Avtale om biblioteksamarbeid mellom kommunane i Nordfjord
1. Partar Avtalen er inngått mellom kommunane Gloppen, Bremanger, Vågsøy, Selje, Eid, Hornindal og Stryn.
2. Avtaleperiode Avtalen gjeld frå 01.01.15 til 31.12.2018. Sjå punkt 8 om evaluering og eventuell vidareføring.
3. Føremål og bakgrunn Folkebiblioteka i Nordfjord, Gloppen, Bremanger, Vågsøy, Selje, Eid, Hornindal og Stryn, samarbeider om utvalde drifts- og utviklingsoppgåver. Samarbeidet har som mål å bidra til å fornye og utvikle bibliotektenestene i kommunane. Avtalen er utforma særleg med tanke på krava i revidert biblioteklov (2013) om at folkebiblioteka skal vere aktive formidlarar og uavhengige arenaer for offentleg samtale og debatt.
Biblioteka går inn i samarbeidet med respekt for kvarandre sin kompetanse og ressursar, og det er aksept for ulike ståstader, interesser og kapasitet til å delta i ulike tiltak.
4. Innhald og aktivitetar Samarbeidet kan til dømes omfatte: a) å utveksle erfaringar frå ulike drifts- og utviklingstiltak b) å marknadsføre biblioteka (i sosiale medium) c) å utvikle biblioteka som debattarenaer d) turnésamarbeid om debattar, forfattarar og andre formidlarar e) språkkafé f) studietur/fagreise
5. Organisering og oppgåver Biblioteka etablerer ei arbeidsgruppe der biblioteksjefane er medlemer. Gruppa har minimum to møte per år, eitt møte i halvåret. Ansvaret for å leie samarbeidet og sikre framdrift går på omgang med eitt år om gongen. Til leiaransvaret ligg å kalle inn til møte, lage sakliste og leie møta. Referent vert peika ut i kvart møte. Arbeidsgruppa utarbeider ein handlingsplan som vert rullert årleg. Oppgåvefordeling vert avgjort undervegs.
Kommunalsjef med ansvar for kultur/kulturansvarleg i kvar kommune får kopi av alle møtereferata og er med på minimum eitt samarbeidsmøte i året.
Representant for fylkesbiblioteket kan inviterast til å delta på samarbeidsmøta som observatør.
Arbeidsgruppa kan gjere vedtak som gjeld alle kommunane, men kommunane må først ha høve til å uttale seg om saka og eventuelt reservere seg. Kommunane forpliktar seg til å følgje opp og gjennomføre det som vert vedteke, men alle kommunane treng ikkje vere med på alle tiltak.
Leiaren i arbeidsgruppa har ansvar for å få fram saker som skal vidare til administrativ og politisk handsaming i kommunane eller i Nordfjordrådet.
6. Rettigheiter Alle biblioteka har bruksrett til materiale som vert utarbeidd i samarbeidet.
7. Økonomi Kostnader i samband med felles tiltak vert fordelte etter avtale mellom kommunane i kvart enkelt tilfelle.
8. Evaluering og vidareføring eller avslutning av samarbeidet Samarbeidsavtalen vert evaluert i løpet av 2018, og det vert då teke stilling til om han skal vidareførast.
Dersom ein av partane ynskjer å trekkje seg ut av samarbeidet i løpet av avtaleperioden, kan avtalen seiast opp med tre månaders varsel.
9. Underteikning og godkjenning
Avtalen er inngått den ______
______Bremanger kommune Eid kommune
______Gloppen kommune Hornindal kommune
______Selje kommune Stryn kommune
______Vågsøy kommune