Uttale Frå Vest-Jotunheimen Villreinutval Angåande Øvingsplan for Luster Røde Kors Hjelpekorps-2017-2019
Total Page：16
File Type：pdf, Size：1020Kb
Til Dato: 24.01.2017 Luster kommune v/Inger Moe Uttale frå Vest-Jotunheimen villreinutval angåande øvingsplan for Luster Røde Kors Hjelpekorps-2017-2019 Vest-Jotunheimen villreinutval er ein samanslutning av grunneigarar i villreinområdet. Utvalet består av tre styremedlemmar frå Luster kommune og tre styremedlemmar frå Årdal kommune. Leiar i villreinutvalet er Vidar Moen. Villreinutvalet har ansvar for organisering av rettshavarane, bestandsforvaltning, og skal fungere som kontaktorgan mellom rettshavarane og myndigheita, samt arbeide med forvaltning og bevaring av villreinens leveområde. Villrein er ein nomade som treng store fjellområde for å overleve, og Noreg, som einaste landet med villrein i Europa, har eit har eit internasjonalt ansvar for å forvalte villrein slik at også framtidige generasjonar kan få oppleva levedyktige bestandar av villrein. Villreinstamma i Vest- Jotunheimen har vært prega av sjukdom dei seinare åra, og det er derfor viktig å ta vare på leveområda til villrein. Heile villreinstamma i Vest-Jotunheimen har vinterbeite i frå fjellvegen/Tindevegen-Nosafjellet. Villreinbukkane trekk ut av dette området i byrjinga av september, og kjem attende til området i november. Simler og ungdyr er i området frå om lag november til midten av april, og trekk då utover mot kalvingsområdet. Villreinutvalet for Vest-Jotunheimen ser at den samla belastninga av menneskeleg aktivitet kan verta særs stor i delar av vinterbeiteområdet. Villreinutvalet kjem også til å ta kontakt med diverse aktørar som har interesser i dette området for å informere og prøve å finne gode løysingar for å ta omsyn til villreinens beiteområde og trekkvegar. Det er av villreinutvalets generelle oppfatning at ein ynskjer minst mogleg motorisert ferdsel i villreinområdet, og viser til kommunale retningslinjer knytt til «Nasjonal forskrift for bruk av motorkøyretøy i utmark og på islagde vassdrag» jf. Punkt 1 «.. skal det takast omsyn til trekkvegar, beite- og kalvingsplassar for villrein, samt andre viltinteresser». Vest-Jotunheimen villreinutval finn forslag til øvingsplanen for Luster Røde kors hjelpekorps til å være av stort omfang, og kjem med framlegg om korleis ein kan ta i vare villreinens interesser på best mogleg måte. Villreinutval forventar at tall snøskuterar nytta i området vert halde på eit minimum, og ynskjer ikkje at øvingar vert lagd til villreinområdet. Vidare ser ikkje villreinutvalet behovet for at andre hjelpekorps enn lokale hjelpekorps som Luster, Lom og Skjåk Røde Kors treng å gjere seg kjende med området. Det er ynskjeleg frå utvalet side at Sognefjellsvegen vert nytta som traseval så langt som råd ved turar inn mot Sognefjellet og Breheimen. Vest-Jotunheimen villreinutval ynskjer å ta vare på eitt av dei siste nærmast urørte vinterbeiteområdet i forvaltningsområdet, Rya-Gjesingefjellet-Nosafjellet. Dette området er i motsetning til Hurrungane ikkje prega av stor menneskeleg aktivitet, og kan verke som eit «friområde» for villrein. På grunnlag av dette reagera villreinutvalet sterkt på at tilsyn og vedlikehald av VHF-repiter på Steinanosi skal gjerast på vinteren, og i den perioden villrein normalt beitar i området. Villreinutvalet viser til blant anna bygging av basestasjon for naudnett, i forvaltningsområdet til villrein, kor det er sett vilkår til motorisert ferdsel i høve villrein: «Helikopter eller anna motorisert framkomstmiddel skal ikkje nyttast til etablering og seinare vedlikehald av basestasjonen når det er rein i området, til vanleg, i tidsrommet sein haust og tidleg vinter» Villreinutvalet meina at dette også bør gjelde for Luster Røde Korps Hjelpekorps, og håpar at dei heller kan sjå i retning Hydro Energi angåande samarbeid om transport. Villreinutvalet ser at trase val for å kome til Stølsdalen bør være å ta seg fram langs med Sognefjellsvegen, for så å kome inn frå aust og deretter ned til Stølsdalen, då tidlegare erfaring har vist at dette er ein mogleg trase. Dette lar området Gjesingefjellet-Nosafjellet i stor grad få være i fred for motorisert ferdsel. Vidare ser villreinutvalet at det er søkt om diverse kjentmannsturar. Utvalet ser ikkje at det er eit behov for at nabokorps frå Hafslo og Sogndal Røde Kors skal være med, då det er Luster Røde Kors som har hovudansvaret for dette fjellområdet. Villreinutvalet ser heller ikkje at det er behov for å trene direkte på flatt lys, mørkt/natt og kraftig vind i villreinområdet, og håpar at denne typen øving kan gjerast utanfor villreinens beiteområde og trekkvegar. Villreinutvalet viser blant anna til at Berdalen er eit område som villreinen brukar mykje ved trekk på veg innover mot Sognefjellet, og når flokkane trekkjer utover att mot Årdalshalvøya. Utvalet håpar at det ikkje vært lagt til rette for øvingar i områder som kan hindre villreinstrekka. Vest-Jotunheimen villreinutval viser til rutene under og håpar at det vert satt som villkår at Luster Røde Kors Hjelpekorps skal ta kontakt med oppsynet 4-5 dagar før planlagde turar langs desse rutene, for at oppsynet skal ha moglegheit til å finne villrein, og gje attendemelding på kor villreinen oppheld seg. Dette har villreinutvalet tru på at vil hjelpe til å få eit endå betre samarbeid for å ta vare på både villreinens og menneska si interesse i området. Turtagrø-Steinanosi Turtagrø-Berdalen Turtagrø-Steindalsnosi-Fanaråkbreen Turtagrø-Skagadalaen-Ringsdalen-Soleibottentind Turtagrø-Olavsbu Turtagrø-Skogadalsbøen Turtagrø-Kongsdalsnosi Turtagrø-Stølsdalen Helsing Vidar Moen Aina-Elise Stokkenes Leiar i Vest-Jotunheimen villreinutval Oppsyn Kopi til: Fylkesmannen i Sogn og Fjordane Sogn og Fjordane villreinnemd Jotunheimen nasjonalpark Vest Politidistrikt Årdal kommune Elektronisk signert og godkjend av leiar i Vest-Jotunheimen villreinutval. .