SAUNOAGA FAA-TAUPOU 2016-2021 22 IUNI 2016 Afioga TOLEAFOA KEN VAAFUSUAGA POUTOA (Lefaga & Faleaseela): E muamua ona momoli atu le agaga faafetai i lau Afioga i le Fofoga Fetalai i le taulaga siitia foi aua lenei taeao fou i le alofa ma le agalelei o le Atua. E muamua ona momoli atu le agaga faafetai ma le faamalo i lau Afioga i le Fofoga Fetalai i le taulaga siitia foi i lenei taeao fou aua foi le faafofoga a lo tatou Matai Sili i le lagi aua lo tatou vatapuia ma lo tatou Atua, i le maleifua mai o le Palemene i lenei taeao fou, i le maleifua mai o lau Afioga i le Palemia ma le Kapeneta, aemaise o sui usufono mamalu o le Fono mamalu o le Palemene o Samoa. Lau Afioga i le Fofoga Fetalai faafetai mo lou avanoa aua se sao o lenei itumalo o Lefaga ma Faleaseela i le Tala o le Tupe ua folasia nei i le Maota o le Palemene. I le saunoaga manino ma le malamalama a le Minisita o Tupe i le taimi ua tuanai. Lau Afioga i le Fofoga Fetalai, e momoli atu le faamalo a lenei itumalo i lou toe pale mai i le tofi o le Fofoga Fetalai e pei ona e umia i tausaga ua tuanai, ia faamanuia le Atua i lou alofaiva i le faafoeina o le Palemene o Samoa. Ae ou te le i asaina le tai na iloa e Leuteleleiite, e ao ona ou vaisausauina ia Sa ma Tia o le vavau o Samoa, aua o lele ua paia ma pau Tiafau o le Malae o le Faautugatagi a le atunuu. O Malae e lipoi ai manuia o le atunuu ma ona tagata. Tatou taalolo laia paia o Tiafau o tootoouli, ma tootoo tau le malae, o le usoga aua le puipuiga o le Malae leai. Aua Aiga o Tupu, Aiga o Nofo, ma Aiga o Papa, ma Aiga na Tafaifa. E faatulou atu aua le tapuaiga leleoa i Lana Afioga Mamalu O Le Ao o le Malo Tutoatasi o Samoa, lau Afioga Tui Atua Tupua Tamasese Efi ma lau Masiofo Filifilia. E faatulou atu foi i le afifio o Sui o le Fono a Sui Tofia, lau Afioga i le Tama Aiga Tuimalealiifano Tuitaalili Suatipatipa Vaaletoa Sualauvi II ma lau Masiofo, lau Afioga Hon Tuiloma Lameko ma lau Masiofo, lau Afioga i le Suafa Afioga Hon Le Mamea Ropati Mualia ma lau Masiofo. E faatulou atu foi i lau afioga i le Faamasino Sili ma lou faletua ma le mamalu o le Faamasinoga a Samoa. E faatulou atu foi i lau Afioga i le Palemia o le faauluuluga o le Malo Tutoatasi o Samoa ma lau Kapeneta mamalu, lau Afioga i le Fofoga Fetalai ma le Palemene o Samoa ua potopoto. E le faagaloina foi faauluuluga o Matagaluega ma Faalapotopotoga le Aufaipisinisi Tumaoti faapea paaga o atinae o Malo mai fafo. Lau tapuaiga Samoa i le afio o Tama ma o latou Aiga, Aiga ma o latou Tama, le Usoga ia Tumua ma Pule, Ituau ma Alataua, Aiga i le Tai ma le Vaa o Fonoti. Ou te faatulou atu foi i le tapuaiga a Taitai o Ekalesia ma le Aufaigaluega i so o se fata faitaulaga i totonu o Samoa, o lo o toa ma filemu ma manuia Samoa i la outou galuega tatalo i le ao ma le po. O le paia lava lea, ou te faamalulu atu, e le faagaloina foi le tapuaiga a o tatou uso i Sasae le Faigamalo a lau afioga i le alii Kovana ma le Lutena Kovana, i le afio o lau Afioga i le Faamasino Sili ma le Faamasinoga, le afifio o Sui o Maota e lua, o le paia lava mai Laloifi ma Falesau, Gagamoe ma le Utumoe, o le fatu le gaee ma ma leo utumau. O paia na i le usoga i le paia ma faleagafulu, o le Laau na Amotasi, afio i le Faatui ma Auvaa o Tootoo ma upu ia te oe le Manuatele. O paia na o Samoa mai le matafanua o leniulesa, i Saua seia paia Mulifanua. O le pa e sopoia o le Vai Suatoto ma le Ana o Vaatausili i Fili ma Puletuu. Ae ou te le i oo atu i le Tala o le Tupe, e momoli atu lava le faafetai tele ma le faamalo a lenei itumalo o Lefaga ma Faleaseela, lau Afioga i le Palemia, lau Susuga Tuilaepa Sailele Malielegaoi. O le faauluuluga o le Malo ma le faigamalo talu ai, i la outou faatupu ma le faatamalii, lele ua seei ai le tama matua o lenei itumalo i tofiga maualuluga a le atunuu. Faafetai le faaeaea ma se tofa na ae i se tautua a Le Mamea Ropati ia Samoa ma ona tagata. O la outou pule lea. E momoli atu foi lau faafetai i le Afioga Le Mamea Ropati ona o le tauaveina o le mamalu o le itumalo i upufai a le Palemene i tausaga e tele. Ia faamanuia le Atua i lou tulai mai, ia maua sau tofa aua Samoa. Lou itumalo pele ia te au Lefaga ma Faleaseela, o le paia lava lea o le afifio o le aiga Sa Tuala ma le latou tama, ma le mamalu ia Tuisavailuu, Leitu ma le Gagaeolo, afifio Aiga e lua Taulagi ma i laua Matua, alaalatai tootoo o Maauga, Taloolevavau ma Leausalilo, ma polo e fa o le Faleaana ma le tagata o le vavau. Le tapuaiga paia i faletua ma tausi, le itupa paia i saoao ma tamaitai, ma le malosi o le tatou itumalo. E le faagaloina foi le tapuaiga a le itupa paia i le Aufaigaluega Paia a le Atua i so o se fatafaitaulaga i totonu o lou itumalo. I le afio o lau afioga Patele le Tama Pule o le Matagaluega, lau susuga i le Toeaina ma le faletua ma le Aufaigaluega galulue ma outou faletua, i susuga i Faafeagaiga ma o outou faletua. E momoli atu foi lau faafetai ma lau faamalo i le paia o lou itumalo, ona o le avanoa ua ou nofo ai i le nofoa lea, o le agaga maualuga o le fia tautua i lou finagalo, aemaise o le igoa pele o si ou itumalo pele o Lefaga ma Faleaseela. Ou te ave foi le faamalo i ou tuafafine ma uso sa o matou tauva aua se tofi o le itumalo, malo le finau, malo le taalo faatausala, faafetai le faatamalii, faafetai le taaalo faatupu, leaga o Sa Tuala o le Aiga Faalagilagi. Ae tapuai maia, se i momoli manaoga o lo ta itumalo. Lau Afioga i le Fofoga Fetalai, o le Tala o le Tupe ua taulimaina nei, e momoli le faafetai i le Minisita o Tupe, lau Afioga e fou le tofiga ae le fou lau matafaioi. E avatu foi le faamalo i le manulauti i saunoaga a lau Afioga i le Minisita o Tupe, i le tulaga lea o le lufilufileleiina o le tatou tamaoaiga ma faaaogaina ma le tatau e tusa ma taiala faaletulafono o faiga faavae o le tatou Malo. Ua matauina le tulaga o le faamuamua o lau faasoa i le Soifua Maloloina ma Aoga. E matua lagolagoina e lenei itumalo aua o le lumanai manuia lea o le atunuu pe a soifua manuia ma aoaoina lelei ona tagata, aua le va feagai ai ma uso mai fafo faapea le atinaeina o le atunuu e faalagolago i le tulaga o le aoaoina lelei. Ua matauina foi i le Tala o le Tupe o le taiala mo le atinae o Samoa, le Strategy mo Samoa, lea o le a amatalia nei mo le isi 4 tausaga o lumanai 2016-2020. O le agaga maualuga a lava tapena se faamoemoe ma lelei lona faatinoina ma nofo malamalama le atunuu ona faaitiitia ai lea o le faitio. Ae tautuana aua le faavaivai pe a iai ni toatuga e fetaia’i…ae tatou faamoemoe aua e le tuulafoaiina i tatou e le Atua le Tama. O le agaga o le Tala o le Tupe ia fai fuafua ma ia gafatia le tamaoaiga o le atunuu, e ao lava ona i ai le tofa manino aua fuafuaga mo le lumanai, ia lototele e uunai ma atinae polokalame ia manuia ai Samoa, ae le gata foi i lea…. O lenei ua faagasolo le tatou faigamalaga mo le Paeaiga Lona XVI o le Palemene o Samoa. O lea ua tatau ona tuu atu loa manaoga o lenei itumalo i le Afioga i le Palemia ma Minisita o le Kapeneta aua le latou pule faasoa. Lau Afioga i le Minisita mo le Soifua Maloloina, o lena ua i ai le talosaga o lenei itumalo mo se matou falemai (sub-center), lea ua i ai Motootua mo gasegase o le atunuu atoa ma lenei vaega o Upolu. A o le talosaga i lau Afioga i le Minisita mo le Soifua Maloloina, e talosaga se sub-center mo si o matou itumalo e agai i ai e tau latalata mo le siaki faafomai. E tau savali atu i inei le fomai ma le tausi soifua e pei ona faia foi i isi vaega o le atunuu. Lau Afioga i le Minisita mo Aoga, Taaloga ma Aganuu, faafetai tele mo le faleaoga fou o lo o fausia i le taimi nei mo si o matou nuu i Savaia Lefaga faapea foi Faleaseela, faafetai mo le faasoa. Ae pau lava o lea o se tuualalo, o alauni mo nai alo ma fanau o le Iunivesite lea local scholarship, o le talatala mai a se matua faapea faatoa maua le tupe pe a faaiuiu le kuata.