Saksframlegg

Sakshandsamar: Kristian Losnegard Karlsen Arkiv: Arkivsaksnr.: 16/1837-6

Utleige av kaihuset til fjell- og fjordsportssenter

* Tilråding:

Sogndal kommune inngår leigeavtale med Sogndal fjell- og fjordsportssenter i samsvar med vedlagd utkast til avtale.

Vedlegg:

Utkast til leigeavtale

Saksutgreiing:

I økonomiplanen for 2016-2019 heiter det:

10 på topp: • Vi skal i samarbeid med frivillige organisasjonar og grunneigarar satse på nyskapande friluftsliv i samsvar med arealdelen av kommuneplanen og ruste opp kaihuset som ein samlingsplass for friluftslivmiljøet i Sogn.

Under investeringar: «Kaihuset som fjell- og fjordsportssenter Kaihuset har dei siste åra blitt nytta som treffpunkt og formidlingssenter for aktivitetsturisme. Det har vore initiativ overfor kommunen som ønskjer å utvikle kaihuset til eit fjell- og fjordsportssenter. Ei slik utvikling vil passe bra som del av utbygging av fjordstien og samsvarer med kommunen si profilering av nyskapande friluftsliv. Skal kaihuset nyttast til dette føremålet må det gjerast fleire bygningsmessige tiltak. Før tiltak kan gjennomførast bør det gjerast ei vurdering av huset og sukkerlageret. Vi vil i 2016 søkje om INU-midlar til å gjennomføre vurdering og utbetring av kaihuset. Vi vil også nytte 300 000 frå avkastinga frå Kraftfond II til dette tiltaket i 2016. I tillegg vil det bli søkt om anna finansiering.»

Vi søkte INU om 1,5 mill. i støtte for 2016, og fekk ei løyving på 750 000,- kroner. Vi ønskjer å fremja søknad for 2017 for dei resterande 750 000,-.

Kaihuset er på 337 m2 BRA, pluss eit lager på 148 m2. Vi har i år fått gjort ei vurdering av tilstanden for kaihuset og ei moglegheitsstudie for korleis bygningen kan utviklast til eit fjell- og fjordsportssenter. Denne studien viser at kaihuset har potensialet til å bli eit fell- og fjordsportssenter. Vi gjer no ei vurdering av kostnadene ved ombygging av kaihuset til eit slikt senter.

Vi har vore i drøftingar med Sogndal fjell- og fjordsportssenter AS (SFF) om inngåing av ein leigeavtale mellom kommunen og SFF. Desse drøftingane har enda med eit utkast til ein leigeavtale. I utkastet heiter det m.a.:

«Kommuneplanen, arealdelen, har urbanisering og nyskapande friluftsliv som strategisk føring. Sogndal fjell- og fjordsportssenter ønskjer å utvikle kaihuset, til ein møteplass for det nyskapande friluftslivet og formidling av aktivitetsturisme. Denne avtalen omhandlar rammene for leige av lokale til fjell- og fjordsportsenter i kaihuset i Sogndal kommune og utvikling av dette arealet.»

Rådmann har fullmakt til inngå leigeavtale for utleige av kommunal eigedom. Sidan det har vore politiske spørsmål om utleige av kaihuset, vel rådmann å leggje denne saka fram for politisk handsaming. SFF har stadfesta at dei er interesserte i å inngå ein leigeavtale i samsvar med vedlagde utkast.

Vurdering: I tråd med kommuneplanen for nyskapande friluftsliv og i tråd med økonomiplanen om utvikling av kaihuset til eit senter for fjell- og fjordsport vil rådmannen rå til at kaihuset vert leigd ut til Sogndal fjell- og fjordsportssenter på dei vilkåra som går fram av utkast til leigeavtale. Eit slikt senter vil legge til rette for auka aktivitet knytt til fjorden, og bidra til sentrumsutvikling i den del av sentrum. Eit fjell- og fjordsportssenter vil inngå som ein naturleg del av fjordstien og eit slikt senter vil styrkja reiselivet ved å tilby aktivitetsbaserte opplevingar.

Økonomisk vil leigeavtale gje inntekter som er litt høgare enn dei budsjetterte inntektene frå kaihuset og dagens inntekter frå huset. Leigeprisen er sett til kr 21 000,- pr. mnd, noko som gjev ei årsleige på 252 000,- kroner. Årleg kan 48 000,- av desse nyttast av leigetakar til opprusting og vedlikehald av bygningen. Leiga pr. m2 er om lag 750,- kr., noko vi vurderer å vera i samsvar med marknadsleiga for ein bygning med denne kvaliteten i dette området.

Det er viktig for SFF å ha ein langsiktig leigeavtale for å kunne utvikle kaihuset i tråd med målsetjinga. Leigeavtalen går difor fram t.o.m. 2042. I leigeperioden er oppseiingstida 12 mnd. SFF ønskjer å kunne utvikle kaihuset i leigetida. Vi har difor teke inn følgjande formulering i utkastet til leigeavtale:

«Det er ein intensjon at leigetakar sine bidrag inn mot oppgradering av og verdiauke på bygningsmassen skal godskrivast Sogndal Fjell- og fjordsportssenter. Årleg skal det utviklast ein enkel rapport signert av utleigar og leigetakar som vert vedlegg til Sogndal Fjell- og fjordsportssenter sitt rekneskap. Her skal leigetakar sitt samla bidrag til oppgradering av og verdiauke føregåande år kome fram fordelt på kontante bidrag, materiell og dugnad. Større tiltak (dvs. tiltak med ei forventa kostnadsramme over 100 000) som SFF ønskjer å aktivere for avskriving/refusjon i høve denne avtalen vert avklart med leigetakar før tiltaket vert gjennomførd. Dei ulike tiltaka får og ein avskrivingstid på 10 år. Dersom Sogndal kommune seier opp leigeavtalen i leigeperioden vert nedskriven verdien av bidraga refundert.»

Rådmannen meiner at denne formuleringa gjev ein god balanse mellom det å sikre SFF moglegheita for å utvikle kaihuset til eit fjell- og fjordsportssenter og kommunen sitt eventuelle behov for å disponere kaihuset før 2043.

Rådmannen rår til at kommunen inngår leigeavtale med Sogndal fjell- og fjordsportssenter i samsvar med vedlagd utkast til avtale.

Sogndal 14. okt 2016

Jostein Aanestad rådmann