UNURI U GĦOTJIET 2019 L-ORDNI NAZZJONALI TAL-MERITU KUMPANN KARMENU VELLA KOM Karmenu Vella li twieled iż-Żurrieq fl-1950 huwa gradwat bħala Perit mill- Università ta’ Malta u wara kiseb Master of Science in Tourism Management mill- Università ta’ Sheffield. Vella serva u kkontribwixxa fil-proċess demokratiku Malti għall- perjodu ta’ ’l fuq minn erbgħin sena. Huwa ġie elett għall-ewwel darba fil-Parlament fl-1976 u baqa jiġi elett fl-elezzjonijiet sussegwenti għal disa’ darbiet konsekuttivi. Matul il-karriera politika tiegħu huwa nħatar Ministru għax-Xogħlijiet Pubbliċi, Ministru għall- Industrija u darbtejn oħra bħala Ministru għat-Turiżmu. Karmenu Vella, ċeda s-siġġu parlamentari tiegħu fl-2014, wara li ġie nominat bħala Kummissarju Ewropew. Waqt li kien Kummissarju Ewropew responsabbli għall- Ambjent, Affarijiet Marittimi u Sajd, Vella indirizza fost l-aktar kwistjonijiet ambjentali urġenti ta’ żminijietna u b’hekk għen biex itejjeb il-benesseri taċ-ċittadini u tal-pjaneta. Taħt it-tmexxija tiegħu, l-Unjoni Ewropeja adottat u mplimentat fis-sħiħ il-Pjan ta’ Azzjoni għall- Ekonomija Ċirkolari, adottat regoli ġodda biex jitnaqqas l-użu ta’ prodotti single-use plastic, aġġornat il-leġiżlazzjoni tal-iskart kif ukoll żiedet l-azzjoni biex ittejjeb il- kwalità tal-arja madwar l-Ewropa kif ukoll għamlet progress biex twaqqaf it-tnaqqis tal-bijodiversità tal- Unjoni Ewropea. Matul il-mandat tiegħu, Karmenu Vella żviluppa wkoll rwol internazzjonali ewlieni għall-Unjoni Ewropeja fil-qasam tal-governanza tal-oċean, ippromwova l-Blue Economy b’żieda ta’ investiment u ħadem sabiex itejjeb s-sostenibbiltà ambjentali, ekonomika u soċjali tas-sajd fl-Ewropa u madwar id-dinja. UFFIĊJAL ONORARJU IL-PROF. JOVAN KURBALIJA UOM Il-Prof. Jovan Kurbalija għandu esperjenza professjonali u akkademika fil-liġi internazzjonali, fid-diplomazija, u fit-Teknoloġija Informatika. Huwa kien pijunier fil-qasam tad-diplomazija ċibernetika sa mill-1992, minn meta waqqaf l-Unità għat- Teknoloġija Informatika u d-Diplomazija fi ħdan l-Akkademja Mediterranja għall- Istudji Diplomatiċi f’Malta. Il-Prof. Kurbalija huwa d-Direttur Fundatur ta’ DiploFoundation u l-Kap tal- Pjattaforma għall-Internet ta’ Ġinevra. Id-DiploFoundation ilha għal aktar minn 15-il sena minn ta’ quddiem fi programmi ta’ riċerka u l-iżvilupp tal-kapaċità tat-teknoloġija diġitali bil-għan li tippromwovi l-iżvilupp, it-tixrid u l-użu tat-Teknoloġija Informatika fil-qasam tad- diplomazija u r-relazzjonijiet internazzjonali. Taħt it- tmexxija tal- Prof. Kurbalija, u permezz tal-appoġġ ta’ Malta u l-Iżvizzera, din il- fondazzjoni progressivament stabbilixxiet ruħha bħala attur validu u importanti fix-xena internazzjonali bi rwol magħruf kemm għall- iżvilupp kif ukoll għat-tixrid ta’ ideat relatati mal-politika diġitali u l-governanza tal-Internet. Sa mill-1997, ir-riċerka u l-artikli tal-Prof. Kurbalija dwar id-diplomazija ċibernetika taw forma lill-argument dwar ir-riċerka u l-politika tal- impatt tal-Internet fuq id- diplomazija u r-relazzjonijiet internazzjonali. Il-Prof. Kurbalija jagħti lezzjonijiet dwar id-diplomazija elettronika u l-governanza tal-internet f’istituzzjonijiet akkademiċi u ta’ taħriġ f’ħafna pajjiżi, inklużi l-Awstrija, il-Belġju, l-Iżvizzera, l-Istati Uniti u Malta. Il-PROF. RAYMOND MANGION MOM Raymond Mangion twieled il-Ħamrun fl-1959. Huwa kien l-awtur tal- iskritt ta’ programmi tar-rediffusion u tar-radju f’età żagħżugħa ħafna. Fl-1978, kien l-ewwel persuna fl-istorja tax-Xandir f’Malta li nieda sensiela dwar il-bliet u l-irħula Maltin kif ukoll dwar il-bijografija ta’ persunaġġi Maltin. Fl-1981, beda jdur Malta biex jiġbor il-memorja kollettiva tan-nazzjon Maltija u li issa tikkonsisti fil-konservazzjoni ta’ mijiet ta’ tifkiriet. Fl- istess sena assista lill- President ta’ Malta ta’ dak iż-żmien Dr Anton Buttigieg fin-nisġa tal-ktieb awto- bijografiku: ‘Il-Minġel tal-Gwerra’. Fl-1997, Raymond wettaq riċerka intensiva fl-Arkivji ta’ Palermo, Sqallija, u rnexxielu jsib il-kopja tal-Kapitula u tal-Kostituzzjonijiet ta’ Apulus (1497) li kienu japplikaw għal Malta fl-aħħar taż-Żminijiet Nofsana. Fl-istess sena, bil-permess tal- Kamra tad-Deputati, għamel traskrizzjoni tal-Minuti tal-Ewwel Kunsill tal-Gvern Malti (1835- 1849). Huwa assikura l-konservazzjoni ta’ manuskritt ta’ importanza storika kbira. Raymond huwa gradwat fil-Liġi, fl-Istorja, fil-Patristika, fil-Lingwistika, fil- Letteratura kif ukoll fl-Istudji dwar il-Komunikazzjoni. Huwa ntagħżel mill- Università ta’ Malta biex jissokta bl-istudji tiegħu fl- Università ta’ Oxford, l- Ingilterra, mnejn kiseb it-tieni Dottorat fil-Liġi b’enfasi fuq l-Istorja tal-Leġislazzjoni. Huwa l-kittieb u l-editur ta’ diversi kotba u l-ewwel persuna li ppubblika ktieb komprensiv dwar l-Istorja tal-Leġiżlazzjoni f’Malta taħt l-Inglizi (1814-1964). Kien ukoll ta bidu għall-kodifikazzjoni tar-Rulings tal- Presidenti tal-Parlament Malti (1921-1964). Raymond Mangion huwa Professur tal-Liġi u tal-Istorja Legali fil- Fakultà tal-Liġi fl-Università ta’ Malta. TONY ZAHRA MOM Tony Zahra li twieled f’Tas-Sliema fl-1945 huwa l-President tal- Assoċjazzjoni tal- Lukandi u Ristoranti Maltin (MHRA). Zahra huwa kkunsidrat bħala wieħed mill-pijunieri fl-industrija tat- turiżmu f’Malta u matul il-karriera tiegħu kellu u mexxa numru ta’ kumpaniji tal-ivvjaġġar fl- Ingilterra u l-Olanda, kif ukoll lukandi u akkomodazzjonijet oħra f’ Malta. Ta’ 18-il sena huwa beda l-karriera tiegħu billi investa f’kumpanija tal- karozzi tal- kiri. Dan kien fi żmien li Malta kienet qed tkabbar l-industrija tat-turiżmu. Fl-1995 meta l-industrija tas-Servizzi Finanzjarji kienet għada fil-bidu, huwa waqqaf il- kumpanija Fexserv Financial Services, kumpanija li kienet tieħu ħsieb il-kambju barrani u trasferiment ta’ flus. Matul is-snin din l-attività fil-qasam tas-servizzi finanzjarji ġiet estiża biex tinkludi Fund Management, Fund Administration u aktar riċenti Pensjonijiet. Zahra kellu wkoll interessi fil-manifattura u kien Viċi President tal- Federazzjoni tal- Industriji matul il-perjodu 1981 – 1984. Fl-1976, Tony inħatar Direttur fuq il-Bord tal-Malta Development Corporation, illum magħrufa bħala l-Malta Enterprise. Kien ukoll Direttur fil- Malta International Airport li dak iż-żmien kienet tal-Gvern, Direttur fl-Airmalta, Chairman tal-Malta Industrial Parks Ltd u aktar riċenti membru fil-bord konsultattiv tal-Fond għall-Iżvilupp Nazzjonali u Soċjali. Huwa wkoll membru fundatur tal-Mediterranean Tourism Foundation, li jaħdem biex jgħaqqad il-partijiet interessati mill-pajjiżi tal-Mediterran biex jikkoperaw fil-qasam tat- Turiżmu. Fl-1994, Tony Zahra inħatar bħala Konslu Ġenerali Onorarju għar- Repubblika tal- Litwanja. Tony huwa l-President tal-Malta Tourism Foundation u parti mill-Lisa Maria Foundation, fondazzjoni mhux governattiva u li taħdem mingħajr qligħ li twaqqfet bl-għan li tissalvagwardja tfal u żgħażagħ mill-perikli. MEMBRU ONORARJU IL-PROF. JOSEPH A BUTTIGIEG MOM (WARA MEWTU) Imwieled Il-Ħamrun fl-1947, il-Professur Joseph A. Buttigieg studja ġewwa l- Università ta’ Malta u kiseb ukoll post-graduate degree, B.Phil mill-Kulleġġ Heythrop ġewwa Oxford. Wara kien emigra lejn l-Istati Uniti sabiex ikompli għad-dottorat fl- Ingliż fl-iState University ta’ New York fejn, fl-1976, kiseb Ph.D b’dissertazzjoni fuq l-estetika tan-novella ‘A Portrait of the Artist as a Young Man’ ta’ James Joyce. Fl- istess sena huwa mar Las Cruces fi New Mexico fejn beda jgħallem ġewwa Università tal-Istat ta’ New Mexico. Fl-1979 huwa ħa ċittadinanza Amerikana. Buttigieg speċjalizza fil-letteratura u teorija Ewropeja moderna fejn ippublika diversi artikli, komponimenti u kotba. Huwa ttraduċa u editja t-tliet volumi tal-verżjoni Ingliża ‘Prison Notebooks’ ta’ Antonio Gramsci. Huwa kien ukoll membru fundatur u President tal- International Gramsci Society. Fl-Università ta’ Notre Dame ġewwa l-Indiana, Buttigieg okkupa diversi rwoli kemm amministrattivi kif ukoll ta’ tmexxija, fosthom kien President tad-Dipartiment tal- Ingliż, Direttur tal-London Program u Direttur tal-Hesburgh-Yusko Scholars Program fejn assista fost l-aktar student promittenti tal-Kulleġġ, b’enfasi fuq servizz u tmexxija. Il-MIDALJA GĦALL-QADI TAR-REPUBBLIKA ANTHONY BEZZINA MQR Anthony Bezzina twieled ir-Raħal Ġdid fl-1948. Huwa imprenditur magħruf u kkunsidrat bħala wieħed mill-pijunieri fil-qasam marittimu lokali. Huwa wkoll rispettat ħafna fil-lokalità tiegħu għall-kontribuzzjoni tiegħu fil-qasam soċjali u filantropiku. Wara li temm l-istudji tiegħu, Bezzina ingħaqad ma’ missieru fin- negozju tal-familja. Minkejja l-età żgħira li kellu huwa wera inizjattiva u maturità li għenitu biex avvanza fil-karriera, fejn preżentement qed jokkupa l-pożizjoni ta’ Direttur tal-kumpaniji li jagħmlu parti minn Bezzina Group. Dan il-Grupp jikkonsisti minn 4 kumpaniji, Salv Bezzina and Sons Ltd, Bezzina Maritime Services Ltd, Bezzina Ship Repair Yard u Bezzina Steel Fabrications Ltd. Għal dawn l-aħħar 38 sena, Anthony Bezzina kien ukoll il-President tal- Hibernians FC. Taħt it-tmexxija tiegħu, il-Hibernians FC waqfu nursery tal-futbol fejn tfal mill- lokalità u l-viċinanzi setgħu jtejbu l-ħiliet tekniċi fil-futbol f’ambjent strutturat u sikur. DUN ĠANMARI CAUCHI MQR Kan. John Mary Cauchi, jew kif inhu aktar magħruf, Dun Ġanmari Cauchi, twieled fl-1942 ġewwa l-Għarb, Għawdex. Fis sena 1963, meta kellu 21 sena kien mar il- Brażil sabiex ikompli l-istudjI tiegħu fuq it- teoloġija. Dun Ġanmari Cauchi ġie ordnat qassis mill-Arcisqof José Maria Pires fid-djoċesi ta’ Paraiba ġewwa l-Brażil fl-1967, fejn baqa’ jaħdem hemm bħala qassis għal madwar 50 sena. Huwa kien kappillan ta’ diversi parroċċi u kien jgħin lill-bdiewa permezz ta’ organizazzjoni tal-Knisja Kattolika Brażiljana msejħa Land Pastoral Commission. Din kienet tagħti għajnuna lill-bdiewa foqra sabiex jakkwistaw l-art li, xi drabi, kienu jkunu ilhom jgħixu fiha. Il-ħidma tiegħu mhux dejjem kienet aċċettata speċjalment mis-sidien tal-artijiet fejn kemm-il darba kien mhedded, saħansitra b’arma tan-nar. Meta għalaq 75 sena u kien ilu 50 sena qassis ġewwa l-Brazil, huwa ddeċieda li jirritorna lura lejn il-gżira Għawdxija fejn għadu jagħti s-servizz tiegħu fis-Santwarju Ta’ Pinu u d-Dar tal-Anzjani ta’ Pompej sal-ġurnata tal-lum.