SAUNOAGA FAA-TAUPOU SUI USUFONO O LE PALEMENE XV 2011-2016 20 IUNI 2011 Susuga PAPALII LIO FAAVAIVAIOMANU TAEU MASEPAU (Faasaleleaga Nu.2): Lau Afioga i le Fofoga Fetalai faapea le paia o le Maota, e muamua ona ou faatulou atu i le paia o le Palemene, i le afio o lau Afioga i le Fofoga Fetalai. Afio lau Afioga i le Palemia faapea lau Afioga i le Sui Palemia ma le Kapeneta. Afio le Taitai o le Itu Agai faapea le Sui Taitai. Afifio sui usufono mamalu uma o le Maota, o outou paia ma o outou mamalu, a lea ua titi tonoa i le Maota o Samoa i Tiafau nei. O lo tatou valaauina, a lea na faia mai i le fuifui lo outou paia ma lo outou mamalu, aisea? Ia manuia Samoa mo a taeao. E faatalofa atu foi i lau Afioga i le Failautusi faapea le Ofisa o le Fono Aoao Faitulafono aemaise foi o Ofisa Sili o Pulega ma Faalapotopotoga Tumaoti a le Malo. Ou te faatulou atu aua le tapuaiga a Lana Afioga Mamalu O Le Ao o le Malo faapea le Masiofo. Le Sui o le Fono a Sui Tofia faapea le Masiofo. Lau Afioga i le Faamasino Sili faapea Alii ma Tamaitai Faamasino ma le mamalu o le vasega o Faamasinoga. O paia ia ma mamalua aua le tafatolu o le tatou faigamalo. Ou te faatulou atu aua paia faale-Atunuu, le paia aua Tama ma o latou Aiga, o Aiga ma Tama, le Usoga a Tumua ma Pule, Ituau ma Alataua, Aiga i le Tai ma le Vaa o Fonoti. Ou te faatulou atu foi aua le tapuaiga a nai o tatou uso i le Motu i Sasae aua le paia o Sua ma Vaifanua, Saole ma le Launiunasaelua, Ituau ma Faatuiolemotu, Fofo ma Aitulagi, Faatui ma Tootoo o le Faleula ma upu i le Manuatele. Ou te faatulou atu foi aua Faauluuluga o Ekalesia Kerisiano uma i totonu o le Atunuu aemaise le nofo a faa-Feagaiga i soo se fata faitaulauga i lea afioaga ma lea afioaga, o e o loo ee faafale-lemalu aua le Atua ma lona finagalo. O le Atua o Malo o loo ua tatou aeae ai nei e Faleseu ma tatou saa i Maa o Malie, o lea ua maua ai lo tatou saolotoga ma maua ai le Faavae o lo tatou Malo Tutoatasi o Samoa. Ae avea lenei taimi ou te faatulou atu ai i le tapuaiga a lou Itumalo pele o Faasaleleaga Nu. 2, le paia aua Leilua ma le Toalima, le Afio o Sa Alaalatoa faapea le Matua ia Alaalatoa, Susu Alo o Malietoa, Maliu mai Tuilagi ma Namulauulu faapea le na ai Malae i lau Fetalaiga Fauolo, le mamalu o le Maopu Tufuga ma le Lauti-na-laulelei ia te oe Safotulafai. O oe lava Safotulafai o le Pule, o loo tausi vaatele i Fuifatu o le Malae o le Faautugatagi aua Tootoo au o le Faasaleleaga. O le Malae e toa i ai le usuga ia Pule, o le Malae e toa i ai Umaga ma le sue Malo o Tumua, ete taui i lau Tagaloatea o loo afiafi ai upu o Samoa. Ou te faatulou atu foi aua le Susu o Malietoa i lou tala na atoa ma lou fala na folaloa e faafofoga ia te Oe Samoa. Susu Tooa o le Sao-na-lua, Susu Aiga o Sa Malietoa faapea le Alaalafaga o Usoalii, Seiuli ma Tuilaepa o ou Ituvai taitasi o le Malietoa, alaalatai le Matua ia Mago faapea oulua na Ailaoa ma le mamalu ia te oe le Itu o le Nofoalii faapea le mamalu ia te oe le Faiga. Ou te faatulou atu foi aua le faafofoga tapuai a le nofo a Faafeagaiga i totonu o lo tatou Itumalo, aua o a outou talosaga ma faamanuiaga e manuia ai lo outou sui usufono. Ou te faatulou atu foi aua le paia i Mafutaga a Tina faapea saoao ma sao tamaitai aemaise o le malosi o le tatou Itumalo. Ou te talitonu e le lanu pe nanea i sa matou faamatalaga la outou faaaloalo maualuga, talofa, ailoga a tua ma ni a lenei faaaloalo. O lau tatalo ia alofa le Atua ma taui atu i soo se auala lo outou agalelei faaalia e ala i la outou faiga filifiliga saoloto ma le amiotonu, lea ua outou filifilia ai la outou sui usufono e avea ma sui usufono o le Palemene o le Malo o Samoa. Tapuai maia ma le manuia. Lau Afioga i le Fofoga Fetalai, o le Matua o le Lauga; lau Afioga i le Palemia faapea le mamalu o le Kapeneta ma lena Itu o le Vaega Faaupufai, tatou galulue faatasi. E malie ia te au le saunoaga a le Afioga i le Palemia i le taimi na tofia ma faatauto ai Afioga i Minisita. Na ia saunoa ai, “A i ai ni mea tou te faafofoga mai e logo lelei ma manuia ai Samoa e le tau agaia na mea, o le agaga tonu lava lena lau Afioga i le Fofoga Fetalai, afai matou te maua o mea e faatau manuia ai le Atunuu e tuu i fea la matou lagolago, matou te lagolago atu. Afai foi matou te manatu e matagitogaina la tatou folauga, matou te faufautua atu, ioe, pe pao papa sa matou faufautua pe tuuaia foi i matou ua matou faitio, lau Afioga i le Fofoga Fetalai, matou te fautua ma faitio, ae le lagomia ai le finagalo o le Malo pe a faapea ua matou faitio ma fautua, leaga o lo matou tiute lea lau Afioga i le Fofoga Fetalai ma le paia o le Maota. Matou te tuu a lalo, o aga ia faa- Kerisiano, ou te talitonu afai e manuia Samoa i Tulafono tatou te fausia i totonu iinei o tatou uma lava lena, ae a afatia lo tatou Sa tatou te piiama faatasi lava matou te le o ese. O le tofa poto lea a le Atua na ia faatonuina ai Mose e totofi nisi Faamasino e fesoasoani ia te oe e faamasinoina lou nuu, aisea? Ina ia taunuu lava i le taunuuga o le nuu ua uma ona folafolaina. Lau Afioga i le Fofoga Fetalai o le agaga lena, e tatau foi ona i ai nisi e sole atu ma suga atu aisea, leaga o le Sa o Samoa e fau tele. E ui lava ina oloolo pito vaa ae tasi lava lona taunuuga ma mo tatou faamoemoe maualuga ia lalago faatasi a tatou foe ina ia sao ma uli le Sa o Samoa ma maua se manuia o le Atunuu mo a taeao. Lau Afioga i le Fofoga Fetalai, ae ou te lei oo i le Tulafono Tau Faaofi o le Faatatauina o Tupe Faaopoopo (Nu.2) 2010/2011 ma le Tulafono Tau Faaofi o le Faatatauina o Tupe 2011/2012, ou te iloa o le avanoa lea e ao ona avatu muamua nai motuga afa a lou Itumalo. Ou te talitonu e leai lava ma se afaina o le Tulafono Tau Faaofi o le Faatatauina o Tupe Faaopoopo (Nu.2) 2010/2011 ma le Tulafono Tau Faaofi o le Faatatauina o Tupe 2011/2012 lenei i nai motuga-afa a lou Itumalo, e le afaina ai foi a tatou tupe. Ua na o se talosaga e avatu leaga o le amataga lenei o le Paeaiga e ao foi ona avatu i lumamea e silasila i ai lena Itu o le Malo aua lenei Itumalo. Lau Afioga i le Minisita mo Faiga Palota, ua maua ua tofia foi le Komisi Suesue e suesueina le tatou Faiga Palota na sei mavae atu nei. Malo faafetai i le tofa ua ae i le Kapeneta, atonu o se auala lelei lea e toe faaleleia ai ni mea sa faaletonu i le tatou Faiga Palota aemaise foi sei toe silasila ona ua fai foi sina mamafa o nai faasalaga pe a. O le mafaufau lava ona upu lava a le Atunuu; “E au i le tauola, e au foi i le fagota” O latou nei ao tatou taeao. E faapena se agaga ma le vaavaai mamao faapena. Ona ou oo mai ai lea i le mataupu o loo tau avatu i luma o lau Afioga i le Minisita o Faiga Palota, o lenei Mataupu e popoe ma lilia ina nei naunau ta foi se taofi ae avea ma lape o se isi i totonu o le Maota ma le faafofogaaga a Samoa. Ae ui o lea e punapuna ae pea se lagona ae ao lava ona avatu i le Maota. E talosagaina lau Afioga i le Minisita o Faiga Palota, sei silasila ane i se tofi sui usufono mo Sapapalii, ua mafua lau Afioga ona sa faitioina foi e isi Komisi Suesue ua mavae ua tatau ona i ai se sui o Sapapalii. Ae ui o lea o lenei avanoa lau Afioga i le Minisita, a tuu atu lava le aofai o tagata palota e talafeagai, a tuu mai foi i mafuaaga faale-aganuu, lau Afioga i le Fofoga Fetalai ma le mamalu o le Maota, ou te le taua aua o loo silafia e le Maota ma silafia e Samoa ae na ona ou toe faamanatu atu lava, o Mataniu Feagai ma le Ata na tatala ai le Avei mai le Lagi, a le Uluai Taeao o le Talalelei. O Mataniu Feagai ma le Ata foi na ifo ai le Tafaifa o le Atunuu ma malele ai Malietoa Vainuupo, o paia ma mamalu faale-Atunuu o le a ta fautasi ia Iesu Keriso ma le Talalelei, a lo ta Faavae papa lea tatou te aeae ai nei, Faavae i le Atua, o lana aganuu faapea ma le tu faa-Kerisiano.