FJALER Arkiv: K2-N06 JournalpostID: 20/781 KOMMUNE Sakshandsamar: , Ingvard Dato: 28.01.2020

Saksframlegg Ikkje offentleg § 23.1

Saksnr. utval Utval Møtedato 035/20 Kommunestyret 27.02.2020 007/20 Komité for oppvekst, flyktningteneste og kultur 27.02.2020

Nedleggig av skule

Kommunedirektøren sitt framlegg: Guddal skule vert lagt ned frå 01.08.2020. Guddal skulekrins vert lagt under Flekke skulekrins frå same dato. Dei tilsette vert ført over til andre stillingar i kommunen. Saka vert sendt ut på høyring med høyringsfrist måndag 06.04.2020, med endeleg vedtak i kommunestyret 23.04.2020.

27.02.2020 Komité for oppvekst, flyktningteneste og kultur

Handsaming: Komitéen støtta kommunedirektøren sitt framlegg.

KOFK-007/20 Vedtak i: Komitéen sitt framlegg til kommunestyret: Guddal skule vert lagt ned frå 01.08.2020. Guddal skulekrins vert lagt under Flekke skulekrins frå same dato. Dei tilsette vert ført over til andre stillingar i kommunen. Saka vert sendt ut på høyring med høyringsfrist måndag 06.04.2020, med endeleg vedtak i kommunestyret 23.04.2020.

27.02.2020 Kommunestyret

Handsaming: Det vart samrøystes vedteke å handsame saka i lukka møte i medhald av ofl. § 23.1. Røysting: Kommunedirektøren sitt framlegg vart samrøystes vedteke.

KOM-035/20 Vedtak i: Guddal skule vert lagt ned frå 01.08.2020. Guddal skulekrins vert lagt under Flekke skulekrins frå same dato. Dei tilsette vert ført over til andre stillingar i kommunen. Saka vert sendt ut på høyring med høyringsfrist måndag 06.04.2020, med endeleg vedtak i kommunestyret 23.04.2020.

Saksutgreiing: Elevtalet på Guddal skule har gått dramatisk ned dei siste åra. Tidlegare var elevtalet oftast mellom 15 og 20. Skuleåret 2018/19 var det 17 elevar på skulen, elevtalet dette skuleåret er 10. Neste skuleår er det, ut frå det vi veit i dag, att 4 elevar. Barnehagen vart lagt ned for 2 år sidan, grunna at det var for få barn til å oppretthalde den. Slik fødselstala ser ut i dag, så er det ikkje grunnlag for barnehagedrift dei næraste åra. Fleire foreldre som har elevar som høyrer til Guddal skulekrins har søkt barna til Sande skule og til Flekke skule. Dette gjeld eit fåtal elevar. Søknadane har dei av forskjellige grunnar fått innvilga. Søknad til Sande skule i Gaular kommune (no kommune) vart først ikkje imøtekome, men etter klage innvilga formannskapet søknad.

Sidan september 2019 har vi hatt 2 møte på Guddal skule der foreldre, rektor og kommunalsjef oppvekst har delteke. Temaet har vore framtida til skulen. Begge møta har vore etter initiativ frå FAU Guddal skule. Leiar i FAU har vore møteleiar. Dette har vore saklege og gode møte. På første møtet var det meiningsutveksling, spørsmål og svar om framtidsutsiktene til skulen, samt kva som kunne gjerast for å få ned reisebelastninga. På siste møtet i januar 2020 var temaet i hovudsak skyss og skyssproblematikk. Korleis få ned den auka reisebelastninga for elevane?

Ut frå det vi veit i dag så vil det frå hausten vere 4 elevar på Guddal skule. Pedagogisk, fagleg og sosialt ser vi det som lite hensiktsmessig å oppretthalde tilbodet. Det pedagogiske tilbodet kan vere godt sjølv om skulen er liten, men når elevtalet er så lite som det blir her, så får elevane få utfordringar i høve det å måle seg opp mot andre, samt det å lære å samarbeide med andre. Sosialt så kan miljøet bli for lite til at elevane får naudsynte utfordringar og erfaringar i det å knytte sterkare og fleire kontaktar med elevar på same alder.

Guddal skule har for tida 2 tilsette. Siste året har skulen hatt meir administrasjonstid enn normen for administrasjonstid. Dette for å sikre at det er 2 tilsette på skulen mesteparten av tida. Til hausten vil behovet for lærartimar bli endå mindre. Med få tilsette vil det ikkje alltid vere mogleg å oppfylle krav til kompetanse og faglegheit, samt at det faglege og sosiale fellesskapet for dei tilsette vert lite. Elevane skal sikrast tilstrekkeleg kompetanse i alle fag og emne. Skulen har og ansvar for å ivareta elevane sine eventuelle behov for spesial- og sosialpedagogisk karakter. Det kan i enkelte tilfelle vere vanskeleg med få tilsette. Begge tilsette har faste stillingar i kommune, med for tida arbeidsstad Guddal skule. Dei er sikra jobb i kommunen, og vil bli følgde opp på vanleg måte i høve endring av arbeidsstad.

Det vil bli lang skuleveg for elevane om skulen på Guddal vert lagt ned. For dei som får lengst veg vil, slik skyssrutene er lagt opp i dag, skysstida til Flekke bli ca. 55 minutt kvar veg. Her er det start på Heggheim kl. 07.35, bussen er i Flekke ca. 08.30 og i Dale ca 08.45. Vi er i dialog med fylkeskommune, der vi ser på løysingar på å få ned skysstida. Vi har enno ikkje gjort noko endeleg avtale. Fylkeskommunen har vore løysingsorienterte og har kome med forslag om å skysse barneskuleelevane med eigen buss til Flekke, med start på Heggheim kl. 07.50 og køyre Nordsidevegen. I dag køyrer skulebussen sørsida om Hovlandsdalen. Det er foreslått tilførsleskyss til dei elevane som ikkje bur langs med vegen. Skysstida vil då bli ca 40-45 minutt ein veg. Fortsatt er skysstida lang, men den vil vere innafor akseptabel reisetid. På foreldremøtet vart det poengtert at det var viktig å få ned skysstida, også for elevane på ungdomsskulen. Vi har teke det vidare til skyssavdelinga, og dei arbeider med det. Om ein har alle elevane inn i ein buss kunne det gått, men Firda billag vil ikkje kunne køyre med stor buss på Nordsidevegen. Vi vil få eit forslag frå skyssavdelinga før kommunestyremøtet i februar. Eit anna punkt som nokre foreldre tok opp var at det var ynskeleg med rutebuss/skyss til Sande. Reisetida frå Heggheim til Sande med privatbil er normalt ca 25 minutt. Vi kjøper i dag elevplass til nokre elevar i Sunnfjord kommune. Kjøp av elevplass i annan kommune kostar utan tillegg i underkant av 100 000/år. No har foreldra ansvaret for skyss sjølve. Skyssavdelinga hjå Vestland fylkeskommune seier det er usannsynleg at det vert sett opp skyssrute den vegen.

Vurdering: I Guddal skulekrins vil det frå hausten vere få elevar. I tillegg til at elevgrunnlaget har blitt mindre dei siste åra, har fleire foreldre søkt andre skular for borna sine. Vi vurderer det slik at med det elevgrunnlaget som er frå hausten, så er det ikkje grunnlag for å oppretthalde skulen. Guddal skule vert difor foreslått lagt ned frå 01.08.2020, samt at Guddal skulekrins vert lagt under Flekke skulekrins frå same dato. Saka vert sendt ut på høyring, med endeleg vedtak i kommunestyremøtet i april.