheada e seseo, e a actitude provocadora e irreverente, fixeron dos Heredeiros todo un símbolo para milleiros de galegos e galegas dos anos 90 famentos de música e cultura coa que identificarse. A súa música seguiu gañando adeptos en discos posteriores como 'Está que te cajas!!' ou 'Erecsiones munisipales'. O seu regreso aos escenarios prodúcese por aclamación popular. www.heredeirosdacrus.com http://vimeo.com/38079706 LAYABOUTS Rock a secas, sen poses forzadas nin artificios retóricos Desde os seus comezos, Layabouts levan a sinceridade por bandeira no seu compromiso coa música. Algo que afianzan e acentúan co seu terceiro disco: 'Savage Behaviour' (2011). Nos comezos ('Layabouts', 2007) a banda recolleu os himnos primarios entre guitarras e sintetizadores. Logo '... And They Ran Into The Woods' (2009) escureceu e enrabietou o seu son da man do produtor Kaki Arkarazo, con quen repiten en Savage Behavior (2011) para alcanzar unha nova dimensión sonora e de madurez nun álbum cuxa primeira virtude é que se fai curto. As súas 10 cancións, directas e concisas, convencen na inmediatez. Layabouts nace do encontro de catro novos madrileños que en 2005 forman unha banda de pop guitarreiro, cunha clara influencia británica. Nas súas cancións o protagonismo téñeno as melodías vocais e os riffs de guitarra. Como principais influencias adoitan nomear a Joy Division e os grupos americanos de garaxe dos 70, aínda que é fácil recoñecer as raíces nos clásicos dos 60 e as grandes bandas do rock. Así, podemos percibir aromas a Beatles, Kinks, The Who ou ata The Cure nas súas cancións. Tamén teñen os seus referentes na música actual e non dubidan en mostrar a súa admiración por bandas como The Killers, Bloc Party, The Bravery, The Kooks, We are Scientist, Arctic Monkeys... www.layaboutsband.com http://www.youtube.com/watch?v=WCkQNAsjuvI HOLYWATER Depredadores do son, salvaxes e emocionantes Holywater é xa un nome propio no rock feito en Galicia. Letras en inglés, música apaixonada coa que é fácil empatizar, e a voz de Ricardo Rodríguez, son os ingredientes principais dun cuarteto de Lugo que completan Martín Alonso (guitarra), Luís Casanova (batería) e Mito (baixo). 'The Path To Follow' (2010) é o seu cuarto traballo despois de 'Handle With Care' (2002), 'Sides' (2004) e 'Tranquility' (2008). Escoitar un disco de Holywater é como ver un documental de animais salvaxes. Un documental en alta definición no que observar con todo detalle a axilidade dos movementos dos depredadores, a crueza coa que se lanzan a por as súas vítimas, sentir que o sangue case nos salpica desde a pantalla. Así son as cancións de 'The Path To Follow': a forma de ter nun soporte doméstico a enerxía e a fereza coa que un león se abalanza sobre unha gacela, sentir na contundencia da base rítmica o latexado do cazador, darnos a volta porque as guitarras ou un crebo da voz fannos sentir que o perigo está moi preto, que se nos vai botar enriba.