Årsmelding frå Strandebarm sokneråd 2015

Soknerådet 1.del av 2015

Leiar: Torill Gjerde Nestleiar: Kjellaug Gravdal Skrivar: Grete I. Lillefosse Kasserar: Jorunn B. Lillefosse

Øvrige medlemmer 1. del: Magne Helge , Nora Oma, Eli Haukeland, Elna Marie Tufta og sokneprest Lars Arne

Varamedlem: Herborg Kvamsøe og Turid Gjerde

Arbeidsutval: Torill Gjerde, Kjellaug Gravdal og sokneprest Lars Arne Vik / prostiprest Ellen Nordtun

Kvam Kyrkjelege fellesråd (KKF): Medlemmer: Torill Gjerde og Kjellaug Gravdal Varamedlemmer: Grete I. Lillefosse og Nora Oma

Soknerådet 2.del (ny periode) 2015 Leiar: Torill Gjerde Nestleiar: Siv Ljones Skrivar: Olav Tombre Kasserar: Brita Kolltveit

Øvrige medlemmer: Åse Sandnes Fosse, Kristian Neteland, Anne Marie B. Berge, Anne Kristin Aasen Gjerstad, sokneprest Lars Arne Vik og Odd Sverre Hove siste 3 mnd.

Varamedlem: Gunn Bjørg Håland Thorbjørnsen, Vigdis Bru Haugarvoll, Linn Jeaneth Strømmen, Ketil Karlsen, Lillian Hjartåker Fosse

Kvam Kyrkjelege fellesråd (KKF): Medlemmer: Olav Tombre og Kristian Neteland Varamedlemmer: Brita Kolltveit og Siv Ljones

Kyrkjeleg tilsette: Sokneprest i Strandebarm: T.o.m. 2.febr.: Ellen Nordtun, f.o.m. febr.: Lars Arne Vik, f.o.m. 1.okt. – 31. 12: Odd Sverre Hove Sokneprest i Vikøy: Lars Arne Vik t.o.m. 31.sept, frå 1.10.2015 til 31.12.2015: Odd Sverre Hove Sokneprest i Øystese og Ålvik: Lars Arne Vik Seniorprest: Dag Endre Hansen Seniorprest: Johnny Knudsen Kyrkjeverje: Olav Skeie Lid Kyrkjetenar: Inger Elisabet Viken, vikar Arvid Strømme og Lillian Hjartåker Fosse Organist: Margrete Lid Kjosås Organist: Sevinj Asgarova Kateket: Marna Roer Kyrkjelydspedagog: Lina Valland Lyngset Kyrkjelydspedagog: Bjørnar Sangolt Kyrkjelydspedagog: Solveig Lønning Sangolt (vikar for Lina) Kontorsekretær: Anne Kari Sørheim Klokkar: Torill Gjerde Gravar/kyrkjegardsarbeidar: Thor Erik Eitrheim Aga

Møte i Strandebarm sokneråd: Soknerådet har hatt 7 møter og behandla 47 saker. Kyrkjelyden hadde sitt årsmøte rett etter gudstenesta 21. februar.

Litt frå årsstatistikken (fjoråret i parentes) Det vart halde 20 (27) forordna gudstenester med gjennomsnittleg 104 (100) deltakarar per gudsteneste. Av andre gudstenester var det 10 (9), der 9 var på Strandebarmheimen og ei var samtlaegudstenesta Døypte: 13 (11). Konfirmerte: 16 (24). Vigsel: 3 (7). Gravlagde: 14 (18). Krølle: 3 (1). Fireårsboka: 6 (9). Seksårsboka: 6 (7).

Samla offer var kr 97 906 (kr 78 118). Av dette gjekk kr 82 383 (kr 47 846) til organisasjonar. Derav til kyrkjelydshuset kr 15 100 Kyrkjelyden fekk kr 15 523 (kr 30 272 ). Viser til rekneskapet.

ARBEIDET I KYRKJELYDEN OG I KYRKJA

Gudstenesteliv: Statistikken viser at gudstenestefrekvensen er på veg nedover. Dette uroar oss. Kor låg kan den bli, dersom Strandebarm fortsatt skal vera ein eigen kyrkjelyd? På gudstenester der ikkje trusopplæringstiltak, dåp eller anna er med, er det ofte få som går til gudsteneste. Dette året vart det halde folketonemesse med kor og musikarar i kyrkja. Det var ei god oppleving for veldig mange.

Alle dåpsborn fekk utdelt ein brodert dåpsklut i dåpsgåve.

Krølle: Alle 3 og 4-åringar vart invitert til krølletreff i år. Det var ei kjekk stund med program, song og mat. Eit koppelam kom på besøk på slutten av samlinga. Neste gong vert i 2017.

Babysong vert arrangert i Norheimsund kyrkje. Dette er eit tiltak for heile Kvam. 5 samlingar om hausten og 5 samlingar om våren.

Kyrkjebok: 4-åringane fekk si kyrkjebok. 4-åringane med foreldre/ føresette var inviterte til kyrkje ein ettermiddag før dei fekk boka; for å førebu gudstenesta og verta betre kjent med kyrkja vår og dei som arbeider der. Det vart òg gjeve kyrkjebok til 6-åringane. Før utdeling av boka vart barna inviterte til kyrkja ein ettermiddag saman med foreldre/føresette. På denne samlinga vart gudstenesta førebudd.

Småbarnsong hadde me ikkje i år, men me må prøve å få til samlingar i 2016 for aldersgruppa 1 – 4 år ca.

Tårnagent og Lys Vaken har me annankvart år, og ingen av desse arrangerte soknerådet i 2015

Søndagsskule Oma søndagsskule har vore einaste søndagsskule i soknet i fleire år. Det var etter kvart så få som møtte, at søndagsskulen vart lagt ned i byrjinga av året. Pengane som stod igjen på konto, gav dei til kyrkja sitt barne og ungdomsarbeid.

Konfirmantarbeid: Undervisninga har for det meste vore i kyrkjelydshuset, men òg litt i kyrkja. Soknerådet stiller med saft og frukt når konfirmantane har undervisning. Etter samtalegudstenesta fredag 17. april, var konfirmantar og foreldre samla til festsamvær i kyrkjelydshuset. Soknerådet tok ansvar for mat og servering, og soknerådsleiar og kateket tok på seg å leie festen. Konfirmasjonen var 26. april. Konfirmantane, saman med foreldre og sokneråd, stod for årets fasteaksjon 24. mars til inntekt for Kirkens Nødhjelp. Det kom inn kr 21 814 (kr 25 723).

Kristen Ungdomskveld er no i gang med sin 20. sesong. Arrangementet er for ungdom i alder frå ungdomsskulen og oppover, og er ca kvar 14. dag. Dei fleste ungdommane våre finn sin naturlege plass på kristen ungdomskveld. Arrangementet er på Strandebarm skule. Ungdom, foreldre og kyrkjelyd set pris på at dette ungdomsarbeidet er i bygda. Samarbeid med barnehage og skule: Før påske- og julehøgtida inviterte kateketen barnehagane til kyrkje med tilrettelagt program. Kateketen har vore på besøk i 5. klasse med undrevisningsopplegget ”Vandring gjennom Bibelen for born”. Skulegudstenesta var i kyrkja siste skuledag før jul.

Ny gudstenesteordning: Alle sokneråda i Kvam har hatt to år med ny gudstenesteordning. Dette arbeidet skulle evaluerast i slutten av år 2014, men fekk utvida frist for evaluering til våren 2015. Ordninga er no forenkla og ser ut til å fungere greitt.

Samtalegruppe: Kvar annan veke har det vore arrangert samtalegruppe i kyrkjelydshuset. Tilbodet er for alle som ynskjer å delta. Enkel servering av kaffi/te, før ein går gjennom komande søndags preiketekst, ser film, eller finn eit anna aktuelt tema. Eit tilbod for både kropp og sjel.

Machaseh er framleis kyrkjelyden sitt misjonsprosjekt, der den Norske Israelsmisjon er bindeleddet mellom soknerådet og Machaseh i Jerusalem. Prosjektet har ikkje hatt samkomer dette året. Det er kome fleire brev frå dei som driv Machaseh.

Bønekassen; er montert bak i kyrkjeskipet. Alle som ynskjer det, kan leggje anonyme bøneemne i denne.

Kyrkjekroken bak i kyrkja er flittig i bruk. Under gudstenestene kan ein oppleve at borna kjem og set seg her, og dei teiknar og les i bøker. Etter gudstenestene har kyrkjevertane ansvar for å servere kaffi med noko attåt. Dette er med å skape eit positiv sosial fellesskap i kyrkjelyden.

Kyrkjeskyss: Dette året har vi òg hatt kyrkjeskyss til alle gudstenester. Soknerådet legg til rette for dei som ringer og ber om skyss til kyrkja.

Konfirmantjubileum 4. oktober; 50-, 60-, 70- og 75-års jubilantar vart inviterte. Etter ei fin gudsteneste gjekk om lag 50 jubilantar og fylgje til kyrkjelydshuset, som var dekka til fest denne dagen. Gjertrude Eikeland leverte middag. Soknerådet dekka bord, pynta, serverte og rydda etterpå.

Temakveldar: Det har vore fleire interessante temakveldar av ulike førelesarar siste året. Desse har vore godt besøkte.

Kyrkjelydshuset: Kyrkjelydshuset blir brukt mellom anna til minnesamvær, dåpsfestar, konsertar, tema- og kulturkveldar, konfirmantundervisning og til soknerådet sine møter. Huset er utleigd til Lions Club Strandebarm sine faste medlemsmøter. Kyrkjelydshuset vert teke i bruk av stadig fleire og det fungerer som ein god stad å vere. Dette året har me starta prosessen med utsmykking av huset. Det vert skreve kontrakt med kunstnar Ida Helland Hansen i 2016 og det vert basar til inntekt for utsmykkinga.

Kyrkjeveg: Dette året har me fått oppmerking på parkeringsplassen, noko som er til stor glede ved store tilskipingar. Trass mange purringar, har me framleis ikkje lys langs kyrkjevegen og på parkeringsplassen. Soknerådet er redd for at det skal skje påkjørslar ved kyrkja og vil gjere det ein kan for å påverka til å få lys komande år.

Kyrkjebladet er som vanleg dei siste åra kome ut med 4 nummer. Me opplever at bladet vert godt motteke og vil takka alle som støttar kyrkjebladet. Siste året vart det kr 448,- i overskot i kyrkjebladet.

Prestegradsnaustet: Soknerådet har ved fleire høve teke kontakt med Opplysningsvesenets fond (Ovf) for å påpeike at naustet er i dårleg forfatning. Heller på taket er lause og dett ned. Det er synleg lekkasje i taket fleire stader. Det vart forsøkt å midlertidig dekke taket med armert presenning, men den vart fort øydelagt. Det viser seg at naustet står på bygsla tomt, der avtalen truleg ikkje er halden vedlike. Det er Ovf. som har ansvaret for naustet.

Vedlikehald i kyrkja: Det planlagt oppussinga av våpenhuset, vart utsett til våren 2016, pga at me ikkje kom i gang før vinteren og kulden kom på oss.

AVSLUTNINGSVIS:

Dette året har vore prega av val på nytt sokneråd og den uavklara prestesituasjonen.

Det lukkast valnemnda på overtid å få mange nok til å stille på soknerådslista. Dette var me veldig glade for. Valnemnda gjorde ein framifrå innsats, med eit tidkrevjande arbeid som dei utførte på ein god måte. Det nye soknerådet har eitt medlem frå førre råd.

Medlemmane i Strandebarm sokneråd opplever arbeidet som meiningsfullt og utfordrande. Soknerådet gjer ein god innsats som kyrkjevertar i gudstenestene og dei tek ansvar på ulikt vis i dei ulike aktivitetane. I soknerådet ser ein det som viktig å arbeida for at folk som bur i bygdene våre kan kjenna seg heime i kyrkja, og at me saman kan byggje på verdiar som opnar opp for fellesskap og engasjement. Me ynskjer å vera ein levande kyrkjelyd der gudstenesteliv og trusopplæring blir gode møteplassar for alle i alle aldrar.

Etter at soknepresten for Strandebarm/ sa opp ved nyttår -14, og slutta i stillinga 2. februar, har det ikkje lukkast å få tilsett ny prest. Bjørgvin bispedømme vedtok i møte 24. mars å trekke inn stillinga som sokneprest i Strandebarm og at Strandebarm og Vikøy skal dela sokneprest. Dette året har me hatt mange ulike prester på gudstenester og dei ulike aktivitetane i kyrkjelyden. Soknerådet ser med stor uro på utviklinga og er redd for at dette vil føre til store endringar og merkbar reduksjon i både gudstenester og møtepunkt med prest frametter.

Me er glade og takksame for alle frivillige som gjer ein innsats, og soknerådet vil arbeida for at fleire frivillige kan finne sin naturlege plass i arbeidet. Særleg i barne- og ungdomsarbeidet treng kyrkjelyden inspirerte frivillige. Strandebarm sokneråd takkar dei tilsette og vikarar i kyrkja vår for det gode arbeidet som vert gjort. Vidare vil ein takka kvar einskild av dei for det dei betyr for oss alle i Strandebarm kyrkjelyd. Takk for godt samarbeid og fellesskap.

Strandebarm sokneråd vil òg takka kyrkjelyden for tilliten og godt samarbeid dette året, og ynskjer Guds signing i året som ligg framom.

Omastrand, februar 2016

Torill Gjerde leiar