Kommunimut pilersaarummut tapiliussap, 3E5-2, -ip inaarutaasumik akuersissutigineqarnera

Aalajangiiffigisassaq J nr: 16.03.01.01-P16-25-17 Sanarfinermut Avatangiisinullu Ingerlatsivik – pisortaq, Hans Henrik Winther Johannsen / HHWJ

Suliassamik eqikkaaneq Mittarfik pillugu pilersaarummik iluarsiissuteqarnissaq aamma inuutissarsiuteqarfiusumut pioreersumut atassusikkanik inuussutissarsiuteqarfiusussanik nutaanik pilersitsinissamik kommunip kissaateqarnera tunngavigalugit kommunimut pilersaarummut tapiliussatut siunnersuut suliarineqarpoq.

Siunnersuut piffissami 26. apriilimiit 21. juunip tungaanut tamanut tusarniutigineqarpoq, tusarniummullu akissuteqaatit pingasut tiguneqarput, taakkulu oqaaseqaatinik aaqqissuisoqarfimmit allannguutinik kisimi kinguneqartitsipput.

Sanarfinermut Avatangiisinullu Ataatsimiititap aammalu Aningaasaqarnermut Inuussutissarsiornermullu Ataatsimiititap suliaq 22. juni immikkut ittumik ataatsimiinnerminni aalajangiiffigissavaat. Sanarfinermut Avatangiisinullu Ataatsimiititap aammalu Aningaasaqarnermut Inuussutissarsiornermullu Ataatsimiititap aalajangernera Kommunalbestyrelsip immikkut ittumik ataatsimiinneranut saqqummiunneqarumaarpoq. Sanarfinermut Avatangiisinullu Ingerlatsiviup Sanarfinermut Avatangiisinullu Ataatsimiititamut aammalu Aningaasaqarnermut Inuussutissarsiornermullu Ataatsimiititamut inassuteqaataa imak nipeqarpoq:

Sanarfinermut Avatangiisinullu Ingerlatsiviup Sanarfinermut Avatangiisinullu Ataatsimiititamut inassuteqaatigaa: - Kommunimut pilersaarummut tapiliussaq 3E5-1, Nuummi Mittarfik, akuersissutigineqassasoq - Siunnersuut Sanarfinermut Avatangiisinullu Ataatsimiititamit akuersissutigisaq, Aningaasaqarnermut Inuussutissarsiornermullu Ataatsimiititamut akuerisassanngorlugu ingerlatinneqassasoq - Tamatuma kingorna Aningaasaqarnermut Inuussutissarsiornermullu Ataatsimiititap kommunimut pilersaarummut tapiliussaq Kommunalbestyrelsimut inaarutaasumik akuerisassanngorlugu ingerlateqqissagaa.

Inassuteqaat Aningaasaqarnermut Inuussutissarsiornermullu Ataatsimiititap Kommunalbestyrelsimut inassuteqaatigaa: - Aningaasaqarnermut Inuussutissarsiornermullu Ataatsimiititap inassuteqaataa ataatsimiinnermi saqqummiunneqarumaarpoq.

Suliassamik saqqummiussineq Naalakkersuisut Nuummi mittarfiup 2200 meterimut tallilernissaanut siunertaata qulakkeernissaanut Kommuneqarfik Sermersuumit kissaatigineqarnera tunngavigalugu, kommunimut pilersaarummut tapiliussatut siunnersuut suliarineqarpoq. Pingaarnerusumik mittarfeqarfimmut atugassiaasunik nutaanik inuussutissarsiuteqarfiliornissaq kiisalu mittarfimmut aqquserngup allanngortinneqarnissaa tapiliussakkut qulakkeerneqassaaq.

Sumiiffimmi Pilersaarummut tapiliussap pioreersup suliarineqarnerata kingorna mittarfik annikitsumik sangutinneqarsimavoq, taamaattumillu immikkoortup ilaa 3E5-imut killiliussanut tunngatinneqarunnaarluni. Taamaammat immikkoortup ilaa taassumalu eqqaaniittut iluarsiivigineqarnissaat pisariaqarsimavoq. Taamatut suliaqarnermut atatillugu immikkoortup ilaa 3B2-mi inuussutissarsiuteqarfik pioreersoq allanngortinneqarpoq, tassani Mittarfiup eqqaani isumannaallisaanermut killeqarfinnut atatillugu piumasaqaatit il.il. eqqortinneqarnissaat pillugu.

Aaqqiissutissatut siunnersuut – suliatigut naliliineq Mittarfik pillugu pilersaarummik iluarsiissuteqarnissaq eqqortinniarlugu kiisalu tassunga peqatigitillugu kommunip inuussutissarsiuteqarfinnik nutaanik pilersitserusunnera aallaavigalugit pilersaarummut tapiliussatut siunnersuut suliarineqarpoq.

Immikkoortup ilaani atortulersuutit siunissami pilersinniarneqartut tassaapput mittarfik 2200 m-isut takissusilik, tikittarfiup/aallartarfiup illutaa nutaaq, biilinut inissiivissat, niooraaviit kiisalu tamakkununnga attuumassuseqartut atortulersuutit arlallit. Taakku saniatigut inuussutissarsiuteqarfinnut, imeqarfimmut, aqqusinniornissamut il.il. atugassanut nunaminertat atugassanngortinneqartussat. Immikkoortup ilaa immikkuualuttunut arfinilinnut agguarneqarpoq:

A: timmisartut aallartarfiat mittarfiat

B: mittarfeqarnermi siunertanut (aallartarfimmut/tikittarfimmut, hangarimut, sannavinnut il.il.) kiisalu akunnittarfik assigisaalu.

C aamma D: mittarfeqarnermut siunertanut aamma inuussutissarsiornermut, attaveqatigiinnermut teknikkikkullu atortulersuutinut.

E: attaveqaatit soorlu imeqarfik nutaaq tassungalu attuumassutillit.

F: inuussutissarsiornermut aamma sisorarfimmi sukisaarsarfiusinnaasunut atortulersuutinut tunngasut.

G: ujaqqerivik aamma inuussutissarsiuteqarfik

Mittarfiup 950 meterimiit 2200 meterimut tallineqarnissaani qaartitigassaq annertuvoq nunniugassallu annertullutik. Nunatatigut allanngortitassat Nuummi 'Ilisarnaataalluarsinnaapput' nutaat, taamaattumillu sanaartugassat ilusilersornissaannut Kommuneqarfik Sermersuumut piumasaqaataasoq. Uuttuutit atortussallu, qaammaqquteqarneq ataqatigiinnerlu Kommuneqarfik Sermersuumiit piumasaqaataassapput. Illussanik kusanartuliornissami pitsaassuseq immikkoortorlu tamaat aallutarineqartariaqarput, maannalu nunataa aallaqqaataaniilli pingaartinneqalereerpoq taavalu immikkoortumut illoqarfimmullu sunniuteqarnissaa eqqarsaatigineqalereerluni. Sanaartornermi illuliortaatsimi pitsaassutsip ilaatigut pingaartuutinnera anguniarlugu, illussanik titartaanissamut mittarfiullu sanaartorneqarnissaanut kommunimi illuliortaatsimut politikki najoqqutaralugu Kommuneqarfik Sermersuumit qaffasissumik piumasaqaatitaqartoqassaaq.

Aningaasaqarnikkut sulisoqarnikkullu naliliinerit Kommunimut pilersaarummut tapiliussaq Kommuneqarfik Sermersuup aningaasaqarneranut kinguneqartussaanngilaq.

Inatsisitigut tunngavissaq allakkallu tunngaviusumik uppernarsaatitallit Pilersaarusiorneq aamma nunaminertat atorneqartarneri pillugit inatsisaat nr. 17, 17. november 2010-imeersoq aamma Inatsisartut inatsisaat nr. 34, 9. decembari 2015-imeersoq Kommunimut pilersaarut digitaliusoq www.sermersooq2028.gl

Ingerlariaqqinnissaq Kommunimut pilersaarummut tapiliussaq juulip ingerlanerani .gl-ikkut aamma Nuuk Ugeavisikkut tamanut saqqummiunneqassaaq

Aningaasaqarnermut Allatseqarfimmit oqaaseqaatit Qulaani suliassamik saqqummiussaq kommunimut mittarfeqarfik inuussutissarsiornermullu nunaminertat annertuut atugassanngorlugit immikkoortinneqarsimasut nutaat iluaqutaalluassammata Aningaasaqarnermut Allatseqarfimmit innersuussutigiinnarsinnaavarput.

Siornatigut aalajangerneq Sanarfinermut Avatangiisinullu Ataatsimiititap aalajangernera 22. juni 2018-meersoq: Sanarfinermut Avatangiisinullu Ataatsimiititap aalajangernera ataatsimiinnermi saqqiummiunneqarumaarpoq.

Aningaasaqarnermut Inuussutissarsiornermullu Ataatsimiititap aalajangernera 22. juni 2018- meersoq: Aningaasaqarnermut Inuussutissarsiornermullu Ataatsimiititap aalajangerner ataatsimiinnermi saqqummiunneqarumaarpoq.

Innuttaasunik peqataatitsineq/attaveqaqatigiinneq Nuuk Ugeavisikkut kommunillu nittartagaatigut nalunaaruteqarnikkut kommunimut pilersaarummut tapiliussaq sap.ak. arfineq pingasuni piffissami 26. apriilimiit 21. juuni 2018-ip tungaanut tamanut tusarniutigineqarpoq.

Kalaallit A/S VVM pillugu nalunaarusiamut atatillugu 12. marsi innuttaasunik ataatsimiititsivoq.

Ingerlatsivinnit allaniit oqaaseqaatit Ingerlatsivinnit allanit oqaaseqaateqartitsisoqanngilaq.

Ilanngussat 1. Tusarniummut akissuteqaatinik tiguneqartunik ingerlatsivimmi suliaqarneq 2. Tusarniaanermi akissutit tiguneqartut. 3. Kommunimut pilersaarummut tapiliussaq 3E5-2, Nuuk Airport, pillugu siunnersuut