ASO LUA, 26 IANUARI 2021

Na nofoia e le Fofoga Fetalai le Nofoa i le itula e 9:20 i le taeao.

Tatalo.

FOFOGA FETALAI: Ou te faasilasila atu ua toe amatalia Taualumaga ma Galuega a le Fono Aoao Faitulafono. Ia, malo le soifua ma le lagi e mama i lenei taeao fou. Ou te manatu ua maua le malosi e faaauauina ai le tatou galuega i lenei foi vaiaso.

TULAFONO TAU FAAOFI O LE FAATATAUINA O TUPE FAAOPOOPO (NU.1) – felafolafoaiga faaauau i luga o le faitauga faalua – Aso 5

FOFOGA FETALAI: E tolopo Galuega a le Fono Aoao i le vaiaso ua tuanai, o lo o saunoa le sui usufono mamalu mo le Itumalo Faaalaalafaga o Faleata Sasae. Ma lou faaaloalo, ou te tapa lau Afioga e faaauau lau saunoaga.

Afioga SALAUSA JOHN AH CHING (Faleata Sasae): Faafetai i lau Afioga i le Fofoga Fetalai mo le avanoa. E faatalofa atu foi i lenei taeao fou i faguga lelei ua maleifua mai ai le paia maualuga o le Palemene i lenei aso. E ui lava o le aso ananafi sa falelauasi ai se tasi o sui sa tautua ma auauna i totonu o le tatou Palemene i aso ua mavae, ae le faaitiitia ai lo tatou faatuatua i lo tatou Atua. A o Iesu lava na fetalai, “E tele avanoa i le fale o lou Tama tatou te nonofo ai.” O le mea lea, ia, tau ia ina mapu atu lona agaga i aao agalelei o lo tatou Matai Sili i le lagi. A o lenei taeao fou, ia o le a agai loa se faamatalaga i le matou itumalo o Faleata Nu.1. Ia pei lava ona ou taua i le taimi ua fano, e lua nuu mavae i lenei itumalo, ae 13 nuu paia ma alaalafaga paia i totonu ole itumalo lenei o Faleata Nu.1. I si ou nuu i Vaimoso e susu ai Mataia o le Tama a le Fale, e afifio ai foi Usoalii ma le Matua ia Patauave, alaalatai ai oulua igoa Matua Tomaagauaune ma Manuleleua, susu ai foi Nofo a Tama ma le Matua ia Toala ma Tiufea ma le Malae.

1201

E faapea foi si ou nuu faapelepele o Lepea e afio ai Faumuina o le Tupufia. Afifio Usoalii ma Tamapaa, afio ai Leota ma Taneolevao, alaalatai oulua vae o le Nofoasa ia Aii ma Vaitagutu ma lo oulua Vaifale, le mamalu ia te oe le Falelima ma le Falevalu o le Tagatanoa, alaalatai le Tauaitu ma Saofaiga ma Atua. O alaalafaga paia nei o lenei itumalo, e amata atu i Moamoa, Moamoa-fou, Moamoa-tai, Moamoa-mauga, Sinamoga, Alafua, Vaitoloa ma Fatipule, Pesega, Lotopa, Tuanaimato, Seesee, Tuaefu ma Ululoloa. E afifio ai tupu ma ee o le atunuu, afifio ai tama faifeau ua malolo manumalo ma o latou faletua, e afifio ai foi le paia o le Kapeneta, Afioga i le Palemia ma nisi o Minisita o le Kapeneta, e afifio ai foi nisi o alii ma tamaitai sui usufono o le Maota lenei, e afio ai foi le Tama a Aiga ma le Masiofo. E afifio ai foi alii ma tamaitai o Faamasino o le Faamasinoga a Samoa, afifio ai alii ma tamaitai fomai, o alii ma tamaitai loia, o alii ma tamaitai inisinia, o alii ma tamaitai e tusia mea ia o grants, tasi lea mea ua manaomia tele e le tatou itumalo, o le au tusi grants. E afifio ai foi CEO ma ACEO a le tatou Malo, ia ma pisinisi ma Matagaluega tumaoti, e afifio ai foi le mamalu o le aufaipisinisi ma i latou e nafa ma galuega tetele o konekarate. O Ulu Aoga ma Faiaoga, atoa ai ma le aufaigaluega atoa o le tatou Malo, ma nisi o aufaigaluega i pisinisi tumaoti, ae tainane le tapuaiga a tama ma tina matutua ma le loaloa o lenei itumalo. Ia o paia na o le tatou itumalo o Faleata malosi Nu.1. O se taimi ona ou oo atu lea i manaoga faapitoa o le tatou itumalo. A o lenei taimi, e fia faaleoina lava le agaga o le faamalo ma le faafetai i le tatou itumalo i nei tausaga sa tatou mafuta ai. Ina ua ou tulai mai i lenei tofi, sa lilo i manatu pe tua ma ni a, pe soua pe o le a malu le faiga o lenei faiva. Ae peitai ane, e amata mai le taimi ina ua matou mafuta ma le itumalo, o se mafutaga ua sili ona mafana, o se mafutaga foi e ese le fealofani ma le feavatai. Ma e atonu o le mea foi lea ua faigofie ai ona amata faiga faavae e atinae ai le itumalo. O le faiga faavae muamua lea ua mautu i totonu o le itumalo, o le Komiti o le Atinae o le Itumalo. O tulaga ia sa faamaitemea ai le tatou Faigamalo, aemaise le Matagaluega o Tina ma Tamaitai, Atinae o Nuu ma Alaalafaga ma Agafesootai, ua soo uma itumalo o le tatou atunuu, se i vagana ai e tasi le itumalo o lo o totoe i Savaii, ina ua toe faalava mai le faamai o le Koviti- 19, ua mafua ai ona le maea ona faatino. Ae o le isi lenei faiga faavae ou te iloa ua matua lelei ma atoatoa mo le atinaeina o le tatou atunuu. Sa ou taua i le taimi ua fano mea ia o lo o talanoa mai ai Malo Aufaatasi o sustainable development goals, po o manaomiaga po o sini faamoemoe o atinae e faaauau pea. Ma o i i le tulaga lea e mafai ai e Samoa ona ausia le faamoemoe lea ma ausia sini ia a le lalolagi ua uma ona tatou sainilima ai. O le isi mea taua tele i le district development plan po o le taiala lea o atinae o nuu ma alaalafaga…

1202

FOFOGA FETALAI: Malie le sui usufono mamalu o lo o saunoa se i tulai mai le sui usufono mo Salega Sasae pe i ai se mea o fia faauilavea ai.

Tofa Olo Fiti Afoa Vaai (Salega Sasae): Lau Afioga i le Fofoga Fetalai, o se mea e fia malamalama. Faafetai i lau Afioga i le Fofoga Fetalai. E nofonofo lava ma matau atu i tulaga o le tatou Fonotaga, ona e malamalama pe a fesiligia. E faafesili atu lava lau Afioga i le Fofoga Fetalai ou te fia malamalama, i le tulaga o tatou Tulafono Tumau. A matauina i le vaiaso na tea nei, ia o le tai 2 tai 3 itula e sausaunoa ai sui usufono. Po o le mea ua faataatiaese a tatou Tulafono Tumau i le 30 minute e sausaunoa ai i le tulaga o le Tala o le Tupe ma lauga faalauaitele, po o le mea lea ua faatuutalaloa. Ia, e pei o le fesili lena lau Afioga e fia malamalama ai foi lou sui usufono, po o le mea o lea ua tatou toe agai e fai a tatou lauga faataupou. Ia, e pei e fou i lau vaai ma lau faalogologo le vaega lea lau Afioga. O le ala lena o le fesili. Ma lou faaaloalo.

FOFOGA FETALAI: Malo faafetai. Ia, o le tulaga muamua, masalo e pei lava foi ona molimauina i lau saunoaga, sa leai lava se faalavelave ma se faauilavea, ma e maea lelei lou finagalo faaalia aua le itumalo, ia o nai a outou toe saunoaga ia i le faafofoga tapuai mai a itumalo. O mea foi sa faapena ona e lagaina i totonu ma finauina i totonu o le Palemene mo le atinae o le itumalo i lea mea ma lea mea, ma maua foi le avanoa e faafetai ai foi ia i latou o e na aumaia le faatuatuaga, e avea ai lau Afioga ma o latou sui usufono e faaleo o latou foi finagalo i totonu o le Palemene ala i upufai o Malo. E pei o avanoa ia, ae tausi lava le tatou taimi masani. Ae pei o le tele o saunoaga ua maea e faitau eseese ai Tutuila ma Ape e pei o le upu e fai i le usoga ia Aana, ona o faauilavea foi ma faasaoga ma faamalamalamaga a le Malo o lo o faapena foi ona tulai mai e faasao ma faoa ai foi ma faaumiumi ai foi saunoaga a sui usufono mamalu. Ae o lo o saunoa lava foi sui usufono e faaaoga le latou tofamamao, se i alolofa e tausisia pea a tatou Tulafono Tumau. E le o talaloa pe ua tatala le tulaga o a tatou Tulafono Tumau, ae se i saunoa fuafua i a tatou Tulafono Tumau, o le tulaga lena o lea ua 5 tausaga, a o lena lava tou te silafia le tai 30 minute e fua i ai le saunoaga. Ia, aua tasi lea vaega o lo o faapena ona molituina ai le Fofoga Fetalai, o le faapea o lou… ia tau ia le upu tuusao o le faapea, o le tatipi o outou avanoa. Ia, ae leai. E lelei tele le fesili a le Afioga i le sui usufono mamalu, ae pei o le tulaga lena, se i saunoa sui usufono ma… O le tofamamao lava, e le o Tulafono Tumau, a o le tofamamao e sili atu i lo le Tulafono Tumau. Ia, e pei o le tulaga lena ina ia faapea ona faamalie le faafofoga mai a le itumalo. E pei o le tulaga lena Olo, ae… ia, se Salausa, se i fuafua mai i le finagalo o Olo e pei ona…

1203

Tofa Olo Fiti Afoa Vaai: Faafetai tele lava i lau Afioga i le Fofoga Fetalai. Ae o le mea foi lena sa fuafua ai, o le tele foi ia o le matou tapenaga ae sa ta fua lava ma ava atu i le Tulafono o lo o foefoe e lau Afioga, ia o le ala foi lena sa faapuupuu ai le matou lauga ma se matou tala. Ia na ona matou faapena atu o lea ua e saunoa manino, faafetai lava mo le avanoa. Aua o le toatele, o lea faatoa lauga i i, a o le 5 tausaga e le lauga. Ae pei foi lea e faaaoga sese le avanoa lea pei ua tau popole foi lea ona ua uma le Paeaiga e le i faia lava se lauga. Ma le faaaloalo.

FOFOGA FETALAI: Ia, e pei o tulaga na, ae alofa foi i nai uso a sui usufono o la e popole, ae amuia oe e te le o popole, leaga o oe o le toeaina, a o isi uso ia o le matua popole lava. Ia vaai i ai ua paeee i le popole. Ioe. Ua tau maua i le mea foi lea o le fealuai lava, ae o la e te vaai atu ua tautala toatasi ona e mafua mai i luga o le tulaga lena o le popole. Ia, se i saunoa mai le sui usufono mamalu mo Faleata, fua mai i lou afa itula. Ioe, se e leaga foi lou faamanatu atu.

Afioga Hon Lautafi Fio Selafi Purcell (Minisita mo Pisinisi, Alamanuia ma Leipa): Lau Afioga i le Fofoga Fetalai…

FOFOGA FETALAI: Ia, se i tulai mai le sui usufono mo Atinae ma Faalapotopotoga Tumaoti.

Afioga Hon Lautafi Fio Selafi Purcell: Faafetai mo le faamalamalamaga o le tulaga o lo o faafoe ai le tatou Fono lau Afioga, o lena ua manino. O lena foi e silafia e Olo. Ae ua ou tulai atu ona sa taua i le lauga a le sui usufono mamalu o Faleata i Sisifo, e ese le matagofie o le lauga a Faleata lea e fai nei, i lona tulaga atoatoa ma lana ia silasila i lona itumalo, faapea le Matagaluega o Tina ma Tamaitai o lo o nafa ma le atinaeina o tatou itumalo taitasi. Ona sa taua la e le sui usufono mamalu i lana saunoaga i le vaiaso na tea nei lo’u itumalo, faapea sa i ai ni autalavou sa latou o ae fesili, ai o le taimi lea na o ai le Matagaluega e amata ona talatalanoa i taiala nei o itumalo. O le uiga la o lo’u tulai atu ona o lo o faafofoga mai le itumalo, o lea ua i ai le taiala, o lea ou te uuina nei i lou lima - Taiala o le Atinae o le Itumalo o Satupaitea 2019/2029, lea la ua i ai i totonu i i mea sa saunoa i ai le sui usufono mamalu, e atinae ai si ou itumalo. Ia, o se taimi lata mai ona fono foi lea o le Komiti o le Itumalo pei ona taua e le sui usufono mamalu ona faaauau lea o atinae nei. Ma lou faaaloalo.

FOFOGA FETALAI: Faafetai. Ia e uso lava foi ma taiala o le matou nuu, lea pei ona saunoa ma malele le Afioga i le Minisita, ae malo lava faafetai i le Matagaluega i le tau ataina o nei faiga lelei ina ia faapena ona atinae afioaga i nuu ma alaalafaga. Faafetai. 1204

Ia, se i tulai mai le sui usufono e faaauau le saunoaga. Fai fuafua i le lafo a Olo lea na fai mai.

Afioga SALAUSA JOHN AH CHING: Ia, faafetai, o le a ou tautala fuafua foi i le lafo a Olo. O lea ua ou talanoa nei i le matou itumalo, o lea ua faaiuiu foi lau tautalaga. Ae ua ou taua mea ia o Komiti o Atinae o Itumalo, leaga o le mea atoa lava lea e tele lona piitaga i le Tala o le Tupe ma le agai i luma o le atunuu. Ioe. O i e mafua mai ai le lelei o le faafoe. O le mea lea ua taua ia te au i le Taiala o Itumalo ia ua i ai nei, o le mea lea, o lea ua fesili sao lava i le itumalo e tau mai, e saunoa mai, e fetalai mai, o a mea tou te manaomia mo le atinae o outou? O le mea taua lena.

FOFOGA FETALAI: Malie le sui usufono se i tulai mai le Palemia.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi (Palemia): Lau Afioga i le Fofoga Fetalai, o lea tatou te talanoa i le Taiala. E i ai foi le Taiala a le tatou Palemene. Faamolemole lau Afioga, o i ai ni Taiala i mea o sui usufono tuai, e le gata ina tuai mai i Fono le auai i Fono i le tulaga foi lea o le le faamaoni? A faapea loa e fia Fono, o le a le mea e tatau ona fai? O lea o le a iu lava le tatou Fonotaga o tupu lava mea faapea, o mea o sui usufono e le faamaoni i a latou tautoga, ae ua leva ona i totonu o le Maota a o lea e le o auai i Fono pe tuai mai foi ona toe omai lea lagalaga mataupu o lea sa talanoa nei? Ae atili ai le mea o le atagia o le le malamalama, ae avatu sese ai i fafo taualumaga o le Fonotaga. Se faamolemole pe mafai lava ona faamaalo mai Taiala ia a tatou i totonu o le Palemene lenei?

FOFOGA FETALAI: Malo faafetai. Ia, o Taiala masani, ia manatua foi e le Palemene, e lua lava au tusi paia, ia, i sala le gagana vaeatu le Tusi a le Atua, e lua tusi paia faalelalolagi e tufa mai pe a tofia i tatou. E filifili loa e avea ma sui usufono, o le Faavae ma le Tulafono Tumau. O tusi na e muamua tufa mai ia i tatou. Ae o le fesili a le Afioga i le Taitai o le Malo, o le mea muamua, o le tatou Tautoga o le Loto Faamaoni e faatino ai tatou galuega i le Fono. O le a le faamaoni? O le toaga mai i a tatou Fono faa- Palemene ma ia tausisia a tatou taimi. E pei o le tulaga muamua lava lena o le faamaoni, ia afai e le toaga mai, lona uiga e le se sui usufono faamaoni. Lona lua, e ao ona faanoi i le Fofoga Fetalai. Lona tolu, afai e sosoo aso Fono e tolu ae le Fono, e otometi lava ona fai le faaiuga o i ina e taai ai fala, e le toe faipule ai, malolo mai le tofi faipule. Ioe. A o lenei lava e fai i le tulaga aloaia, feavatai. O le ala lena e ala ai ona o ta fai atu, e ui lava i le tatou Tulafono Tumau, ae manatu lava i le tulaga o le tatou aganuu, le vafealoaloai, ae leai lava ni 1205 sui usufono tuai o faapena, pei e… ia, ne i te i ua ta tuuaiina le Nofoa, ae o lena lava tou te silafia, le sui usufono o lo o faapena ona… aua, o si toeaina o Aeau, ia se i silasila i ai, tasi lenei toe Ulutaia ua 80 po ua 90 tausaga o le soifuaga o le toeaina, a o lenei lava e… e tiga lava ona timuga lenei taeao, a o lea lava tatou te mafuta ma le Afioga i le tatou Tama ia Aeau. A o isi sui usufono e moni lava ua leva ae laiti, ia a o lenei a omai, na ona omai lava ua toe 1 le itula pe toe 3 itula ua maea le tatou Fono. Ia ta te musu e faaali atu ne i te i ua faapea ua ou taua se suafa, a o lena. E pei o le tali atu lena i le fesili a le Afioga i le Palemia, ae pei o le tulaga lena lau Afioga.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, e ala ona ou tulai atu ona talu ona ou tulai mai i totonu o le Maota lenei, sa masani ona ou vaai i ai i sui usufono faapea, e na ona omai i le amataga o le Fono ina ia tusia i lalo o tatou faamaumauga o lea sa auai, e le atoa le itula ae toe o, ona o lava lea e le toe foi mai i le Fono. A o le mea lea e tupu i totonu o le taimi lenei lea e fai ai a tatou talosaga i tatou itumalo, e toe filifili e toe omai. A o le a le mea lea e tupu? O lea e fai lava. Le auai i Fono, pe na o le sau lava se i tau ina tusia i lalo toe alu atu ai lava ma alu ai lava.

FOFOGA FETALAI: Ia, se i… e faamalie atu i lau Afioga i le Palemia…

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: O lea e ala ona ou fai atu, ou te fiafia ina ua ou laga le mataupu lea, o lea e pue i ata le tatou Fono, ina ia silasila mai ai le itumalo i le latou sui usufono i le le faamaoni. O le mea foi la lena a saunoa ai i inei saunoa i fafo, na o mataupu lava le malamalama, e le malamalama lava ona o le le auai ma faafogafoga i taualumaga o le tatou Fono.

FOFOGA FETALAI: Ia, ou te faamalulu atu i lau Afioga i le Palemia…

Susuga Hon Laauli Polataivao Leuatea (Gagaifomauga Nu.3): Lau Afioga i le Fofoga Fetalai e fia maua se avanoa.

FOFOGA FETALAI: Malie le sui usufono mo Gagaifomauga Nu.3, ou te faamalulu atu i lau Afioga i le Palemia, aua e pei a… ou te le iloa po o ai a tuuaiina, aua sa… o Fiame lea pei e faapena. O lea lava ua avatu tuusao pe molia i le malu o le tai taeao, a o lea lava e avatu i le agaga tuusao, le Afioga i le Sao Faapito ia Fiame. Ae ou te faitioina foi lau Afioga i le Palemia i lenei 5 tausaga ma le fia sefulu tausaga o Sui Palemia Fiame, ae se i e fautua 1206 ifo foi i ai? Fautua ifo i ai i le taimi o… aua o lana amio lava lea i le taimi o Sui Palemia.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, a foi lea sa e faafogafoga i ai, o le oso ese atu lava, I’m free, alu atu lea, I am free, a o le taimi la lena, sa ou tau taotaomia i lalo e fai le faamaoni. Ia a o le mea la lea o le o atu saoloto saoloto saoloto, e le o se tulaga lelei aemaise o lea ua taofi uma galuega a le aufaigaluega a le Malo i Ofisa Sili o Pulega e omai se i mataitu po o le a le tulaga o i ai Taitai o le atunuu, a o le le faamaoni i o latou tofi, e le o se tulaga lelei lea e avatu i le atunuu o lo o faafofoga mai.

FOFOGA FETALAI: Faafetai. Sa free foi lava i le taimi o Sui Palemia.

Susuga Hon Laauli Polataivao Leuatea: Ia, lau Afioga i le Fofoga Fetalai, sina avanoa se i fai atu se tala ma le agaga faaaloalo.

FOFOGA FETALAI: Ae ui i lea, ua uma atu ia mataupu ne i te i ua molia le Fofoga Fetalai faapea ua… E leai, o le agaga faamalamalama, aua o lea ua ou taua le suafa o Aeau, o le toe Ulutaia lea o le Maota, a o lea ua silasila i ai i le louloua o le tau, a o lea tatou te faatasi. O le mea lea lea, e tatau foi la ona oo sau tala i le mea o le sui usufono ua aupito sili ona leva, aua e pei o le toalua lea, o le Palemia ma le Afioga i le Sao Faapito, o sui usufono aupito leva ia i totonu o le Palemene, e pei o le tulaga lena. Ae ui i lea, ia, se i malie Laauli pe i ai se mea e te fia saunoa ai a o lea ua faataoto ese lea vaega.

Susuga Hon Laauli Polataivao Leuatea: Ioe, ou te tautala lava ma le faaaloalo, e manusina le soa lau saunoaga i lenei taeao. O au nei sa faalogologo lava ma le totoa i le taua o le saunoaga a le Afioga i le sui usufono o lo o saunoa nei ia Faleata. Paga lava lea lau Afioga i le Fofoga Fetalai, e lagona le faanoanoa i le Afioga i le Palemia, e ese lava le mataupu o lo o talanoa ese foi lana mataupu lea ua aumai. Se malie ia lau Afioga, malie ia aua e te faaoloataua le atunuu i lo matou nofonofo atu. Ioe, e leai lava se isi o tatou o atoatoa, o isi foi taimi ua matou le Fono, o isi foi taimi ua matou Fono. Ae malie ia lau Afioga i le Palemia, e le o mafai ona saofai le Afioga i le Sao Faapito o la e foi e i ai ona tuatuanoa ma ona foi faafitauli faale-itumalo ma le aiga, e faapena foi le Afioga ia Leatinuu. Ae malie ia o lo o faafofoga le tatou atunuu i lenei lava mea o le tu sasae ae i luga faaleaga, faaleaoga le le auai mai i Fono, a o lena e i ina le tofa i lau Afioga i le Palemia ma lau Afioga i le Fofoga Fetalai.

1207

FOFOGA FETALAI: Malo. Malie le sui usufono se i tulai mai le Palemia.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai o le mea e fia faasao. E le o se faaleaga le mea lea o lea foi tatou te talanoa i mea o tatou Tulafono Tumau ma tatou Taiala. A lea sa tatou talanoa i Taiala? Taiala ma Tulafono Tumau. O lea foi la ou te tulai atu i mea nei o Tulafono Tumau. E ala ona ou talanoa i mea ia, leaga ua tele tele manatu taufaasese ia ua fai i fafo, fafo atu o le Maota. A o i, o i tatou te talanoa ai i mataupu mo le faafogafoga mai a le atunuu. O lea e tutulai atu matou e lagalaga mataupu mo le sologa lelei o tatou Fonotaga. Leaga o isi mea ia e faatauaina, o lea e i ai tatou Taiala, ae o atu i fafo faaleaga le Maota, faaleaga le Fofoga Fetalai i le faagasologa o le Fonotaga. O le a la le mea a fai? E lelei le auai i Fonotaga e faafogafoga lelei ai i le faasologa mai o saunoaga a sui usufono ma tatou malamalama lelei ai i mea foi ia o lo o faatino e latou itumalo. A o matou la, o lea matou te faalogologo lelei, leaga o matou e faatinoina le fanoga o tatou sui i totonu o le Maota lenei. Lau Afioga i le Fofoga Fetalai, o le ala lena o lea ou te tulai atu ai, o aso ia sa e i ai foi oe i totonu o le Kapeneta, ma auai i tatou Fonotaga Faafaletui, ou te valaauina a tatou Fono a o le i omai i le Fonotaga lenei, o le a lau upu? Ia outou taumafai e auai ae le i amata le Fono. Ou te talanoa i mea uma, taimi uma taimi uma, taimi uma, ia auai i totonu, tatou auai ae le i amata le Fono, ia aua ne i lagona le logo e ta e tauvalaau mai ai tagata e faaatoatoa le aofai o tatou sui usufono i totonu, leaga a le atoatoa, e le mafai ona faia se Fono. O Nofoaiga i tua atu, e tai ta lava le logo i taimi uma, taimi uma, taimi uma, discipline. Lau Afioga i le Fofoga Fetalai, a e manao e tautau atu i tagata mea e tatau ona fai, ia solomua ia te oe ona e mulimulitai i ai, aua ne i aloaloese ma le mataupu lea o le faapea atu, fai pei ona ou fai atu ai, ae le fai pei ona ou fai.

FOFOGA FETALAI: Malo faafetai. Ia, malie Laauli…

Susuga Hon Laauli Polataivao Leuatea: Lau Afioga, ou te tautala lava ma le faaaloalo…

FOFOGA FETALAI: Malie ia Laauli, ou te tapa atu ma le agaga faaaloalo…

Susuga Hon Laauli Polataivao Leuatea: Ioe, malie ia lau Afioga i le Palemia, soia ia e te tilotilo masae ma e fai pea le upu lea o le matou le

1208 faamaoni. Malie lau Afioga ua lava ia lea, toe o ni nai vaiaso uma le tatou Nofoaiga. Ua lava ia lea ua lailai tagata.

FOFOGA FETALAI: Malie lau Afioga, ua ou manatu… Malie ona e… O le tatou Tulafono Tumau, leaga o lea na fesiligia le tatou Tulafono Tumau, o le solifono foi, ma e le talafeagai ma le Tulafono le tulai ae o se isi sui usufono, e pei o le tulai ae o lau Afioga Laauli. E le talafeagai ma le tulafono le faauilavea i le saunoaga a le isi faauilavea. O le faauilavea ma le faasaoga ma le mea e fia malamalama o lea sa tulai ai le Palemia, e faamalamalama ma faapupula nisi o mea sa saunoa i ai le Afioga i le sui usufono mo Faleata. Ae peitai e tuu atu le avanoa i lau Afioga, ona o le tulaga faapea ai o sau mataupu e faasaga i le sui usufono mo Faleata. A o lea ua faasaga lau faauilavea i le saunoaga a le Palemia, o le isi foi saunoaga e faasino i le faauilavea i le sui usufono mo Faleata. Ua ou manatu, o le ala lena na ou faapea atu ai e faamuta loa i i le mataupu. I le faafofoga mai a le atunuu, ia faamalulu atu, o le agaga lava ina ia faamanino ma faamalamala ia mea o lo o faapena ona laga i totonu o le Palemene. E pei foi ona fesiligia e le Palemia, o a Tulafono Tumau o ou tausia. O lea lava ua ou fofola atu i luma. O le mea la lea, faaiu maia le saunoaga a lau Afioga i le sui mamalu o Faleata.

Afioga SALAUSA JOHN AH CHING: Faafetai. O le taua la o taiala o itumalo taitasi. Ona o le faiga fou lea, o lea ua muamua fesili i le itumalo. O a mea tou te manaomia mo a outou atinae? Aua o le mea sa sau ai le tatou atunuu i taimi ua mavae, e tele lava ina aumai tupe mai fafo, ona aumai loa lea ave tufa i o tatou itumalo. O le polokalame lea e tatau ona fai, ae emo ifo le ata, e le talafeagai ma manaoga o le itumalo. O le mea la lena e uma loa tupe ona uma foi lea o lena polokalame. E foliga mai e le o se faiga e maua ai le mea lea e manaomia e tatou o le sustainability o polokame. O le mea la ua tatou i ai nei, e tatau ona sustainable ia polokalame atinae nei a tatou itumalo, ona o manaoga tonu lava ia o lea e tagi mai ai itumalo, o le taua lena o mea nei. Ma e tatalo atu foi i Matagaluega taitasi, e aafia ma fai paaga i totonu o le tatou atinae lenei, ia faataua manaoga a le itumalo. O lea ua taatia taiala, o i ina o le a tatou alu ai, 2019 e tau atu i le 2029. O lea la ua mautu le komiti o le atinae a le itumalo o Faleata Nu 1, ma o lea foi e faaauau...

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, o se mea e fia faamalamalama, ona o lea e fai ma tau le polokalame lea o le Sustainable Development. O le mea ou te tulai atu ai e faamalamalama, ona o lea e fai ma nanu tatou, ae o la e faafogafoga mai le atunuu po o le a lea mea. Ae o le polokalame lea na afua mai i le faatoa uma 1209 ona faataoto polokalame uumi a le Malo Aufaatasi. Ina ua uma ona sainia le tulaga lea ua i ai nei isi polokalame sa matou...lea e tau ai le maliega i Palisi po o le laumua lea o Farani, na sainia i le 2015. O se taiala e aofia uma ai le lalolagi atoa. Na afua fuafuaga ia ona o le fili lea ua faafeagai ma le lalolagi, o le suiga o le tau. Ona o suiga o le tau o i tonu lava lea e afua ai ona faigata ai ona faaauau ia le tele o polokalame, ona o afa e tulai mai, o tsunami o afi, ona faigata ai lea ona faaauau polokalame. A o le tatou atunuu lava ia, ua uma ona tatou pasi mai ai i le mea lea, na matua afaina ai lava Samoa. Sa tele le popo na ave, o le a le mea lea ua tupu, ua leai ni popo o toe avea i fafo ua le mafai ona toe faaauauina. Sa ave ma lau le tatou popo e gaosi ai le suauu i Peretania, popo mago e ave i Siamani. E i ai le tausaga na ou malaga ai i Siamani, ona ou alu lea i ina i le aai tele lea o Hamburg e i ai uafu tetele e taula ai vaa tetele. O i ina lea sa toai taunuu atu i ai ia uta tetele na avatu i Samoa, ma na aumai ai ia te au le tusi tele lava e tusitusi ai ia le taunuu atu o vaa tetele nei. E tusi ai lava ma le popo e lau atu i Samoa. O Samoa foi o le tasi o le 14 o atunuu sa latou gaosia le high flavoured cocoa. O le koko pito i sili lea ona maoae o lea lava e maua i le taimi lenei, e matua manaomia lava i le gaosiga o sukalati i o i atunuu… ia e i ai Siamani, Holani ma Peretania, Belgium. Sa tele a tatou koko sa i ai le fale koko, sa i ai masini tetele e faamago ai le koko. E i ai le koko e ave atoatoa e i ai le koko e ave na o pau koko, o pau koko lava e avatu foi vili. O fea la o i ai le koko i le taimi lenei? Ua leai se koko. Ia tuu ane i le fai, na oo i le miliona a tatou pusafai i le tausaga e 1960. E tusa na o Samoa ma isi atunuu o le Pasefika na alu atu ai le fai i Niu Sila. E na ona oti lava o le fai, leai ma se fai e toe avea. E 3 la mea tetele ia na aafia ai tatou, koko o le popo ma le fai, oso ma le faamai lea o le lega i le masina o Setema i le tausaga e 1994. Ou te manatua i le fonotaga sa faia i inei. E ala ona ou manatu le tausaga lena, ona o le tausaga lena na oso ai le uluai savali, le uluai savali tetee mai le Malo, ae faaaoga ai ia mea e 2. O le le toe maua o se talo ua lavea i le lega ma le 2, o le VAGST. Na alu ai le savali tetee i le 1994, savali tetee i le 1995, 1996, 1997, 1998, e 5 tausaga lau Afioga i le Fofoga Fetalai. Se meamanu lava e tau ai le atunuu i savali tetee nei. Aisea? Leai se talo, e $16 miliona tala na tatou maua i le tausaga lena i le export o talo na ave i Niu Sila. Na pe mai ai lava ma le talo, leai ma se talo na maua. E toeitiiti atoa le 10 tausaga pe sili atu foi ua le toe maua se talo. Ae sa fia taumamafa le atunuu? E leai. E leaga o lea na i ai isi tatou taumafa na suia ai. O lona uiga la lau Afioga e 4 lelei fua o faatoaga na faalagolago ai Samoa, sa feololo foi le kofe. A tatou talanoa i mea tau i le Sustainable Development, pe tatou te talanoa i le mea lea o le ola pea o atinae e faalagolago i ai e faaauau, faaauau. O le tulaga lena o lea e faataua e le lalolagi atoa. Aua e le na o Samoa e aafia i mea ia, e aafia ai le lalolagi atoa ma suffer ai, mafatia ai i le osofai mai o faamai. O le ala lena e le tuuitiitia ai e atunuu o le lalolagi, le tulaga lea o le Sustainable Development, atinae faaauau. O le mea lea e 1210 taumafai lava i le taimi lenei le toe lalaga mai o so o se ituaiga fai, ina ia tatou toe maua le fai sa i ai muamua e le mai, e fua lava le fai, e gafa le uumi o aufai. E fua lava fai i aso na ae le i faamaia, ae le i pauuu lagoele. O lea e faafogafoga mai le sui usufono mo Vaimauga i Sasae. E ala ona ou fai atu i mea ia, ona e fai si ou matua ia te oe. Na ou aafia i mea ia o le toto o fai ma amo fai, e masalo e te le i soifua mai. O le tulaga la lena i fai nei, e fua mai fai, pula, gafa le uumi ae le i pau lagoele. O le taimi lena, e leai ni faamai, na ona sau lava o le faamai, oti atoa le tatou fai. O le taua lena, a tatou talanoa loa i le Sustainable Development, ua tatou foi mai ai, sa tatou mafatia ai, o le ala lea e taua tele ai le faasilasilaga lea. Ua ou tulai atu e toe ave i tua o tatou mafaufauga i le tele o le oa na aumai e le Atua ia i tatou. A o fea ua i ai? O faamai ma faaletonu uma lea na aafia ai tatou. O le ala lena e le o nofo le Malo, o lea tatou te agai i isi atinae, a faaletonu mai isi mea ae tali mai isi mea, ina ia faaauau ai pea le soifua lelei o tatou tagata.

FOFOGA FETALAI: Malo faafetai. Tulai mai le sui usufono mo Anoamaa i Sasae, lau susuga Lufilufi.

Afioga Alaiasa Muagututi’a Moefaauouo Malagaitutogiai Sepulona Moananu (Anoamaa Sasae): Lau Afioga i le Fofoga Fetalai, e na o sina mea lava e faamalamalama i le saunoaga a le sui usufono o lo o saunoa nei. O le manaia ia o le saunoaga a le sui usufono mai le vaiaso na tea nei, lea ua oo i fanau a tagata, o mea uma o lea ua oo oo i ai le saunoaga matagofie. Ae i ai se mea na ou faalogo atu i ai. E faapea e i ai Faalapotopotoga ua o mai tufa tupe i tua i itumalo, a uma loa tupe ia ona uma foi lea. E leaga o la e faafofoga mai lou itumalo, e faapea o lea lava e nofonofo le sui usufono ae leai ni polokalame faapea e o atu e tufa tupe i lo matou itumalo i tua. Ae silasila foi lau Afioga, o lea ua i ai anavatau a isi fai mai e tai miliona e tufa. Ua tau sese atu ai ma le itumalo, ae o lea ou te fia fesili atu i le sui usufono, po o fea tonu Faalapotopotoga ia sa maua ai tupe a lona itumalo. Ma le agaga faaaloalo i le mataupu lea e fia malamalama ai.

FOFOGA FETALAI: Manaia foi le fesili se i tulai mai po o..

Afioga SALAUSA JOHN AH CHING: Faafetai mo le avanoa, faafetai foi mo le faauilavea ua faamalamalama atili ai nisi o mataupu o atinae e faaauau pea. O le faafetai lea o lea e fia ave i le matou itumalo ona ua mafai ona faatino lelei le komiti lea o le atinae o le itumalo. Ma o lea foi lava ua faasolo fono e tai 2 masina ma fai le fono a le itumalo. Ma e toe lua a matou fono ia e totoe, o lea foi ua i ai le matou tusitupe, e $2,700 le matou tupe ua i ai i totonu o le matou tusitupe a le itumalo lava ia. O tupe ia, o tupe lava o lafoga a le itumalo, o pitonuu ia sa lafo e tai $200 e lesitala ai. O le tagata e alu atu i le fono, e fai lana lafoga e $5. A maua se matou sponsor ua maua le 1211 pasese e $10. E faapena le taumafaiga foi a lenei itumalo, e le gata ona o le tele o itumalo, ae tele nuu paia e le faigofie ona faamaopopo. O le tasi o... aua o le mea lea e saunoa i ai le sui usufono, o nisi o Faalapotopotoga e o mai mai fafo ma ave tupe. O le mea tonu lava lena e pei e matau ai le faamoemoe, i mea faapenei o atinae e le mafai ona faaauauina, sustainable ona o tulaga faapea. Ae o le mea lea e lelei ai le komiti o atinae lea ua i ai nei, o manaoga lava na faaleo mai e le itumalo, e le o ni mea mai fafo. O manaoga na faaleo mai e le itumalo, o lona uiga, o i ina le taiala tonu lava a le itumalo. O le mea lona lua ou te faafetaia ai lo matou itumalo, ona o lea lava toeitiiti lava maopopo le komiti a tina. E toeitiiti lava maopopo uma, ua maoopopo le toatele o nuu ma pitonuu ae toeitiiti lava nai pitonuu o lo o tau faamaoopoopo i le taimi lenei. A maopoopo loa le komiti a tina, o mea ia e lua e faavae i ai le atinae o le itumalo. O le komiti o le atinae o le itumalo ma le komiti o tina, o mea ia e lua e faavae i ai le atinae o le itumalo. O i lea e tatau ona auala mai ai i totonu ia faamanuiaga mo le itumalo, e faapea foi le fesootai atu o le tatou Faigamalo, mo atinae ma polokalame e tatau ona fai. O le mea lena e momoli ai tele lau faamalo ma lau faafetai i lo matou itumalo, ona o nei foi fuafuaga ua matou oo i ai, ia tatou taumafai pea e le faigofie. E faafetai atu ai i sui o nuu sui o le Malo ma sui tamaitai ona o le faamaopoopoina. O nai manaoga ia e faapitoa o le itumalo lau Afioga i le Fofoga Fetalai, o ala-vaitafe, e pei lava ona silafia i lologa ia na tutupu nei. O le tele o le lologa lea e tutupu i le itu i sisifo o le taulaga, e mafua mai i le itumalo lenei o matou, e malolosi tele vai ia o lo o i ai. E malosi le vai lea i Vaimoso, o le vai lea lea e i Vaimoso, e taulai uma mai i ai vai o Moamoa, o Sinamoga, o Alafua e sau uma lava agai i i i le alavai lea e tasi. Ona le gafatia loa lea, ona pa mai lea i tua o le SMI, sau i Fugalei, sau i Savalalo. O le isi magavai lea i Vaimoso-uta lea e agai i o i Taufusi, lea e ala ai ona lolo atu le auala lea i Taufusi. E faapena foi i le alavai lea i Fuluasou, ua oo lava i le matou fale. E masalo pe 50 mita i le 80 mita i le va o le vaitafe lea e i Fuluasou ma le matou fale, ae na lolo lava totonu o le matou fale, ioe. O le mafuaaga lea ua matauina i le asiasiga sa o matou faia i totonu o le itumalo, o alavai e piopio, e piopio tele alavai, e papau alavai, ma augutu o alavai e maualalo tele, e maualalo tele. O le tele o nisi Vaega ua toeitiiti lava laugatasi faatasi alavai ma augutu o le vai ma autafa ane i eleele autafa ane. O le mea foi lena, a silasila nei i ai i alavai ia o lo o i ai nei, o lena o lo o toa ai le oneone. O le tele o le oneone la o lo o toa ai nei i le ogatotonu. A outou silasila i le aualasima po o le bridge lea e i Sinamoga, masalo o lalo o le bridge lena e pei e lou, e lou lona faiga, e curve foi lele....

FOFOGA FETALAI: Ua maea le taimi o le sui usufono.

Afioga SALAUSA JOHN AH CHING: Masalo pe a tele po o se 2 futu.. 1212

FOFOGA FETALAI: Se i tulai mai le sui usufono…

Afioga Faumuina Asi Pauli Wayne Fong (Nuu Tu Taulaga i Sisifo): Lau Afioga i le Fofoga Fetalai, o lea e matau atu o le a faaiu le saunoaga matagofie a lou uso a sui usufono mo Faleata. E na o se manatu, ona o le manaia o manatu o le Afioga i le sui usufono. O lea e faatu atu ai se lafo lau Afioga, e faaopoopo nisi aso se 2, aua le lauga a le Afioga i le sui usufono, o lea e manaia nai ona manatu. Ma le faaaloalo lava faafetai.

FOFOGA FETALAI: Malo. E le talia e le Fofoga Fetalai ni mataupu faauigalua le mafaufau faapea. Ia o le manatu ea o oe e valea le Fofoga Fetalai.

Afioga Faumuina Asi Pauli Wayne Fong: Lau Afioga o lea lava e avatu se manatu. Ona ua 2 aso o lauga le Afioga i le sui usufono, o lea e taumafai atu ai se manatu.

FOFOGA FETALAI: Onosai mai, nofo i lalo, alala i lalo o lea ou te fai atu, alala i lalo o lea ou te fai atu. E tele mea faatoa e sau nei masalo faatoa 5 minute talu ona e taunuu mai, ae e tulai mai fai na faauilavea ma na mea faapena. Se alofa ia, e eseese le faatoa matai nei ananafi ma le matai ua leva. E fua o le aganuu, fua i le aga faaaloalo ma le tatou mafutaga. Faapena, ia faaiu mai le saunoaga a le sui usufono.

Afioga SALAUSA JOHN AH CHING: Faafetai mo le faauilavea e ese le manaia, taumafai atu mo le 2 aso. O le vaitafe o mafuaaga lena, o i foi lea e talosaga atu ai i le Matagaluega ma le Minisita o lo o feagai ma mea nei. Ou te iloa o lena ua taatitia nai lipoti foi na avatu e le itumalo e uiga i mea ia sa faaleagaina. E le gata i le afa o Kita, a o mea foi na na toe faaleagaina nei i lologa ia na tuanai atu nei. O lea foi la ua toe faaopoopo atu ai le lipoti, o mea na o....ma le talosaga i le inisinia, se i taumafai po o le a se fofo, e mafai ona fai i nei mea. Ou te manatu foi la, o mea ia e le faigofie, o le talanoa i le itumalo e le faigofie ona faasaosao ia alavai piopio nei. Ae masalo o le vaitaimi lenei o ni mafaufauga fou ni faiga fou, innovative thinking, innovative designs a inisinia e faafoia ai le faafitauli lenei. E leaga o le faafitauli lenei, o lea o le a fai ma...ua pei o se mea foi lea o le a tupu i tausaga uma, pei o se annual event le mea lea. Ma e le toe foi i tua ia lologa ae o le a faaopoopo pea ae o le a fai ma mea e tupu i tausaga uma, ua pei lava o le faamanatuina o le teuila i tausaga uma, e annual event foi lologa ia o le a i ai. O fuafuaga alualu mamao, ia o lena ua taatia atu i le tatou Faigamalo, ae o se fuafuaga po o se fofo lata mai, ma e manaomia i le taimi

1213 lava lenei, o le suaina po o le eliina o le alavai. O lea na ou taua le aualasima ia e i i...

FOFOGA FETALAI: Ua ou tapa lau Afioga i le sui mamalu, o le tulaga foi o le feavatai, na ona e saunoa lava, ona lafo lea i le Matagaluega o Galuega, i le faafofoga mai a le auinisinia ma Minisita i faamaumauga o le tulaga lea. E leaga o le a alu lou taimi, e te faasino, ae leai sou tusi inisinia na o lou tusi faafomai. Ae lafo i le Minisita, e aoga fautuaga ae fai atu ai foi o le a alu ai le tatou taimi, o le galuega lena a le Minisita ma le ....o la e faafofoga mai Ofisa sili o le Pulega o le Matagaluega..

Afioga Alaiasa Muagututi’a Moefaauouo Malagaitutogiai Sepulona Moananu: Lau Afioga i le Fofoga Fetalai…

FOFOGA FETALAI: E le i tali lava lau fesili ua e toe tulai mai ai, po o..

Afioga Alaiasa Muagututi’a Moefaauouo Malagaitutogiai Sepulona Moananu: Lau Afioga i le Fofoga Fetalai. E tusa ai ma le Tulafono Tumau leaga o lea ua taua. Ou te faatu atu se 5 minute e faaauau ai le saunoaga a le sui mamalu e faamaea ai. Ae o mea ia o alavai e talanoa ai, e feololo vai ia i lo vai la e i tua ia matou. Ae ala ona tetele ona o tatou, e tiga lava ona vaai atu i le vai, ae o tafua fanua i talaane o mea e tafe i ai le vai, o mea lava e masani ona tafe e tau i le sami. Ae ua fai loa le atinae a tagata, ua alu atu le isi tagata ua eli faamaualuga, ia ae sau loa le vai ua poloka ae alu i le isi aiga. O se mea e fesoasoani ai aua o au e feoloolo si ou malamalama i tafega. Ae ou te faatu atu se 5 minute e faamaea ai le saunoaga a le sui mamalu. Ma le faaaloalo.

FOFOGA FETALAI: Malie le sui usufono, e talu ai ua uma ona fai lau faaiuga. E leaga o la foi na faatu mai le sui mamalu o le uso a faipule o Faleata, ae 2 aso la na faatulai mai. E leai se tatou Tulafono e 2 aso e faatele ai, e pei e uiga, o le ala lena. E i ai le taimi foi e le tau e le o se agelu ai foi le Fofoga Fetalai ia, e aumai loa se tala foi lele e pei e faauigalua, ona tau mai lea Fofoga Fetalai, o la e lu’i le Nofoa. Ae ui i lea, lafo atu ia se i faamaea mai lau saunoaga. Ia taoto mai lava i le Matagaluega o Galuega, o la foi e saunoa mai le... e tetele foi le vai i le la itu, ae silasila i ai le Matagaluega e fai se fofo.

Afioga SALAUSA JOHN AH CHING: Faafetai. E moni lava ma faamaoni le saunoaga, e leai foi se agaga o lea ua taatia atu le tulaga lena i le Matagaluega ma Inisinia. E pau lava le talosaga lea e manaomia i le taimi lenei, se i toe eli ese le oneone lea e i totonu o alavai, o lea o lo o papau ai alavai i le taimi lenei. O le aualalaupapa lea po o le aualasima lea e i 1214

Sinamoga, masalo pe toe 2 futu le mea la e totoe i le va o le oneone ma le arch lea e i luga o le sima o le auala ona puni loa lea o le alavai i le oneone. O i ina la lea e talosaga atu ai, leaga o lea e loma isi tatou timuga ia o lo o tau mai e le Vaai Tau. O le mea lena o lea e talosaga atu ai ma le faaaloalo tele.

FOFOGA FETALAI: Saunoa mai le Minisita, malie le sui mamalu.

Susuga Hon Papaliitele Niko Lee Hang (Minisita mo Galuega, Felauaiga ma Atinae Eseese): E leaga ua uma ona aumai le tusia a le inisinia fomai lea e uiga i le mataupu lea e saunoa i ai i le taimi lenei. O le tulaga o le oneone lea e taua, o la ua uma, o la foi e faafogafoga mai le Matagaluega ma le Pulega, se i toe o atu e vaai, leaga o lea na faatonu au e toe vaai mea ia i le taimi lena. Ua mafiafia ai le oneone i alavai po o fai se galuega. Ae o lea ua faamauina, faafetai.

FOFOGA FETALAI: Malo o la ua aumai le saunoaga i le Minisita, ae faaiu maia le saunoaga.

Afioga SALAUSA JOHN AH CHING: E malo faafetai, faafetai o lea ua maua le tali, o anapo sa matou talanoa ai ma nisi o tama foi o le itumalo. Sa aumai foi la latou tuualalo, a faapea o le a se finagalo o le Malo, pe faigata pe tuai. Pe mafai ona faataga atu aiga ia e i autafa ane, e lau ese le oneone. E lau mai i luga o augutu o le vai se i fai ai se... A o lea ua saunoa mai le Minisita, masalo o le a faatali mai se i o atu le tatou Matagaluega. O aualagalue faavaifale o lenei itumalo, o le tele ia o aualagalue faavaifale o le itumalo. E masalo o le tele lava o nei auala a umi tele po o le 50 miti ae le umi ae o le tele. Ua le iloa po o le a le ituaiga faiga e fai ai. Sa ave lau imeli i le CEO o le LTA ona o nisi foi metotia fou, e maua mai i luga o upega tafailagi, ua faaaoga ai pau taavale tuai, tulou le Maota, e fai ai auala nei. E tipi autafa ona avatu lea faapipii faatasi ona tanu ai loa lea o totonu. E tanu a le o le maamaa po o le amu o le dry coral e malo, e malo lava malo lelei. A o i foi la, e pei e tau faigata ai i le vai e tafe i le taimi o timuga ona toe aveese le mea lea, aua o lea ua taofiofi i totonu i pau taavale. O nai idea fou, innovative thinking, innovative designs e taumafai ai mea faapea. Aua e le iloa po o le a le mea a fai. Na ou talanoa foi i le fono a le matou itumalo, e amata ona faaputuputu a tatou pau taavale. E faaputuputu a tatou pau taavale, e oo i le taimi e saunoa mai ai Galumalemana ma le Ofisa o le LTA a ua lava a tatou pau, ua lava a tatou pau e fai ai a tatou galuega nei. O le tulaga lena e oo foi i auala, o vai e faigata tele nei mea, ae talosaga atu ai foi, i le paia maualuga ia, i le mamalu o tatou nuu paia ia o faipule, CEO, inisinia, fomai, loia, o lea e alala i totonu o le tatou itumalo, i a tatou ia faatasi i ai. O le a se

1215 mea e mafai ona e faia se fesoasoani e mafai ona e faia, e lagolago ai le atinae o le tatou itumalo, e talia ma le faafetai.

Afioga Fuimaono Teo Samuelu Teo (Falealili Sasae): Malie lau Afioga i le Fofoga Fetalai. Ona o lea e taua mea ia o faaputuga pau, ae manatua foi o mea nei o pau e tuufua ai le namu, ae pau le mea e fia malamalama lou sui usufono, atonu o se atinae lelei po o le a tonu lava le aoga o pau o le a faatalitali mai i ai le tatou Matagaluega. O le a le faatinoga o pau ia o le a tau faaputu pe le ono maua ai se isi faamai i pau ia o le a faaputu a le itumalo. Ma le agaga faaaloalo.

FOFOGA FETALAI: Faaputuga a? Faaputuga pau? O la ua maua mai e le sui usufono mamalu.

Afioga SALAUSA JOHN AH CHING: E sao lava, se leai lava se mea o lenei lalolagi e atoatoa ona lelei. E fai atu foi le mea e faalelei ai le isi mea, ae tupu mai ai foi faalavelave i le isi itu. E pei la o pau taavale e pei ona taua e le sui usufono, e sao lelei le sui usufono, o pau taavale foi ua avea ma mea, a toa ai le vai, ona avea lea ma mea e tuufua ai namu. A o le mea la lena, a faaputu pau, ia faaputu e aua ne i toa ai se vai. Ioe. Vaai ni mea po o se tapoleni po o le a se mea e avatu e ufi ai luga o faaputuga pau, ioe, ina ia aua ne i toa ai se vai, ae faatalitali mo le taimi e faapea mai ai le LTA, ia omai loa o lea a fai loa le tatou auala, ia faataavalevale mai ia…

Susuga Mulipola Leiataua Laki (Aiga i le Tai): Lau Afioga i le Fofoga Fetalai…

FOFOGA FETALAI: Malo faafetai. Ia o lea ua maua le tali o le mea lea. E i ai se mea o e manao i ai Aiga i le Tai?

Susuga Mulipola Leiataua Laki: Ou te tulai atu ma le agaga faaaloalo faamolemole lau Afioga ona o lea e matauina o lea e moomia e le itumalo o Faleata ni pau, ae fai foi si tele o pau o lo o taatitia i lenei itumalo, a moomia, e mafai foi ona aumai e faalava ai au pau. Ma le agaga faaaloalo.

FOFOGA FETALAI: Ia, masalo o le agaga lelei lea e saunoa i ai le sui usufono mamalu. Se i saunoa mai le Palemia.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, o lea faatoa oo Faleata i le faaaogaina o mea ia o auala pau, a ua leva ona matou foi mai ai i le matou nuu o Saleufi. O Saleufi la, e tele ina faataufusia. E avatu la pau foi lele faasolosolo ona ave ifo lea o ni nai mea 1216 foi ia tuu i totonu e taofi ai le feseetai o le pau, a o lea la ua maualuga, e te laa atu i le isi pau i le isi pau i le isi pau. E pei la o le tulaga lena, e sao au a? Ia o le mea la lena, leaga o le toatele o tatou e le i nonofo i ni tulaga foi ia e tutupu ai mea faapea. E le afaina la Saleufi, aua e te savali atu foi lele i totonu, laa atu i le isi pau, o lea ua maualuga o lea ua taofi aua ua le mafai ona feseetai, ona e laa atu lea i le isi pau i le isi pau i le isi pau, a o autafa, o le autu, lea la e tataa ai ma ia. O se namu lava la e tofotofo ae tofu ii, ia e tausami e i’a ia e ola i i i le TATE, ituaiga i’a la na e fiafia tele i mea ia o namu. O le ala foi la lena e taua tele ai le faaola o i’a na, aua o le ala foi lena e lapopoa ai, so o se namu lava e tuufua, e chow uma e i’a ia a? Ia o le faapuupuuga lena ne i te i ua faapea o se faata lea e avatu e le sui usufono, leaga o le technology lea ua leva ona foi mai ai le matou nuu o Saleufi.

FOFOGA FETALAI: Malo. Ia po o ua manino la le faaaogaina Aiga i le Tai? I le taua o le faaaogaina lea ua faamoemoe i ai le sui usufono mamalu, e faapena.

Susuga Mulipola Leiataua Laki: Faafetai. O lea ua maua.

FOFOGA FETALAI: Faafetai. Ia, se i tulai mai le… Se i saunoa mai le Minisita mo Galuega, Felauaiga ma Atinae Eseese.

Susuga Hon Papaliitele Niko Lee Hang: Lau Afioga i le Fofoga Fetalai, ma le faaaloalo lava e le faalavelaveina le saunoaga o le a faamaea a le sui usufono mamalu. Ou te tulai atu ona o lea ua saunoa le Palemia o pau sa faaaoga i tausaga lava ia ua leva. O le tulaga lea ua i ai tatou, e le tatau ona toe faaaogaina ia mea, ua agai i luma le atinae o Samoa, a toe faaaoga nei mea o pau, o lona uiga o le a toe foi i tua tatou. Taatia mai lea mea se i talanoa inisinia ona fai lea o se isi auala e taofi ai nei pau. O lea foi e aumai pau a Manono, o lea o le a faulalai ai pau a o la e tele pau. Ia ma le faaaloalo lava.

FOFOGA FETALAI: Ia, o lena ua saunoa mai le Minisita, tatou te le toe fia foi i tua, alofa le sui usufono aua ne i toe faaaogaina na mea o pau, leaga o lea ua alu i luma le soifuaga, o le a o atu le Ofisa o Galuega e silasila i ai ma fai. Ia, tulai mai le sui usufono.

Afioga SALAUSA JOHN AH CHING: Ia, faafetai tele. E leai, faafetai i le Afioga i le Minisita o lea ua saunoa i le tulaga lea. Faafetai foi i le uso a sui usufono mai Manono, e leai, taatia pea a outou pau i Manono.

FOFOGA FETALAI: Aua e ala ona ou fai atu lau Afioga i le sui usufono mamalu, e ala ona ou fesoasoani atu, leaga o le saunoaga a le Afioga i le 1217

Palemia, a outou silasila i ai i ina i Saleufi, le mea lea sa i ai le au Grey, lena ua alu atu lava i ina i le Bluebird, ma le maketi foi, ia o i ina e auala i pau i aso ia tatou te le i tutoatasi, faasolo mai lava i le taimi ua tatou tutoatasi, sau lava i le 1962, 1963, faasolo mai i le 1970. Ua a nei? O mea uma na o lea ua atiae e le Malo i lenei vaitaimi e te le o toe maua ai. O le mea la lea, o lea ua saunoa mai le Minisita, alofa lau Afioga i le sui usufono mo Faleata, e leai o le a o atu le Matagaluega, ae aua le toe faaaogaina na mea, o mea na e le o toe faaaogaina i lenei vaitaimi. Ia, tulai maia lau Afioga…

Susuga Mulipola Leiataua Laki: Lau Afioga i le Fofoga Fetalai, e leai sa avatu lava i le agaga mama ona o le fia fesoasoani foi i le faaputuga pau a le itumalo lea, ia peitai o lea ua teena, ae na tuu lava e avatu fua e leai se tau. Ae o le a toe tuu ia pau a lenei itumalo, leaga o lea ua le talia. Ma le agaga faaaloalo manuia le Fono.

FOFOGA FETALAI: Ia, faafetai. Ia, tuu ai pea tou mea na, o lea foi o le a e le toe sau i le palota, ia, taatia… a o na mea foi o faaaoga i ai lou taimi.

Susuga Mulipola Leiataua Laki: Masalo o lea o lea aveane i lau Afioga lea ta te felatai.

FOFOGA FETALAI: Ia, se i tulai mai lau Afioga, see ese mai ia mea o pau ma le saunoa i ai o sui usufono.

Afioga SALAUSA JOHN AH CHING: Faafetai. A tele loa manaoga o le itumalo, ia, o le mea lea e gaoioi i ai le sui usufono, ma ua saputu mai manaoga o le itumalo, aua o le tele o le auala, o le tele o tamai auala ia, ae ua le iloa po o le a le mea a fai ai. Ia pei la ua ala ai ona ou sailiili ma suesue po o le a se isi faiga, ua avea foi la le mafaufauga lea ua ave i le itumalo, aua ne i o tatou ola faatalitali ae taulamua tatou i ni atinae ma faamaite i mea e fai. A fesoasoani tatou ia tatou, ona fesoasoani mai lea o le Atua i o tatou manaoga. E fesoasoani tatou muamua ia tatou ona mutimutivale mai ai lea o le alofa o le Malo ma le Minisita i tatou mea e fai. Ioe. E pei o le agaga lena. O le ala foi lena o le sailiili solo, ae afai o lea ua saunoa le Minisita, e leai la, o le a sui foi, o le a nonofo foi la ma tapuai mai ina ia vave ona taunuu atu le fesoasoani. Malo faafetai. Ia, o se tasi foi lenei o mea sa talosaga i ai le itumalo, o konekarate moavao. Sa aumai foi i le fono a le atinae o le itumalo le faatu mai e aumaga ina ia… pe mafai ona faamatuu atu konekarate moavao e fai e le itumalo ina ia maua ai e aumaga lea faamanuiaga o le seleni. Ia manatua foi na ou taua i le vaiaso ua tea atu, o tatou aumaga o malosi ia o le nuu, o malosi ia o le nuu e faamoemoe i ai fono a le nuu, e faamoemoe i ai atinae, faletua ma tausi ma 1218 atinae o le nuu, e le mafai foi ona o e fai ni galuega full time po o galuega foi lele atoatoa, ae e i ai nai konekarate faapea, o lea foi la ua taatia le tusi talosaga a le itumalo se i silasila i ai le Minisita ma le Matagaluega pe mafai ona faamatuu atu konekarate moavao ia aua le atinae o aumaga o le itumalo.

Susuga Hon Papaliitele Niko Lee Hang: Lau Afioga i le Fofoga Fetalai…

FOFOGA FETALAI: Ia, se i tulai mai le Minisita mo Galuega, Felauaiga ma Atinae Eseese.

Susuga Hon Papaliitele Niko Lee Hang: Faafetai i le sui usufono mamalu na laga mai le mataupu lea. Ua leva ona faatalanoa e le Pulega o le LTA le tulaga lea se i fai se suesuega i nuu ma afioaga ia ua mananao e faaaoga latou alo ma fanau e faatinoina le galuega lea. Ou te le o iloa la po ua a le sailiiliga ona fai lea o se comparison i galuega ia e totogi konekarate pe taugofie pe a faatino e afioaga le galuega lea e saunoa i ai le sui usufono mamalu, a o lea ua taatia i fuafuaga mamao a le LTA. Aua e taua foi le tulaga lea e fesoasoani ai i nuu ma afioaga e faaaoga ai tupulaga e le o i ai ni galuega ma maua ai se latou foi tupe pe a faapea e maua se faamanuiaga mo nuu ma afioaga e manaomia le tulaga lea e faatino e latou le galuega lea. A o lea sa saunoa mai foi ma talosaga mai le sui usufono mamalu i le tulaga lea, ua uma foi ona ou faamalamalama i ai, taatia mai leaga e i ai foi isi afioaga ua oo mai talosaga. O lea lava la e fai le survey a le Matagaluega po o le Pulega, ina ia tagai i ai pe taugofie ona faatino e nuu ma afioaga le galuega lea, ae aua ne i toe avea i tauofo lea e tauofo ai foi nai pisinisi laiti ia o le mamalu o le atunuu lea e faia lea galuega o le moaina o vao. Ia ma lou faaaloalo lava.

FOFOGA FETALAI: Malo. Tulai mai le sui usufono ua maea lou taimi.

Afioga SALAUSA JOHN AH CHING: Faamalo faafetai. O lea o le a faaiu atu se tautalaga. Le tatou itumalo, o le a faaiu atu se tautalaga a le sui usufono. E tele faafitauli o le tatou itumalo, ae ia lava le tatou onosai, lava le tatou onosai. O i latou foi e lava le onosai, e lelei le faamanuiaga e maua i le taimi mulimuli ane. E le i leva, e fou le tatou itumalo o Faleata Nu.1, e le i leva ona tatou mafuta, ae ou te manatu ua see lelei lava le tatou vaa, see lelei lava le tatou vaa. O le see foi lea e see ai le tatou vaa, e le tele ni apefoe, ae see. O se vaa e matautia foi le manaia, e mafanafana foi le auvaa, fealofani, faimea lelei ma le faimea maopoopo so’o se faamoemoe lava i lenei soifuaga, e faatoa mafai lava ona taunuu i se mea lelei pe a faapea o la e lelei ma mautu le faavae. Ma ou te manatu lava ua mautu le faavae o le tatou itumalo i a tatou atinae o lo o taumafai nei. E ta te manatu foi ina ia mafai 1219 ona faaumaina ni atinae o lo o taumafai i ai ona e fou le tatou itumalo. Ma o le mea lea ua i ai nei ma lau tilotilo i le gasologa o le Faigamalo ma galuega fai a le tatou atunuu, o lea ua ou malamalama i faiga faavae a le Malo e faatino ai ana atinae. O lea foi ua ou iloa atu le ataata o le malamalama o le auala, lea foi ua ou iloa atu le ata o le faitotoa, o lea foi ua ou iloa atu le tagata o lo o tu mai totonu o le faitotoa. O le mea lea, lou itumalo e, ta te fia taunuu i ai. Ta te fia taunuu i le siui o le auala lea, ta te fia tatalaina foi le faitotoa lea, ma ou te fia talanoa foi i le taitai lea, aua le agai i luma ma manaoga o le tatou itumalo. O le mea lea po o le a se finagalo o le tatou itumalo i le tatou palota o lo o loma nei, afai e te finagalo ou te toe alu e faaauau ma faatino ma faataunuu a tatou faamoemoega, ia, o la outou pule lea. A faapea foi e ese se finagalo o le tatou itumalo, e le faitio lava, e leai se manatu e faia. A o faanaunauga na, ma o le anavatau lava a la outou sui usufono lenei, e ola e tautua, ola e tautua. Ia manuia le usugafono a Samoa, ia manuia le tatou Fono. Soifua.

Na faaalia le agaga fiafia o le Palemene i le patipati o latou aao i le maea ai o le saunoaga a le sui usufono mo Faleata Sasae.

FOFOGA FETALAI: Malo. Ia, se i tulai mai se isi sui usufono. Malo faafetai malo saunoa ua faamalieina foi le faafofoga mai a le itumalo i atinae ma mea o faamanatu aua le taiala aua le atinaeina o le itumalo mo nei ma i e lua. Malo saunoa i lau Afioga i le sui usufono mamalu. Ia, tulai mai se isi sui usufono e fia saunoa. Ua faafofoga foi i ai, e tele le tapenaga a le sui usufono mo Faleata, a ua tausisia lava nai o tatou taimi ona o le manatu ina ia faapena ona faasoa le tatou taimi. Ia afai o le tulaga lea o le… ae tulai mai e fiu e tauanau sui usufono mamalu, ona tatou manatu loa lea i se isi tulaga. Ia o lea ua tulai mai le Afioga i le… Ia, o le a… leaga o lea ua tatou taunuu i le tatou malologa. E i ai le manatu, sa fia iloa po o ai se sui usufono na ona tatou taunuu mai lava amata loa. Ia o lea la ua tulai mai le Afioga i le Sui Fofoga Fetalai. Malo faafetai. E i ai le manatu a maea le tatou malologa ona e saunoa loa lea lau Afioga i le Sui Fofoga Fetalai pe a tatou foi mai le tatou malologa. Ou te faasilasila atu o le a faataatiaese Galuega a le Fono Aoao mo lana malologa.

Na faataatiaese Taualumaga a le Fono Aoao Faitulafono mo lana malologa masani o le taeao i le itula e 10:35 ma toe faaauau i le itula e 11:25 i le taeao.

1220

Na toe faaauau felafolafoaiga i luga o le faitauga faalua o le Tulafono Tau Faaofi o le Faatatauina o Tupe Faaopoopo (Nu.1) 2020/2021.

FOFOGA FETALAI: Ou te faasilasila atu ua toe amatalia Taualumaga ma Galuega a le Fono Aoao Faitulafono. Ia, malo le tauatai. E manatu ua faaopoopo le malosi i le paia o le Palemene aemaise foi o le Kapeneta e faaauau ai le tatou galuega. E fai le malologa ua tulai mai le sui usufono mo Gagaemauga Nu.3, le Afioga i le Sui Fofoga Fetalai. Ma ou te tapa ma le faaaloalo lau Afioga i le Sui Fofoga Fetalai, e tulai maia e te saunoa e tusa ai o le Tala Faatatau Faaopoopo (Nu.1) o le Tupe.

Tofa NAFOITOA TALAIMANU KETI (Gagaemauga Nu.3): Ou te manatu ua sao i alo le taliga o le sua i lenei taeao aua se faamalositino o lau Afioga i le Fofoga Fetalai, lau Afioga i le Palemia ma le mamalu o le Maota. E momoli ai le faamalo ma le faafetai i le Failautusi o le Fono Aoao ma le Ofisa i tapenaga o lenei taeao. Lau Afioga i le Fofoga Fetalai, afai e tapisa Tiafau, sala ina tapisa aua e le tuuaunoaina e le Faga le matagi e agivale. O lele ua maea ona faaifo le Amouta aua le eaea ma le ifoifo o le atunuu i lenei 5 tausaga. Ua maea foi ona faaae le Amotai, aua le laina ma le timuia o Samoa ma lana tautua. A o le aso, o le toe aso nai Moamoa, fai mai o le aso e faitau ai ai. A o a ia mea? O aso e faitau ai galuega sa faatino i lenei Paeaiga e 5 tausaga ua toe o se aga ona faamaea lea. Afai la e umi se tautalaga, sala ina umi. Ae ou te manatua ai le lauga a Iuli, tulou, na lauga ai i le 2 po 2 ao, na ola ai le Faletuamasaga. A o le taeao e faapea ae ai le Palemene o Samoa ma le atunuu tofi, se i usu se pese, se i lagi se vii e viia ai le Suafa mamalu o le Atua, ua afua ai ona ae manuia faiva. Lea ua tatou i ai i le faaiuiuina o le Paeaiga. A tatou toe tutu ma tepa i asaga o le tatou folauga, a, se Atua ina a alofa mo Samoa. E le o se folauga na lagomaluina, e i ai taimi na laga ai peauoso ma peaulaga o le gataifale. Peitai, e Silisili Ese le Alofa o le Atua e faavae i ai le Malo Tutoatasi o Samoa. Lau Afioga i le Fofoga Fetalai o le aso ma le filiga, o le aso foi ma le mataigatila. E igoa aso ona o le taua o le mea sa tupu ai, e faitau foi taeao ona o le ofoofogia o mea na tutupu ai, o le faitau lea faale-atunuu. Lau Afioga i le Fofoga Fetalai, o le faitau faa-Palemene o le tasi lenei o Fonotaga e faamemelo i ai, e faitau i ai le tele o Paeaiga talu lona tutoatasi. E i ai le lagona e faapena le Paeaiga Lona XVI lenei o le Palemene o le Malo Tutoatasi o Samoa. O le fesili; aisea? A e tu ai ma toe tepa i asaga o le folauga i lena 5 tausaga i mea tetele na faia e le Atua mo Samoa ma ona tagata e ala i le Faigamalo, e iloa ai filiga, aua e leotele galuega nai lo upu. Paga lea, lau Afioga i le Fofoga Fetalai, ou te le alu loa, silasila mai i le teu lea ma te nofonofo i le Maota, e le galo Afia i lona vao. A o upu lava o aso 1221 faapenei, e momoe lava ma manu ae sau mala e atiae. Talofa i ia uso, le Afioga ia Pau Sefo Pau ma le Afioga ia Vaafusuaga ma te soosootauau i aso uma o Fonotaga. Talofa, uso, e le galo oe. Sau ia ina alu, aua e le aiaina e le mea na fai le na ia faia ia. Fai le finagalo o le Atua, ae le galo lou sao na tatou ofi mai ai i lena 5 tausaga, e te tamua lava i Paeaiga uma ma Fonotaga uma a le Palemene. Ia mua laia lou sao i luma o le Atua, maua sou nofoaga mau aua le ola e faavavau. Faamaise ma faamafanafana i le afioga i le faletua ma le fanau, aemaise le paia maualuga o le itumalo. Malaga ia ma le alofa o le Atua. Lau Afioga i le Fofoga Fetalai, o oe o le pao ma le vavao e leai se isi e sili atu ma tua mai, aua le tausiga o le filemu o le Maota lenei, ae faafetai ua maua se avanoa sei nono ni manatu o lenei usugafono, e le gata i le Tala Faatatau Faaopoopo (Nu.1) o le Tupe 2020/2021, ae se i momoli aloaia ai le agaga faamalo ma le agaga faafetai i le mamalu o lou itumalo, Gagaemauga Nu.3, lea ua Nu.2 mo le faiga palota i tama fanau uma i Samoa nei ma atunuu i fafo, aua la outou tapuaiga mau i lenei 5 tausaga. O Samoa e matafanua i Malaefonoa ae mulifanua i eleele sa o le Tonumaipea, o fanua e tausi e le Alataua, ua iloa ona fetu pupula, ua manino foi ona tupua tausi. Fai mai o le atunuu e mamala. Afai e sii se vae e faatulou, a sii se lima e faatulou, a savali foi pe tu e faatulou, aemaise foi pe a tautala ma saunoa, e faapoipoi laau tuvanu. Ou te manatu o lea ua taoto tanu le fatuloa o tofiga, ua maape foi le tafai lauoo o mavaega, aua ua tatou tausi tuufaasolo faaaloaloga a o tatou tuaa ua tofafa i tiasa. Lau Afioga i le Fofoga Fetalai, o lea ua afulelea le tausaga, ua magoto foi le igafo, ua gase atu foi le au i Fagalele, aua o lea ua fou le fua o tuaau e faaae i fanua le faatautaiga o lenei Paeaiga. O le ala lea o le faaosofia o le manu mai Salafai, ae malaga le manu sa tupapa, se i faailo le agaga o le faafetai ma le faamalo, aua e le sili le tai i le tapuai, e le sili foi moa i le matagi. Peitai, e muamua ona ou tata le liu i le fotuga ma ou taia le tavaimatoo, ma sulu le tausuluga e pei o le fetalaiga i le Saopapa i le paia satuafafafa o le Maota o Samoa, le Maota fai mai e le atu matatulutuluina, a o le fale e atofuli, aua ua taotoga a iasa lona anofale, e pei o le tala e fai ia Tooa ma Fitimaupologa. O tupu ma ee, o taitai filifilia o le atunuu tofi, aua e talatau Toga, ae o oe Samoa o le atunuu tofi. Lau Afioga i le Fofoga Fetalai, se ua asaasagata le alavaa o lenei taeao, ua le gata ina sousou ae ua galua foi i sa folau o le itumalo sa asa le gasu o le taeao. Ae ui a i lea, o Matautu, o le tautai ua masani i aso faigata, ua masani i le faitauga o galu, ua iloa foi apefoe e sao ai ma vave ona oo i le aloalo, e le tae otaota foi. O lea ua mafua ai ona ou tu i Taumeasina ae tepa i Matagofie e pei o upu e fai i eleele o le fale Vaimauga, aua o lele ua taufai sunui ao o le lagi, le lagi to i le ala ma le lagi to i le tai, ae a le lagi to i le ea ina ua sootuli taitai o le atunuu ma ua atoa ai le faga i Laua, lele ua taufai puea foi le matila ma le ofeloa e pei o le upu e fai i le gataifale. Ua nofoia foi pou o 1222 lauga aua ua atoa tupe i le fala, e pei o le upu e fai i le matuauu ma le au seepapa. Ae a le malutauee o le Maota i Tiafau nei, lele e lauvivilu ai tulatoa ma le au fueloloa o le atunuu, fai mai o le Maota o le tagati’a, o le Maota o le tagamanu, o le Maota e fesilafai ai tupu ma tamalii ae fetaliai le faautautaga ma le moe a Samoa aua upufai o ana Faigamalo. A o le Maota foi fai mai e faautuutu ai le tagi aua o le Maota e tapuaia e le atunuu. Lau Afioga i le Fofoga Fetalai, se ua se togi lau seu na lagatila. O lea ua e taia i le tutafaitoa ma e faautuutu salefu, se i tea mea i Matautusa ma momoli lapalapa o malo i Fogaa, a o se tatou utugataufa ma le atunuu tofi. Se i sula le aao laveai ma le agalelei o le Atua o Sapaota, ona o lo outou soifua maua, e i ai ona tepa i ula ma tago i ula, ma sei i ula i lenei taeao matagofie. Ua malo fai o le faiva, o oe lava o le maa faafuagalu i aso faapenei. A o upu lava a le Tusi, “Aua ne i ia te i tatou Ieova e, aua ne i ia te i tatou se mea e tasi, a o le viiga ma le faamanu i le Atua, ia faasilisiliina lea i mea uma e manao i ai le tagata.” Faafetai faafetai mo le tapenaga o lenei aso. Lau Afioga i le Fofoga Fetalai, ina ne i ou momoo la i ia o le loloto i lenei laolao faaauro ua e tatala mai, ae galo ai ia te au figota o le aloalo. Aua e usu taa ae talanoa aualuma. E tagisi lava figota ae malamagia i le fatiga o galu. Aua o ona momoga e tali malie ai le manao ma le galala o aso uma. Aemaise ai, o lenei ua siliofe ma silimea le faatautaiga a le sa tele o lenei Paeaiga. O upu lava e masani ai le motusa, a oo ina faalelefulu, fai mai e muamua lava ona lauvae manu a le Tuimanua. O le a le tele o manu, e iloagofie lava manu a le Tuimanua i ona lauvae. Ae ou te le i taia la le tuluvao ma ou faaumutitiu le faiva o Leapaga aua se sao o lenei itumalo, e uiga i le Tala Faatatau Faaopoopo o le Tupe 2020/2021 P.P. 115, o lea ua faataoto nei i le Maota, lau Afioga i le Fofoga Fetalai, ou te muai faatulou i le tapuaiga le leoa, papa le gaee a lau Afioga i Le Ao o le Malo, lau Afioga Tuiaana Tuimalealiifano Vaaletoa II ma lau Masiofo. Ae a le fala le see i le tapuaiga a le sui o le Fono a Sui Tofia, lau Afioga Le Mamea Ropati Mualia ma lou faletua. A o le mamalu lava ia ma paia aua le tapuaiga a Aiga ma a latou Tama, oTama foi ma o latou Aiga, le Usoga ia Tumua ma Pule o tootoo sinasina, aua le tausiga o Lalogafuafua o Malie ma Vaitoelau, Maauga ma Nuuausala ae tainane foi Fuifatu ma Vaituutuu, o Finao ma Matia ma Matia Ituau, Faletoi ma Vailoa, Ituau ma Alataua Aiga i le Tai ma le Vaa o Fonoti. Ae a Aiga o Tupu, Aiga o Nofo, Aiga o Papa ma Aiga na Tafaifa. Ua matalupe foi le seuga i le pau o le Maota i lenei taeao, ou te faatulou atu ai i le afio mai o lau Afioga i le Palemia o le Malo Tutoatasi o Samoa, Susuga i le Alo o le Malietoa o le Tama Punefu, o le Aloalii o le Laau na Fausia, lau Susuga Tuilaepa Fatialofa Auelua Galumalemana Dr. Aiono Sailele Malielegaoi, o le Taitai o le Maota, o le Taitai o le Malo.

1223

Ou te faatulou atu foi i le aiga Minisita o le Kapeneta, o e o lo o latou lufilufina le tamaoaiga o le atunuu, ma le mamalu le vaea o a outou Afioga i Minisita Lagolago. Ou te faatulou atu foi i le ee mai o lau Afioga i le Fofoga Fetalai o le Maota o le Fono Aoao Faitulafono a le Malo Tutoatasi o Samoa, lau Afioga Leaupepe Toleafoa Apulu Faafisi, aua Samoa mo Samoa, faapea lupe papagata na faia mai i le fuifui, o sui usufono mamalu uma o le Palemene o lenei Paeaiga. Ou te faatulou foi i le tapuaiga a lau Afioga i le Faamasino Sili faapea lau Afioga i le Peresetene o le Faamasinoga o Fanua ma Suafa, afioga i alii ma tamaitai o le Faamasinoga faapea le Matagaluega ma le auaunaga faale- Faamasinoga. A o mamalu tauee ia ma paia le popo ia o le Pulega o le Faigamalo i le Tafatolu o ona itu tetele Fefaatauagai, e tumau pea. E le toe vaea le falaooto i sa matou upu, tulou. Ou te faatalofa foi i le faafofoga tapuai mai a le Faigamalo a Tutuila ma Manua, lau Afioga i le Kovana ma le Lutena Kovana, le paia o lau Faigamalo i Maota e 2, ma le mamalu o sui usufono uma o lau Palemene. O le paia lava lea aua le motu o Salaia i le Faleagafulu, Sua ma Vaifanua, Fofo ma Itulagi, Saole ma Saleaaumua, Ituau ma Alataua ma le Launiu na Saelua. Tainane foi le paia o le Motusa aua o le Laaunaamotasi. Faatui o le Motu le Tootoo o le Faleula ma upu ia te oe le Manuatele. O paia ia, o mamalu ia sauoo o Samoa mai lava i le fatifati aluga ma le fatifati alalo ma le taisamasama o le Matasaua, seia paia le tai ulaula o Nafanua, ae a Fili ma Puletuu na tauilo ai Malo. Ou te manatu, o le a nuunuu atu ia faatini o tausala, e le agatonuina i se lauga a Gagaemauga Nu 2. E faatalofa i le paia o le aufaigaluega galulue a le Atua, o outou lava o tama sa i so o se fatafaitaulaga o le atunuu. Talofa, ae faamalo ma faafetai le tatalo, ua malie i la outou tapuaiga, ua manuia faiva o le Malo ma le Palemene i lenei 5 tausaga, ona o la outou faanonogamanu i le Atua. A ua matagofie ma faigofie ai mea uma, aua se manuia o Samoa ma ona tagata. E momoli le faafetai ma le faamalo i le mamalu o Ofisa Sili o Pulega o Matagaluega. Ioe, ae a Faalapotopotoga Tumaoti a le Malo, e faapea foi le mamalu o le aufaipisinisi a le atunuu. Malo le toa, malo galulue, faafetai le onosai, e taua tele lo outou sao e sologa manuia ai fuafuaga alumamao a lo tatou Malo. O le upu moni, o outou lava o lima ma vae a le Faigamalo, faamanuia le Atua i outou faiva ma outou tiute. E momoli lau faafetai ma lau faamalo i lau susuga i le Failautusi o le Maota, le tatou galuega fai, e faapea foi lau afioga i le Sui Failautusi, ma le mamalu o le Ofisa o le Fono Aoao Faitulafono. Ioe. Malo galulue, malo tautua le faatuaoia, o outou lava o le tao velo a le Palemene. O lo outou soifua lafoai ma le auaunaga i aso uma lea ua sologa manuia ai taualumaga o le Paeaiga Lona XVI a le Palemene. Faafetai tele mo mea uma, faamanuia le Atua.

1224

Lau Afioga i le Fofoga Fetalai, o upu lava o le gataifale, ta te momoo lava i ni i’a ae manumanu i le upega, aua o le upega e tautau ae fagota. Ou te tautala ai ma le faaeteete ma le migao e tatau ai, e faafetaia ma faafeiloai ma faatalofa i si ou itumalo pele o Gagaemauga Nu 2 e amata mai i Fanuatanu ma Asofaatau, Matautu ma Mutiatele, Siliga ma Falefaamaoi, Fuafuamaua, Malae ma Tulaga e oo atu lava i Maloamata. Ae a Punale ae matua lava le tuu i lou tupua tausi i Falefagamalo. O le paia lava lea aua le afifio o le Aiga sa Peseta, susu Leota o le Maoputasi. Alalatai o le Usoalii ma le nofo a ituaiga i le Faleiva ma upu ia te oe Matautu, o le faamaluga o Malo, aua o oe o le Muaautasi. E faapea foi ona ou faatalofa ma faafeiloai i lou nuu o Satoalepai, aua le afio o Maiava ma le susu o Mataia. O le paia lava aua le Aiga Sa Peseta, alaalatai lau fetalaiga i le Aitutagata, ma le mamalu ia te oe Satoalepai. Ou te momoli atu lau faafetai tele i lou afioaga i Safai. O le paia aua le afio o Suisala o le nofoamatua o le aiga sa Peseta. Afifio mai Lilo ma Lemaveve, alalatai le mamalu i le Leatifaimatinomafai o le upu ia te oe Matautu. Malo le tapuai mai. E faapitoa lau faafetai i lau afioga Lemaveve ma lau tapuaiga. E lagona pea e lou fatu lou tuumumusu ma lau fautuaga ia te au. Faafetai tele taofi mamalu o la ta itumalo. Ai ua e manatu o Mataia lea ua tauva i le faigapalota. O le sui o le Aiga sa Peseta, o tapaau e tausi e Matautu, faafetai tele, faafetai i lou manatu mai. Lo tatou nuu o Safai lava o Vaipouli lena. E tasi lo outou faalupega talu mai le amataga o le nuu lenei. O oe o le malu o le Falefagamalo, e na o oulua foi e fai la oulua segi, pe a oo ina potopoto lo tatou itumalo i mea e fai. O le molimau ola lena, Safai, o taua lava o Matautu, faafetai tele i lo outou manatu mai. Ai ua outou manatu o Valu lea ua tauva i le faigapalota. Lou nuu e, o lena ua outou silasila ua tali lo outou manao, o lena foi ua fai suiga o lo outou auala e pei ona outou mananao ai ma finagalo i ai i le vaiaso ua sola. Faafetai i le Afioga i le Minisita o Galuega ma le Ofisa Sili o Pulega le afioga i le Aloalii. Ua matala ia sega lena ua fai le finagalo o lo tatou nuu, faafetai le tapuai mai. O la outou tapuaiga na afua ai ona tatala le fingalo o le Afioga i le Minisita, i le tulaga e pei ona manaomia. Aua lo tatou agai e galuegaina lo tatou laufanua, faafetai tele. Ou te momoli atu foi i le agaga maualalo le faafetai tele i lo matou afioaga o Satoalepai. O le paia aua le afio o Maiava ma le susu o Mataia, o le aiga o sa Peseta. Maliu mai lau fetalaiga Mauigoa, o oe o le aitutagata, o le aitu o le ao ma le aitu o le po, o le aitu savali ma upu ia te oe Satoalepai. Ae a lou tupua tausi Faletoalepai, faafetai i la outou tofa na ae i lena aso o le tatou Fonotaga. Maiava ma Maiava ma lo outou aiga sa Maiava, faapea le au faiupu ma lo tatou nuu. Faafetai mo la outou faaaloalo ia Mataia ma lo outou aiga sa Mataia, faapea le aitu tagata. Ou te manatua pea i lou loto e le galo, ia upu o lena aso ae tatou te le i taape. Ua tasi lo tatou nuu, malo faafetai, alofagia e le Atua maua pea le tofa faatupu aua lo tatou nonofo fealofani. 1225

Ma ia foai mai pea sou malosi e faatino ai pea lau tautua faaauau i le mamalu o lo tatou nuu. O lena ua outou silasila, e le tau tolaulauina ia Satoalepai galuega sa faatino i lo outou finagalo. O lena ua taoto atu le suavai mama, ua oo lava i uta i le mea e afifio ai lo tatou nuu. Ou te le taliaaina, o lea e faafetai ai i le Malo o le HRPP, i lo outou tali manao. O lena ua maea lo outou auala, o se taimi o i luma ona umusa lea. A o le agaga ia te au lo outou tofi filifilia, faafetai i le tuualalo, faafetai i la outou tapuaiga leleoa e po pea le fala, aua le aifilofilo ai o Mataia i faalagamaea i Tiafau nei. Ou te momoli atu lau faafetai tele i lo tatou afioaga o Fagamalo. Fagamalo o outou lava o tootoouli o lo o tausia ma faafaileleina upu ma le mamalu o le tupua o le Tuifiti. E tapuvaetasi i ai lo tatou itumalo i ana mea e fai, e taaalo lava tama ae o le uso. Lau afioga i le tiakono toeaina, o lea ua e faaeleelea i nei mea o polokiki, a o le upu moni, e tagitagi pea i ou taliga au saunoaga ma au faamanuiaga. Ia manuia le faaauauina o lou tofi faipule, a o faafofoga le itumalo na masii mai mo le taumafaiga o le falemai. E taofi, e faapea le faasaoina o le tatou faalupega, e le galo. E oo mai lava i le taeao lenei o lea lava e tagitagi i ou taliga. Aisea, aisea ou te manatua ai pea? Fai mai Afioga Paia a le Atua, “o mea e fusifusia i lalo nei, e fusifusia foi i luga.” Ae ai o i ina na mapuna ae ai le tala i lena tausaga, lena tausaga atoa, ailoga e i ai se tatou palota e faia. Lau Afioga i le tootoouli o Matautu, e i ai lou talitonuga atoatoa e te tausi vaatele i tapaau. Le paia o le aiga sa Peseta o Mataia lea ua alu i le palota, e te tausi vaatele. E ui lava i lea, ou te talitoni i lau tofa o le tofa matua. Seuamuli, e faitau ia te oe lauga a Matautu. E le faua mai i tua upu a lo ta nuu, e leai. O le tatou nonofo ai, o i i Matautu na afua ai foi le isi upu lea. “E taaalo lava tama, a o le uso.” O Matautu o le.....E le faua mai tua se mea, a o le agaga lena, ia sologa manuia mea uma a lo tatou nuu. A ou toe tu ma faatepa, i le aso o lou oo, ioe, na muamua lava i Falefagamalo, aisea? Ia opo mamalu lo ta nuu. O le agaga o lenei aso, ia ta maua le loto fealofani.

Susuga Hon Laauli Polataivao Leuatea: Lau Afioga i le Fofoga Fetalai, pe maua lava se avanoa faamolemole.

FOFOGA FETALAI: O lo o i ai le faauilavea. Se i fai se malologa a lau Afioga, aiga sa Maiava, faapea le au faiupu ma lo tatou nuu. Faafetai mo la outou faaaloalo ia Mataia ma lo outou aiga sa Mataia, faapea le aitu tagata...

Susuga Hon Laauli Polataivao Leuatea: E tulai atu pea ma le faaaloalo

Tofa NAFOITOA TALAIMANU KETI: Ou te tausisi i Tulafono Tumau lau Afioga. Vagana ua e faatonuina au ou te nofo i lalo. Ae afai e leai se avanoa o le Afioga o le sui usufono o lo o tulai, e faaauau pea le lauga a Matautu. E seasea seua e se isi le lauga a Matautu, leaga o Matautu e uu i 1226 ona lima taumatau le tao, e silafia lelei e lou uso, e te silafia foi le mea lea ou te faia.

Susuga Hon Laauli Polataivao Leuatea: Lau Afioga i le Fofoga Fetalai, e pei o le ala lea o lou piipiiama atu a o folau le sa. Matautu o upu lava nei o le Nofoaiga lenei e tausi pea lo tatou va nonofo. O i foi sa ou apaapa lava ia te oe i le amataga, o tatou o le aiga, Gagae Gagaifo o le aiga. Ae ua ou matau i le taeao lenei, se pei ua e fefe, ioe, pei ua e popole. O lea ou te apaapa lau Afioga i le Fofoga Fetalai, le tatou Tulafono Tumau lau Afioga.

Tofa NAFOITOA TALAIMANU KETI: Malie lau Afioga i le Fofoga Fetalai, ou te le iloa po o se faauilavea po o se aoaiga. E leaga o lena ua taoto i ina Tulafono Tumau ma le faaalolao.

Susuga Hon Laauli Polataivao Leuatea: O le Tulafono Tumau, e le mafai ona tali mai le o le a tauva i le tofi, le afioga i le Tiakono Toeaina. Nafoitoa fuafua mamao le tofa o la e tapuai le tatou nuu. O lea foi na ou tuualalo foi ia Falealili i mea ia, aua le avea le naunauta e toia ai le va. E le o tali mai le Tiakono Toeaina i lona finagalo ua alu ai. Ioe, o lau saunoaga o lena e i ina le power mea uma, e te sau ma le power ma le pelu, ae ou te alu atu ia te oe i le suafa o Iesu Keriso.

Tofa NAFOITOA TALAIMANU KETI: Faafetai o lea ua maua le faauilavea. Faafetai i lau Afioga i le Fofoga Fetalai.

Susuga Hon Laauli Polataivao Leuatea: Tuutuu mamao le tofa e le o tali mai le Tiakono Toeaina. E le o mafai ona tali mai, o Tulafono Tumau na, ae aua e te faaoloataua le itumalo.

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, e na o le pau lava le mea e fai e le sui, na ona tu i luga faaali lana...O le mea lea e fia faasao, tu i luga faaali lona finagalo ona toe alala mai lea i lalo. Ae o le a lauga ai lava, lauga ai lava, ae mafua foi ona tutupu mea ia, o ia lea e faaosoa tagata. Lau Afioga i le Fofoga Fetalai, e faatupu faaoloataua faaoloataua ona toe tu ae lea taofi fua lauga a isi. Lau Afioga i le Fofoga Fetalai, e pei o le mea lena, na ona ou tu atu e faasao le sui usufono.

Susuga Hon Laauli Polataivao Leuatea: E lau Afioga i le Palemia, e tiga le mea moni? Se aua la e te faaoloataua le atunuu, o lea matou te talitali atu i au mea ia e fai i le TV i le po ma le ao i le Aso Gafua e tau i le Aso Sa.

1227

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, o le mea e fia faasao. O le mea tonu lava lea na ala ai ona tu, ua tiga ia te ia le lauga a Matautu, aua la le mea o le osovale.

Susuga Hon Laauli Polataivao Leuatea: Matautu malie lou finagalo, o lea na ou agai atu ia te oe, ua e silafia lelei lou lagolago ia te oe i le Nofoaiga lenei. Aua ne i galo, aua ne i galo, po o le a lou manatu ta te le feagai, ta te feagai. O lea ua ou fai atu, malie lou finagalo, o le aiatatau a le tiakono toeaina, lea ua alu ai.

FOFOGA FETALAI: Malie le sui usufono.

Susuga Hon Laauli Polataivao Leuatea: O ou aiga uma o lo o faalogologo mai i le itumalo, o lea ua outou silafia le mea lea ou te tu ai,

FOFOGA FETALAI: Malie le sui usufono, se se i....

Susuga Hon Tuilaepa Auelua Fatialofa Lupesoliai Lolofietele Neioti Aiono Galumalemana Dr. Sailele Malielegaoi: Lau Afioga i le Fofoga Fetalai, se ua fai soo le mea lea o le solifono.

FOFOGA FETALAI: Faamalulu atu foi i lau Afioga i le Palemia se i onosai mai.

Afioga Sulamanaia Fetaiai Tauilili Tuivasa: Lau Afioga i le Fofoga Fetalai, o se mea e fia faamalamalama. Pe maua se avanoa o le Vaimauga?

FOFOGA FETALAI: Se i aumai lava se finagalo o le Vaimauga pe mata e mafai ona fofo ai le faafitauli lea.

Afioga Sulamanaia Fetaiai Tauilili Tuivasa: E masalo e le faalavelave lava le Vaimauga i Sasae i le lauga a Matautu. E silafia foi e lau Afioga i le Fofoga Fetalai ma le mamalu o lenei Palemene, o le uso nei a vaai ai tagata e pei lava maua o se uso. E pau lava le mea e aulelei le sui usufono o le Vaimauga. A o le saunoaga a Matautu po o le fetalaiga a Matautu lea na opea i le Maota, fai mai e leai se isi e faalavelaveina le saunoaga a Matautu i le Palemene lenei. E pule Tuisamau faamolemole, o lea ou te nofo, o le ala foi lea o lea lava e le i faia se lauga a lenei itumalo, leaga o lou eleele lenei e faauma i ai. Ae Matautu, e na o Tuisamau lava e tatau ona e vaai mai i ai, e mafai ona seua oe i le Maota lenei. E pei o se tala lena e avatu i le Fofoga Fetalai, ia manuia le faaauauina o lau lauga Matautu.

1228

FOFOGA FETALAI: O la ua iloa lava e le tagata ia lona sese ma lona solifono. E faavasega lava e outou ae faaauauia le saunoaga, foi maia i le lalolagi lea tatou te i ai.

Tofa NAFOITOA TALAIMANU KETI: Se i ou afe lava lau Afioga i se fuaiupu lava e tasi ou te fia taua ai le mea lea e saunoa i ai le sui mamalu mai Gagaifomauga Nu 3. E silafia e le Atua le faamatalaga ua e faia, ioe, e le sese. O le ala foi lea o lea e faitio ai tagata ia te au i lena aso. Aisea? O loimata na maligi ifo, ae fai mai o le isupe tape, e leai, e leai. O le agaga lena, e tau atu i ina, momoli atu le faafetai tele, ae le mafai ai ona aveesea ai le amiotonu a le Atua, i lou tiute faafaipule o Gagaemauga Nu 2. O lou saunoa foi sa tatau ona ou alu atu i ina, malie Laaulialemalietoa, e leai ou te mulimuli lava i le amiotonu a le Atua.

Susuga Hon Laauli Polataivao Leuatea: O se mea e fia faasao lau Afioga i le Fofoga Fetalai, Nafoitoa, e le i i ai sau upu e te afio mai i inei. Not even a word. O lena ua uma lava ona e ta vave lo ta va, ta o ai i ina i le faigapalota lea e lumanai. Loto tele, loto tele ma e sauni lelei, matua faatau lelei ni au solo taele mafiafia lelei e te lua feagai ma le tiakono toeaina.

FOFOGA FETALAI: Malo faafetai.

Tofa NAFOITOA TALAIMANU KETI: Laauli, ua e faamaualuga tele ma au saunoaga. Ae aua ne i galo ia te oe, e fesili Gagaifo i le Gagae, a o lau saunoaga i le aso, sauni oe, sauni ane la, pe afai o lau saunoaga lea, e tali le faigapalota.

Susuga Hon Laauli Polataivao Leuatea: O le a ta faapena ona fai. Lau Afioga i le Fofoga Fetalai, e pau lava lea o le mea na ou tulai ai, e le mafai ona tali mai le uso, o le mea lena na ou oo i ai, ae faamama ia le sausau. Lafo i lo ta itumalo, lafo i lo tatou aiga o latou e faia tonu.

FOFOGA FETALAI: Leaga o lea o le a faataumatatao...Taoto ai loa faapea leaga o lea lava e manao e tali le upu i le upu, e le faapena se tofa. O le tofa a le aumatutua e faapena e alu alu lava faapea e pule ta ita i lo ta loto e sili atu i lo le toa. O le upu lena e limataitaina ai le tofa fetalala’i. O le mea la lea, e le avea ai ni ai pe faiaina ai se isi i lo ta pule lava o ta ita i lo ta loto. E pau o le mea o le faitau mai a le aumatutua ma le lalolagi e fai mafaufau, faapea, aa leaga le tagata e tele le tofa. O le mea la lea, taoto ia faapea se i faaauau le saunoaga a lea uso. se o tatou e...

Afioga Fuimaono Teo Samuelu Teo: Lau Afioga i le Fofoga Fetalai, pe maua se avanoa. 1229

FOFOGA FETALAI: Se malie ia Falealili, o se mea e fesoasoani ai i le mataupu..

Afioga Fuimaono Teo Samuelu Teo: O le tulaga lava o le aafia fua o le maaveave le fua i le saunoaga a le faauilavea. Ia agai sao lava lana saunoaga i se mea e fia faauilavea i le sui usufono o lo o saunoa. Ae o le toe taua lea o lou itumalo, o lea ua taoto, ua uma upu i le taeao lena, o lea foi ua tau lau faaoloataua, o lena. E aua la le fiafia e tau le upu lea faaoloataua, ae o la e solomua ia ia le fai o le mea lea. Ma lou agaga faaaloalo.

FOFOGA FETALAI: Malie ia Falealili, se pei o lea ua e...ua e toe lagalaga le mataupu a o lea ua uma. Ou te le o malamalama po o le a le itumalo o lea e te saunoa i ai. Malie ia le sui usufono e tulai mai, lau Afioga i le sui Fofoga Fetalai.

Tofa NAFOITOA TALAIMANU KETI: Faafetai i lau Afioga i le Fofoga Fetalai, e manatu e le toe amanaia le pola motu i tua. O le saunoaga Laauli, ia tasi ia ae foi. O lea lava ou te talanoa au i lou itumalo e le aiaina e le Gagaifomauga, o le matou va nonofo ai ma le tausiga o le Falefagamalo le matou malaefono. O le agaga lena, ae ui i lea, o le a faaauau le lauga. O Matautu o le nuu tau...

FOFOGA FETALAI: Laauli aua ne i e toe faalavelave i le lauga a le sui Fofoga Fetalai faamolemole.

Tofa NAFOITOA TALAIMANU KETI: E le faaaua e se isi Matautu, lou nuu faafetai le manatu mai, tatou o e tuli i luma so tatou ai, ae toe momoli atu lau faafetai ma lau faamalo i le tapuaiga a le tupua. Ou te le masaloslo, e ui lava ina ou tautala soo i le upu lea, e tasi i taua, tasi lo ta faalupega, e tasi la ta savali. E ta te toa ai o Sua ma Faalea. E momoli atu lau faafetai tele i lo tatou afioaga i Lelepa, lo outou fala fofola aua Futu ma lo outou aiga sa Mui, Fusi ma Falemaota, ae a Fuafuamaua ma le Falelaufao i Lalofau. O paia aua le afio o Muliaga, le Nofo Usoalii o le ituaiga i Faleiva ma le mamalu ia oe Matautu. Malo tapuai mai. O le upu moni, o tatou lava o le Falefa. E tatou te faifaimea faatasi i mea uma. E tasi lo ta auala galue, tasi lo ta nuu, tasi lo ta faalupega, tasi lo ta faasinomaga, tasi lo ta fatu. E faapena foi ona tasi le ta savali o Sua ma Faalea o Matautu o le muaautasi. O le muaaufaalele o le muaautau foi e te lave i manino, e te lave foi i le aava. O le tatalo i lo tatou nuu, na ua outou silasila i galuega e le i maea. E fia faamaea a tatou galuega tetele sa amata. Ma e tatau ona faataunuu i lena Paeaiga fou o lumanai. E momoli atu lau faafetai i le faapalepale mai. Ua

1230 manuia faiva ona o la outou tapuaiga leleoa. Faafetai i lo outou nofo malamalama i mea uma. O si ou nuu pele o Avao, o si ou nuu o lo o tanu ai lou pute i le papa o Misi, i le vaega tonu o lo o tu ai le maa faamanatu na liliu ai le Tusi Paia i le Gagana Samoa. O lona uiga, e le o se futu na tafea atu. Leai, o le tama lava o le eleele o le tama a Tutula ma Tutula. Avao ua e masani i le sailimalo. Leota ma Aiga, o oe lava o le tama faasausau o Matautu. O oe o le ua faalanumaaveave. O lau Afioga o le Maoputasi. E na o oe foi e te lave i le manino, e te lave foi i le aava. Lau Afioga Lealaiauloto, Galuvao ma Nafoitoa ma Tuipoloa, Tivai, Tataimata, Seuamuli ma Tiatia, ma lou tou siapo lautele e le vaea. Faafetai i la outou faautautaga, taofi iumaea aua se manuia o le ta itumalo o lo outou lava lea finagalo, aua ne i faapito Manu ia Tasi, a ia opo le itumalo atoa. Faafetai mo a outou fautuaga, o lo outou tapuaiga sa po fala ma feula mai le mulila, lea ua toe o se aga ona faamaea lea o lenei Paeaiga. E leai lava se mea o gase, manuia mea uma. O la matou tatalo, ia i ai pea faamanuiaga a le Atua i lo tatou nuu ma ana tama fanau o lo o faaopea i itu e 4 o le lalolagi, aua sailigamalo mo tatou aiga o le tatou nuu, aemaise le galuega pele a le Atua. O le Atua, o Ia lava e faasinoala ma faatonufolauina lo tatou lumanai, alofagia e le Atua, faamanuia i le tatou saofaiga. E momoli atu lau faafetai tele i lou pitonuu o Vaipouli aasa, Paia aua le Afio o Pese ma Mautele, alalatai le Falefa o Saosofia, mamalu ia Saaulema, ma le Faamalugaomalo, Toa, Nuutoalii, Aitaulia Malaematiapue, ou te tautau pea outou i mea ou te alu i ai. Faafetai tele mo lo outou faiuso moni ua outou manatu ai ia Valu lea ua fai ma avefua o lo outou itumalo i upufai o le Faigamalo. Ioe, o oe lava o le malu o le Falefagamalo. Ua ulimasao le Nofoaiga a lo outou uso ona o la outou tatalo. Faafetai tele mo mea uma. Saleia, Saleia o oe lava o le oneonesina, e le i soona tuua oe e le Atua e te tupito i lo tatou nuu. E te tofa i le Gagae ma le Gagaifo, e fai oe ma talipupuni i taimi o faigata. A ua le ese foi oe ma le tagata vaai, e ola ai le nuu i ou faiva alofilima. E te le moe, e te le tulemoe lava. E te moe manatunatu aua se manuia o le tatou nuu. Faafetai i le Paia o le tatou afioaga, aua le afio o le alo o Lilomaiava. Lau Afioga Paletaoga, alalatai ia le tou Toafa, faapea Saletuga ma le Vainalelepa. Faafetai i mea uma, na afua ona maua manatu, ona o la outou tatalo. Faafetai tele le faaaloalo. O lau faafetai faapitoa mo le Aiga Salevi o lou itumalo. Lau Susuga i le tausi Matagaluega i le Ekalesia Metotisi i Avao, Vaipouli ma Saleia, lau Susuga Pulea Tiumalu ma le faletua, lau Susuga i le Faafeagaiga Tavita Kirisimasi Salaa ma le faletua EFKS i Avao, lau Susuga Siaki ma le faletua, Ekalesia VOC i Saleia, lau Susuga Ali ma le faletua i le EFKS i Lelepa, lau Susuga Tauletoga ma le faletua i le EFKS i Fagamalo, Susuga i Epikopo Scott ma le Lealaiauloto Vili ma oulua faletua a le Ekalesia Mamona, lau Tofa Faamoetauloa Pomale, Taitai o le Faatuatuaga Bahai, lau Susuga 1231

Atapana ma le faletua EFKS i Satoalepai, lau Susuga Salesa ma le faletua Ekalesia Katoliko i Safai, lau Susuga Fa ma le faletua Ekalesia Assembly i Safai, lau Susuga Galuega Avau ma le faletua, Ekalesia Aso Fitu. Faafetai tele i la outou tapuaiga, faafetai tatalo mai.

FOFOGA FETALAI: Malo Faafetai, faaifo ia le lauga.

Tofa NAFOITOA TALAIMANU KETI: Agalelei ma faamanuia le Atua i lo outou feagai ai ma le galuega folafola a le Atua i totonu o si o tatou itumalo. Lau Afioga i le Fofoga Fetalai, se i ou afe atu i lau Afioga, se i ou afe atu e momoli aloaia atu lau faafetai tele ao faafofoga le Maota ma Samoa. Faafetai tele i lenei Paeaiga ma le ta galuega fai, aua le tausiga o le filemu o le Fonousu a Samoa, e ala i le Nofoa o le Fofoga Fetalai. Leaupepe Toleafoa, o lea ua faailoa lou malolo manumalo mai upufai o Faigamalo. Ae o le upu moni, ua tele se aoaoga mo au, ua tele lou aoaoina i le tauaveina o ia foi tiute faa-Palemene. E le galo lou alofa faatama i le galuega, e le galo ia te au. Ou te tautalatala ai pea i le lumanai. O le tatalo, ia alofagia e le Atua, foai atu nisi aso se tele i lou soifua auauna ma ia liligi ifo ana faamanuiaga i le aiga, aua se manuia mo le lumanai manuia. Ou te fia momoli foi lau faafetai tele i lau Vaega Faaupufai o le HRPP. Lau Afioga i le Taitai ma le HRPP, malo mo taitaiga lelei i lenei 5 tausaga. O upu lava i le tusi lauga a le Metotisi i le Aso Sa na tea nei, ‘ia taui le leaga i le lelei, e ala i le loto faamagalo’. Lau Afioga i le Taitai, o tofiga, o tofiga uma mai i le Atua. E tele suiga lelei ua faia, e le gata i Tulafono, ae o galuega tetele ua faatino. Ioe, e leotele galuega i lo o upu. Sagai ane laia mo lena Paeaiga o lumanai, faaauau lo outou valaauina e taitai Samoa, e ala i le loto faamagalo. E momoli lau faafetai tele i tama fanau uma a Samoa o afifio ma papaaao i atunuu i fafo, malo mo lo outou sao i le atinaeina o si o tatou atunuu laitiiti. O le upu moni e le pau fua so outou afu, e silafia e le Atua mea uma. O la matou tatalo, faamanuia le Atua ao nopiai ai i na atunuu mamao. E faapitoa ia i latou uma o e lagolagoina ma talitonuina le Faigamalo a le HRPP ma ana galuega lelei, momoli atu le faafetai tele i le tou lagolago mai. Ou te momoli lau faafetai tele i le taele o lou fatu, le paia o lau Komiti mamalu ma e uma na lagolagoina lou tulai mai i Upolu nei ma Savaii, faafetai tele i lo outou lotomau i le mea moni e lelei ai lo tatou itumalo. Ua outou molimau i galuega sa faatino, aua e le gata i le lautele o le itumalo ma ana tama fanau, a o aulotu faapea tagata taitasi i lau tautua faaauau i lenei 5 tausaga. E i ai lou talitonuga, o lo o tumau pea lo ta fetalitonuai a o tatou alo atu i le Faiga Palota tele i lenei tausaga.

1232

Faafetai i ou aiga uma i Samoa nei ma atunuu i fafo, pe afai o silasila mai, lou toalua ma si ata fanau. O le upu moni ou te le mafaia na o au se tofi ona e toatele le ta itumalo. Ae o la outou lagolago malosi mai, ua manuia ai lau Nofoaiga. Faafetai tele mo fautuaga ae ua moni ai upu o a tatou fonotatalo i aso uma, ‘e leai se mea e faigata i le Alii’. E leai se mea, a lea ua tau ai lo tatou ai, fai lea ma faaputugamaa i lena itu o le vai. E molimau i le Silisili Ese o le Atua. A fesili mai fanau o le a tutupu mai ia te outou, ona tau lea i ai, ‘ o le Atua na mafua ai, o le Atua na faaauau ai, ae e le o le malosi ma le poto o le tagata’. Lau Afioga i le Fofoga Fetalai o lau faafetai lea, afai ua galo se tasi ia te au, faamalulu atu, e galo i upu ae e le galo i lagona ma manatua pea i le loto lou agalelei. Fai mai upu o le nuu faigata o Isaraelu a o tagi i nuu ese, ‘Ierusalema e, afai e galo oe ia te au, ia galo lava i lou lima taumatau. Afai ou te le manatua oe, ia pipii ae lou laulaufaiva i lou gutu’. O lena foi se vaivaiga o la outou auauna sui usufono. E le galo, e le galo lo outou agalelei, faafetai i lo outou faapalepale mai, faapea lo outou finagalo malamalama i mea uma. Lau Afioga i le Fofoga Fetalai, ona ou oo mai lea i le Tala Faatatau Faaopoopo o le Tupe 2020/2021 e fia faamauina ai le agaga o lou tulai. E momoli atu le faamalo ma le faafetai i lau Afioga i le Minisita o Tupe, malo tapena. Ua mataitu e lenei itumalo ma lenei usugafono, le atoatoa ma lelei o ona tapenaga uma, le faatupeina ma le faasoaina $42 miliona. O le mea lea e momoli ai le faafetai tele, e ua tali manao o le atunuu, Faigamalo lelei. E fia momoli lau faafetai tele i le Komiti Faapitoa aua le feagai ai ma le puipuiga o Samoa, e pei ona i ai le tele o faamai. E matou te tatalo ia outou galuega ae faafetai o lea ua oo mai ai i le taeao lenei... sologa manuia ma taunuu manuia mea uma.

Tofa Olo Fiti Afoa Vaai: Lau Afioga i le Fofoga Fetalai...

FOFOGA FETALAI: Ia, se i tulai mai ia le sui usufono o Salega Sasae.

Tofa Olo Fiti Afoa Vaai: Ua alofa atu lava i lau Afioga a le Fofoga Fetalai, e pei sa tau leiloa lau faaauau i lau Sui Fofoga Fetalai ae o lea ua matua manino i le aso. Ia o... ua pasi mamao ma le 40 minute le lauga a lau Sui Fofoga Fetalai po o le a le.... ma le faaaloalo.

FOFOGA FETALAI: Ia, o lea o le a faaiu mai e le... e tonu lava ma sao le saunoaga ou te faamalulu atu foi i lau Afioga aemaise o sui usufono mamalu uma ia silasila foi o le tele o faauilavea ioe, a fua i le taaloga foi lenei i lakapi, ia o le tele o taimi lavea lea sa... ioe o lea ua umi ai le taimi. Ioe, e pei e faapena, ae e pei o lea e le i atoa e pei e faapena Olo, ou te faafetai

1233 atu. Ioe, se i silasila i ai, ioe, ia ae faauma mai leaga o le uati a Olo o lea e manao Olo e tuu i totonu ma taimi...

Tofa NAFOITOA TALAIMANU KETI: E le o toe umi foi lau Afioga i le Fofoga Fetalai...

FOFOGA FETALAI: Ia, faauma mai ia le saunoaga...

Tofa NAFOITOA TALAIMANU KETI: Ou te matau ma le agaga faafetai tele i le Faigamalo, aemaise ia le HRPP i le tofamamao ma le taitaiga o le Faigamalo lelei, good governance. E matauina lava i le Tala o le Tupe, o lea ua toe to mai le seleni sa faaagaga mo le Pati aua taumafaiga o le Tala o le Tupe mo le tali atu i manaoga aemaise o le faamai. E momoli ai le faamalo ma le faafetai, o molimau ola ia, o le mea e ave i ai le faamuamua o le soifua manuia o tagata i le Faigamalo a le HRPP. O le mea lea e momoli atu ai le faafetai tele i le Minisita o Tupe. Ou te fia faaaogaina foi ia lenei avanoa e tauala atu i le Nofoa ma lau Afioga i le Minisita o Tupe, e faafetai ai i a tatou paaga mai fafo. O la e faafogafoga mai lou itumalo i galuega faatino. E momoli ai le faafetai tele i le Malo o Iapani, mo le fesoasoani tele i le fausiaina o le Fogafalelua, o le faleaoga Tulagalua a lou itumalo Laumoliafi Avao. Ua foliga ai ua taunuu le miti, ‘o le mea e lelei i Upolu nei, e lelei foi i Salafai’. O le mea lea e momoli atu ai le faafetai tele. Ou te faafetai foi i le Malo tele o Saina, i le latou fesoasoani i le faatotogaina o faleaoga o Tutaga i Fagamalo, ia ae faapea foi Laumoli i Avao, atoatoa mea uma o kesi ma laulau aua le fesoasoani ai i le aoaoina o alo ma fanau o lou itumalo. E momoli foi le faafetai tele i le aotelega i so matou manatu i galuega tetele a le Malo e ala i le auala sima laupapa i Samalaeulu i Maliolio, o tafega talu ai nei, sologa manuia ia feoaiga i lo matou itumalo. O le mea lea e le galo ona faafetai atu malo le silasila mamao, malo le tofa loloto, na ua faigofie ai ona feoai lo matou itumalo ia faapea foi le Gagaifo ona o ia fuafuaga lelei mo le tatou atunuu. Ia lau Afioga i le Fofoga Fetalai, e tele lava nisi o faafetai e fia tuuina atu e pei o le faafetai i le ADRA, le Afioga ia Sua ma le fesoasoani i le fale apitaga aua aso leaga. O la ua tu le fale, ua matagofie mea uma o le faafetai lea e ao ona faafofoga mai ai le faalapotopotoga e momoli aloaia atu i le Maota lenei e ala i le latou sui usufono le faafetai tele mo le fesoasoani tele e sulu i ai lou itumalo i taimi o faigata. Faamanuia le Atua, ia ona afe lea o se faamatalaga e pei o upu e masani ai le gataifale, ‘e fai foi o le lauamanu, ao le faamuli o atu’. Le paia o lou itumalo, o lea ua o tatou i ai i le siui ataata o le 5 tausaga o le Paeaiga a le Palemene lona XVI. O lea ua faalepa i fanua le fua o tuaau, ae 1234 a le taoseuga o le vaosa o tupu ma le Matavai faalelea o Aloalii vae atu le Paia o le Maota. Ua taoto foi le paolo lafoia o le tama ma le titi agiagi e sula ai le tamaitai. Ua moni ai upu a le tupu, ‘ua vaai i ula, ua tagai i ula’. O upu ia o le agaga faagaeetia ma le loto faafetai i lou itumalo, a o lea ua tauavaoto ia le faafutiao, ona o lau tatalo ma lau tapuaiga.

FOFOGA FETALAI: Lau Afioga se i fesoasoani mai foi i le ta galuega, leaga o lea foi ua silisili ia le... ioe, na ona fesoasoani atu lava.

Tofa NAFOITOA TALAIMANU KETI: O lea ua faaiu o upu faaiu ia lau Afioga. E le galo lau faaeaea i lenei 5 tausaga, na e fofola ai le fala ma tatala le ie i alo ma aloalo le ilitea, aisea? E te mamanu e pei o le manu i ona fulu ona o lou alofa i le tama o le eleele, ina ne i satia pe tau saili se lautifa o le pa, aua so ta sao i upufai o le Faigamalo o Samoa. Faamalo faafetai, o lau puleto ma lau faamanuia e leai sona iu. O le upu moni, ua tupu tele le alofa, ua tupu tele le lototele, e tautua ai oe lou itumalo. O upu lava e masani ai tautai o le vasa, e faatoa talatala tapu o le faiva i le taimi o le aleaga. E leai foi se faiva e asa ma se maumau, leaga e sufi faaāfualoma ia o le tailoloto. O ni galuega e le i maea o ni manaoga e le i tino, o oe o le itumalo e loloto le tofa tulou, tatou tapuaia le faasoa poto a le Malo, aua e aumai lava e le Atua le mamoe ma le aso ma le malama i le taimi e aupito sili ona talafeagai, mo oe ma tatou lo tatou itumalo Gagaemauga Nu.2. E le toe lilo lenei vaitau ma le fou faaiu o lenei Paeaiga, a o loma ai lau faiga filifiliga mo so ta sui i le Palemene fou, tatou lafoai le faamoemoe i le Atua. Gagaemauga Nu.2, tatou filifili faatasi ma le agaga o le Atua. E leai se agatonu ou te toe seu fogaafaina ai le malu laau matua ma le malu tauaso, o le tapui faa-alofā fita o le ta vatausi ma le vatapuia. E pau lava o lea, o lau puleto e samalalagi ai lo ta faamoemoe o loma nei mo le faamatietieina o lo ta itumalo e ala i lau faiga filifiliga. Ma o upu lava o lenei taeao, ua tupu tele le alofa, ua tupu tele le lototele e fia tautua pea ai oe lou itumalo. Soifua, o la outou auauna, Nafoitoa Mataia Valu Talaimanu Keti, o la outou sui usufono i lenei Paeaiga. Manuia oe Samoa, manuia le Fonousu a le Palemene, soifua ma ia manuia.

FOFOGA FETALAI: Ia malo, saunoa i lau Afioga i le Sui Fofoga Fetalai, ia se i tulai mai foi se isi sui usufono e fia saunoa. Ia malo, ia tulai mai le sui usufono mo Vaimauga i Sisifo Nu.1.

Tofa LENATAI VICTOR FAAFOI TAMAPUA (Vaimauga Sisifo Nu.1.): Ia malo faafetai i lau Afioga i le Fofoga Fetalai e tusa ai foi ma le avanoa. Ia saga Viia pea le alofa ma le agalelei o le Atua i lenei taeao. Ia ou te faatalofa atu i le paia maualuga o le mamalu tele o lenei Maota si ou alofa talofa lava. 1235

E talitonu o lea ua tu maualuga lenei taeao, ina ua pai tupu le foe a Ulualofaiga. Ua tau tupu, ua tau tumua, ua tau i le Atua aua le afio o lau Afioga i le Fofoga Fetalai, Afio o lau Afioga i le Palemia, ma Minisita o le Kapeneta, Minisita Lagolago ia faapea le afifio o sui usufono mamalu o le Palemene o Samoa. Lau Afioga i le Fofoga Fetalai, o lou tulai mai i le foe, ma e seei i le Nofoa pule o lenei Maota i lenei 5 tausaga, se ua faamalo le galue, faamalo le tautua, faamalo foi le fai o le faiva, e pei o le fetalaiga ia Lefaoseu ma Ulumu. O le tala o le tusi, ‘e te faia lava e oe mea sili ma e manumalo pea’. Faamanuia tele le Atua i lau Afioga, sauni e te malolo manumalo mai ou tofiga i totonu o le itumalo, ia aemaise o lou soifua tautua mo Samoa ma lana Faigamalo. Lau Afioga i le Fofoga Fetalai, ae ou te le i afea le Tala Faaopoopo o le Tupe 2020/2021, e muamua ona ou faatulou ma ou faatalofa atu i le tapuaiga paia i le Afioga i le Ao o Le Malo o Samoa, lau Afioga Tuimalealiifano Vaaletoa Sualauvi II ma lau masiofo, le tapuaiga mamalu a le Afioga i le Fono a Sui Tofia ma lou faletua. Le Afioga i le Faamasino Sili, lau Afioga i le Peresetene faapea le Ofisa o Faamasinoga. Ou te faatulou ma ou faatalofa atu i le mamalu maualuga o le nofo a Minisita o le Sakalameta paia o le aufaigaluega paia a le Atua, o lo o faatunapaulia ma faafalelemalu i nuu ma afioaga i le soo faataamilo o Samoa, aua o outou o anava o le taua faaleagaga aua Iesu Keriso ma Lana Talalelei. Faamalo faafetai mo la outou tatalo ma lo outou faanonogamanu aua se manuia o Samoa ma lana Faigamalo. Ou te faatulou ma ou faatalofa atu Samoa, i ou paia aginunui tetele ma ou mamalu e agi laufofola i au feaoga ma tanugamutia, aua ua uma ona tofi tofa le laau a tama lea na tafaifa, tafaitia, tafaitoto i Aiga ma o latou Tama, Tama foi ma o latou Aiga, Aiga o Tupu, Aiga o Nofo, Aiga o Papa, ma Aiga o Tafaifa. Tulouna le vavavae o Tumua ma Pule, o le vatootoo ma le vafetalai, tulouna le vavavae o Ituau ma Alataua, Aiga i le Tai ma le Vaa o Fonoti, tulati ma tulatoa, ma le aufueloloa ma outou o e e faia upu o Samoa. Ou te faatulou foi ma ou faatalofa atu i le tapuaiga mamalu a Samoa i Sasae, i le Afio a lau Afioga i le Kovana Sili ma le Lutena Kovana, ma la oulua autaupulega. Afio o le Afioga o le Faamasino Sili ma le vaega o Faamasinoga. Afio o lau Afioga i le Peresetene ma le Maota maualuga, Afio o lau Afioga i le Fofoga Fetalai ma le Maota o Sui. O le Paia lava lea aua le nofo a Maopu ma le Faletutuila, tainane le Afifio o Faatui ma le Auvaaotootoo ma Tama o le Manuatele. O Paia sauoo na o Samoa, e afua mai i Falegase ma Faletapaau seia paia Faleniusa, ou te faatulou atu ai, tulou, tulou tulouna lava. Ae o le a sunui tonu lau o le fo, faapito augafa se leo a le auauna faatauvaa, aua e faigata le tapuaiga a lou itumalo pele o Vaimauga i Sisifo Nu.1. I le afio o le Matua lau Afioga Tofaeono, lau Afioga Tofaeono Iupati Fuatai ma lau Afioga 1236

Tofaeono Vui Faatali. Afio Asi ma Patu i lau Afioga i le Alii Matua, i lau Afioga Leaue, lau Afioga Asi Tuiataga Semisi Blakelock, lau Afioga Asi Tunupopo Sagagauatasi Keve ma lau Afioga Asi Leuluailii Peleiupu. Afio lau Afioga i le Sao, lau Afioga Patu Falefatu Sapolu ma lau Afioga Patu Sola Siaosi. Afio Aiga e Tolu, Aiga Sa Vae, Aiga Luamanuvae ma Aiga Falanaipupu. Afifio le Usoalii, Luafau, Tuiono ma Lupetaliaami, alaalatai i laua o le na tai, Tamapua ma Manogiamanu, Tamapua Iosefa ma Manogiamanu Etuale Ioane ma le mamalu i le nofo a Ituaiga ia Fuata, tainane Ataga ma Sa Ataga. O paia faataotooto na o oe Vaimauga Sisifo Nu.1. Le paia maualuga i Susuga i Toeaiina, Susuga i Faafeagaiga ma le aufaigaluega paia a le Atua i le nofo a fataloa o le talalelei. Le paia ma le mamalu i tupu ma ee, failauga ma ponaoo, saoao ma aualuma, faletua ma tausi, o aumaga ma ava aumaga, e oo lava i le tupulaga talavou ma le mamalu tele o le au palota. E faatalofa atu foi i lau Susuga i le Failautusi ma le Ofisa o le Fono Aoao Faitulafono, ae tainane foi Ofisa Sili o Pulega ma Ofisa Sinia o Matagaluega ma Faalapotopotoga a le tatou Malo. Malo lava le soifua maua ma le soifua laulelei i lenei itula o le aso. Lau Afioga i le Fofoga Fetalai, e fia faaaoga foi lenei avanoa ou te faatalofa atu ai i le tapuaiga a nai tama ma tina matutua, o lauao sinasina o si o matou itumalo, ia aemaise o si ou tina matua o lo o faapena ona tapuai mai i Moataa ia Fouai Maluina Tamapua. Ia alofa tele atu mo oe mum i lenei itula. E faaaoga foi lenei avanoa lau Afioga i le Fofoga Fetalai e tatalo ai i le aao faamafanafana a le tatou Tama i le lagi aua le fanau ia Fofogafa Mo, Sililoto Tolo Junior, ia ma le fanau, aemaise aiga na lua, ona o lana valaau paia i le tina pele ia Marie Sililoto Tolo i Moataa. E piiama foi se lagona i upu faamaise foi na saunoa ai nisi o sui usufono o le tatou Maota ona o le pule toatasi a le Atua ina ua faamanavaina galuega a le uso a sui usufono, o le Afioga ia Vaafusuaga Toleafoa Ken Poutoa. O la le Tusi, “Amuia e faanoanoa aua e faamafanafanaina i latou.” Ou te faafetai atu i lau Afioga i le Fofoga Fetalai ona o lenei avanoa maualuga ua faapena ona e tuuina mai ou te tuuina atu ai se sao o lenei itumalo i taualumaga o le talanoaina o le Tala Faatatau Faaopoopo (Nu.1) o le Tupe 2020/2021 e pei ona i luga o le Laulau a Fono a le Palemene nei. Lau Afioga i le Fofoga Fetalai, ou te momoli atu le faamalo ma le faafetai tele i le Afioga i le Minisita o Tupe, le Afioga i le Minisita Lagolago, le Ofisa Sili o Pulega ma le Matagaluega i le tapenaina o lenei galuega maeaea ma le matagofie. Faamalo le galulue. Lau Afioga i le Fofoga Fetalai, e matua lagolagoina e lou nei sui usufono le Tala Faatatau Faaopoopo (Nu.1) o le Tupe 2020/2021. Ae pau lava o lea, e tasi si manaoga e fia faaleo, aua le saogalemu ma le malupuipuia o tagata o si o matou itumalo. Lau Afioga i le Fofoga Fetalai, e tatalo atu pea lava pea ma le loto maualalo i Afioga i Minisita ma Matagaluega o lo o fitoitonu 1237 ai le Green Climate Fund, po o le poloketi lea o le Vaisigano Catchment. E talitonu o lo o manatua e i tatou uma i totonu lava o le 6 vaiaso ua tuanai, sa faapena ona aafia faalua le tatou atunuu i lologa i nisi o vaega ona o le tetele o timuga. O lea lau Afioga i le Fofoga Fetalai, ou te talanoa atu au ia mo nei i le Vaimauga faamolemole. E tatalo atu ai ma le agaga maualalo ua tatau nei ona faaleleia le sima po o le river wall i le tuaoi lea o Magiagi ma Lelata. O tua tonu lava o le Supamaketi lea o Frankie i Lelata, o i ina lea e sao mai ai le vai pe a tetele timuga, ma sue mai lona alavai ma oo mai i se vaega lea i Faatoia ma agai atu ai i Vaipuna, i Vaiala ma le Apia Park, ma ua tele meatotino ua faapena ona faaleagaina a nai aiga i totonu o si o matou itumalo. Ma ua i ai foi le popolega lau Afioga i le Fofoga Fetalai i le ono aafia o se soifua i se isi taimi e toe tetele ai ni timuga. Lau Afioga i le Fofoga Fetalai, e oo mai i le aso, e le uma lou faafetai i le Atua i Lona alofa ma Lona agalelei. I le taimi sa tupu ai nei lologa, i aso ia e lua lau Afioga, sa faapena ona ou molimauina le matautia o le tatou Silisili Ese, aua ana tupu lenei faalavelave i le pogisa, talofa e. Faamolemole, e tuualalo, o le a se finagalo i le Afioga i le Minisita ma Matagaluega o lo o fitoitonu ai le GCF po o le component lea o le poloketi apovai, ia, aumai ia le faamuamua ia faaleleia lea vaega, e pei ona tatou vaaia foi lenei taeao i le louloua mai o le tau. Lau Afioga i le Fofoga Fetalai, e fia momoli atu foi le faafetai ia i latou sa faapena ona tali mai i nisi o talosaga i mea e fia faaleleia o lenei itumalo. Ae muamua ona ou fia faaleo se faafetai faapitoa i lau Afioga i le Palemia, Afioga i le Taitai o le tatou Malo i lau taitaiga o le Faigamalo i lenei Paeaiga, malo le onosai, malo le finau, malo le galue ma le faatuatua i le Atua aua se manuia o Samoa ma ona tagata. O lo o molimoli mai alofaaga o le tele o aiga, uo ma e masani, e le gata i Samoa nei aemaise o atunuu mamao i lau Afioga faapea le tatou Vaega Faaupufai. Ae fia faaleo atu se tasi o uso sa faapena ona valaau mai o lo o tatalo ma tapuai mai i lau Afioga aemaise foi o le tatou Vaega Faaupufai mai Melepone i Ausetalia, le Afioga ia Taumanupepe Teleso. E fia faaleo foi se faafetai i lau Afioga i le Minisita ia Tialavea Tusatama Tionisio Hunt. Faafetai tele i lau Afioga ma lau faautautaga sa faapea ona e faaee ia te au ou te fai ma ou lagolago. Ia faamanuia le Atua i lau Afioga ona o lou manatu i lenei tagata faatauvaa. Faafetai tele i le nofo a Minisita o le Kapeneta i la outou pule faasoa aua se manuia o afioaga ma itumalo. O si o matou itumalo, e momoli atu le agaga faafetai i galuega faifaipea a la tatou Faigamalo i le faaleleia lea o auala i lea taimi ma lea taimi. E le gata i lea, o le faaleleia lea o auala ma alavai i totonu o Vaivase-tai, i luma tonu o le Maota o le afioga i le Tiakono ia Uili Sinclair. E momoli atu foi le faafetai i le taina o le auala lea i le settlement road i Vaivase-uta, agai atu lea i le malae taalo i Tanoai’a.

1238

Faafetai foi i le faaleleia o le auala e pei ona talosagaina ma alavai i Vaipuna agai atu lea i Vaiala ma Apia Park. E fia molimoli atu foi se faafetai i lau Afioga i le Minisita mo Galuega Tetele mo galuega ua faapena ona fuafuaina mo lenei tausaga, ua maua faamatalaga o lea ua faasalalau, ua saili foi se tasi na te faia le tatou auala lea. A o faafofoga mai le itumalo i le auala lea agai i Vini Fou, i totonu o Vini Fou agai atu i Vaiala-uta, ia ma Tuvao i Moataa. E momoli atu ai le agaga faafetai i lau Afioga, ona o lea auala ua leva ona manaomia ai se fesoasoani, ona o le toatele o nisi o lo o nofoia lea vaega o le ta itumalo. O le ta itumalo. O Vinifou mo oe, ia a o Vaiala ma Moataa mo au. Ia, e momoli atu foi le faafetai aua o lea ua maua foi faamatalaga o le a faapena ona faaleleia foi se vaega o le auala i Vaivase-uta aemaise foi le faaletonu o lo o i ai i le taimi nei lau Afioga i le magatolu o Fagalii ma Moataa agai atu i le Kolisi o Samoa i Vaivase-tai. E fia faaleo foi le faafetai i nisi o tatou paaga lau Afioga i le Fofoga Fetalai ma uo mai fafo, latou foi sa i ai le latou sao mo lenei itumalo i totonu o lenei Paeaiga. Faafetai i le Malo o Saina i le tauaao lea o ni laausuisui ma faia ni aoaoga tau suisui mo nisi o tina ma tamaitai i totonu o le afioaga o Vaiala. Faafetai i le Malo o Iapani i le talia lea o le talosaga a alii ma faipule o Moataa i se seleni e fausia ai se faleaoga fou mo le aoga tulaga lua. Faafetai i le Tamaitai Pule ma le Ofisa o le ADRA mo aoaoga mo le saogalemu i taimi o faalavelave faalenatura i totonu o Moataa, aemaise le seleni tele sa faapea ona tauaao mo le latou fesoasoani mo le faleaoga tulaga lua i Moataa. Faafetai foi i le Tamaitai Pule ma le Kamupani o le British American Tobacco i le faameaalofa mai o le tele o meafaigaluega ma fatu toto e fai ai togalaauaina i totonu o Vaiala, o Moataa, Vaivase-tai, Tanoalei’a, Toomatagi, Magiagi ma Faatoia. Faafetai foi i le Tamaitai Komesina o Ausetalia i Samoa i le lagolagoina ma le faatupeina o le Moataa Mangrove Eco Tourism. O lea vaega e momoli atu ai foi le agaga faafetai i le Afioga foi i le Minisita mo Tagata Asiasi Maimoa Mai Fafo, le Ofisa Sili o Pulega ma le Ofisa, o lea ua fuafua o le a faia ni garden toilets se i tulou mo lea mataaga. Faamalo faafetai. Faafetai i le polokalame mo atinae o Malo Aufaatasi ma le Matagaluega o Punaoa Faalenatura ma le Siosiomaga mo le faatupeina o le auala savali i totonu o le togatogo i Moataa, e faapea foi le alii Komesina Niu Sila talu ai mo le faatupeina o faailoilo, o fata lapisi ma moli, o lea foi ua i ai i lea auala savali. Malo faafetai. Faafetai i le tou agalelei, ia faatutumu e le Atua mea ua faapena ona faagaogaoina ona o lo outou agalelei, ae toe fai foi, faifaipea mo tausaga o i luma. Ia lau Afioga i le Fofoga Fetalai, e fia molimoli atu foi se faafetai i Pulenuu, Sui o Nuu, Sui o le Malo ma Sui Tamaitai o si o matou itumalo sa faapena 1239 ona maua le avanoa matou te galulue faatasi ai aua se manuia o lenei itumalo i totonu o lenei Paeaiga. Mai Vaiala, ia o le Susuga a Uialatea Iosua ma Loau Talapusi, lea ua tuua le Malo, faapea i Vaipuna ma Levili, o le Susuga ia Tauasa Ronnie. I Moataa, ia o le Tofa ia Nua Palala ma le Afioga ia Sa Vaeali. O Vaivase-tai, ia o le afioga i le tiakono ia Uili Sinclair ma Fepuleai Sio o lo o tulai mai i le taimi lenei. O Vaivase-uta ma Tanoalei’a, o le Susuga ia Faasootele ma Afamasaga Tui Ulaula. O Toomatagi, o le Susuga ia Lauano Pereise. Magiagi, o le afioga ia Luafau, ma Faatoia o le Afioga ia Papalii Pene. Sui Tamaitai, mai Moataa, o le Susuga ia Ama Tapunuu Siu ma le tausi ia Peresia Tamapua. O Vaiala, o Sasa Pueata ma Sileoleoga Wilson, ia ma Magiagi, o Fetulima Kopelani. Malo faafetai mo galuega lelei aua o tatou nuu ma afioaga i totonu o le tatou itumalo. E fia faafetaia foi galuega a nisi o lenei itumalo sa faapena ona galulue i Komiti Faufautua a le tatou Malo. I le Komiti o Pulenuu, Sui o Nuu, o le Tofa ia Toatelegese Punefu. Komiti o Tina ma Tamaitai, o le Susuga ia Naomi Sapolu ma Waikiki Ualesi. Le Komiti o Faatoaga ma Faigafaiva, le Susuga ia Kalameli Aumua. Le Komiti o Aoga, o le Susuga ia Faafetai Sene. Le Komiti a le Palemia, ia o le tina ia Ualolo Levaa Taitai, ma le Komiti o le Siosiomaga, o Loau Matauaina Gibbons. Malo faafetai i le tou tautua ma la outou sao aua le tatou Faigamalo. Lau Afioga i le Fofoga Fetalai, o nisi na o vaega sa fia faaleo ai le agaga o le faafetai i totonu o lenei Paeaiga. A i ai se tasi ua faapena ona misi atu i le matou faafetai, e faamalulu atu ma le agaga faamaualalo. Lau Afioga i le Fofoga Fetalai, e fia molimoli atu foi le faamalo ma le faafetai tele a lenei itumalo i le tautua le faalogologotiga a Ofisa Sili o Pulega ma aufaigaluega o Matagaluega uma…

FOFOGA FETALAI: Ou te faamalulu atu i le saunoaga a le sui usufono mamalu, ou te vaelupeina ma le agaga faaaloalo lau saunoaga, talu ai o lea ua tatou taunuu i le tatou taimi manava, ae i ai nisi o mea i le matau atu e faapena ona… e i ai le manatu e talasoifua i le aso a taeao ona faamaea lea o le saunoaga. E i ai le manatu, ua tatou taunuu i le mutaaga o galuega o lenei aso. Ae tatou te le i tolopo, ou te tapa le sui usufono mo Faasaleleaga Nu.4 na te faaiuina le tatou Fonotaga i se tatalo, lau Afioga Peseta Vaifou.

Na tolopo Taualumaga a le Fono Aoao Faitulafono i le itula e 12:58 i le aoauli seia aulia le Aso Lulu, 27 o Ianuari 2021 i le itula e 9:00 i le taeao.

1240